Milimo 2 - UPANGANO UPYA

uMweso Nswefu wikila asumila

¹ Nga pano uwanda wa Pentekoste wafika, yalipo yoshi apali ponga.

² Nga suwa suwa kwisa iswi lino likoline nu unza unzumo unkumu, ukufuma mwiyulu, ulupita suwa, uzyula ng'anda yoshi muno yali.

³ Kuloleka ivyenje vya moto fino vyayalimbine vyaikalila chila ntu pano atensi.

⁴ Yoshi yazyula uMweeso Nswefu, yatampa ukuvwanga uku mivwango minina, ndi fino Mweso Nswefu wayapile ukuvwanga.

⁵ Nga aYudea yali kweneko uku Yelusalemu, antu yano yachindike Leesa, antu ya nko zyonsi aya kuno ukushi.

⁶ Nga pano iswi li lyapulikwa, amaumba yakongana, yala yasakamikwa, kuno chila ntu wayapulike yaluvwanga uku mvwango waakwe unkola.

⁷ Nga yakukuma nkani yoshi nu kuzunguka, yanenana, yaati: “Lolini, yoshi ya yano yaluvwanga, yasi aGalilea?

⁸ Nga chawa uli swensi chila wenga ukupulika um-mvwango witu uno twavilwe nao?

⁹ Apatia na aMedi na aElamu, na yano yatenzi uku Mesopotamia, nu ku Yudea nu ku Kapadokia, Ponto nu ku Asia,

¹⁰ Fligia na Pamfilia, ukuMisili ni mbali zya ku Libia apipi ni Kilene, na eni yano yafumile uku Loma, aYudea na alondeshi ya kupepa kwao.

¹¹ aKlete na Alabia, tuluyapulika yaluvwanga uku mivwango itu, imilimo imikulu iyi Leesa.”

¹² Yasunguka yoshi nu kukukuma nkani, yanenana yaati: “Ichili chani ichintu kwene chi?”

¹³ Leelo yamwi yasoweka, yaati: “Iyakoleka isute!”

Petlo wasunda apa Pentekoste

¹⁴ Leelo Petlo awimilila ponga na yalye ikumi na wenga, afumya iswi lyaakwe, ayanena, ati: “Mwe yantu ya mu Yudea, nemwe mwensi yano mutenzi um-Yelusalemu, mumanye ichintu chi, mupulikisye amaswi yane.

¹⁵ Kuno antu ya yatakolike ndi fino mulwelengula, kuno uchili untondo.

¹⁶ Leelo ichintu chi, ichino chavwanzilwe na kalauzya Yoeli.

¹⁷ Leesa ati: ‘Chiluwa uku manda ya chisila, ndwitila antu yoshi Mweso wane, na ana ino ayachonsi na ya chanachi yalulauzya, na alumendo ino yalulola malele, na ayikolo ino yalulota iviloto.

¹⁸ Endi, na pa manda yalye ndwitila aomvi yane ayonsi na yanachi uMweso wane, nayo yalulausha.

¹⁹ Nene ndulanga ifizunguko umwiyulu apiyulu, ni vilangizyo kuno ukushi apansi: uwazi nu moto ni chipu chi lyunsi.

²⁰ Ilanzi lilusenuka liwe ichanda, nu mwezi ukuwa uwazi, inkolelo ya kwiza uwanda uwo uwa Mwene, uno wakula umanyike.

²¹ Nga chiluwa wensi wino alwita izina lya Mwene, alufyuka.’

²² “Mwe yatata ya mwiIslaeli, pulikisyini amaswi ya: Yesu wa ku Nazaleti, untu wino walangiziwe kuno muli na Leesa uku maka ni vipezya-mano ni vilangizyo, fino Leesa wachisile ukwikasa lyaakwe pano muli, ndi fino mwe yakola mumanyile.

²³ Untu wi wafimilwe ndi fino Leesa wakasime nu kukumanya kwakwe fuma kali, nemwe mwamkonkomile apa nsalaba uku makasa ya antu yakulukuwa, mwamumola.

²⁴ Wino Leesa wamtutulwile asapula ichoze cha kuwaya kwa nfwa, kuno atali uwa kulemwa nayo.

²⁵ “Kuno Daudi watasile, ati: ‘Nalolanga uMwene manda yoshi apa maaso yane; kuno ali ukwikasa lyane ilya kwilunji, kuti ntachitelengana.

²⁶ Ichino umweso wane wachimba, nu lulimi lwane lwatensya. Kaili umwili wane nao wamwikala um-utailo.

²⁷ Kuno utalusya umweso wane ukuzimu, nanti unswefu wako utalumfima alole uononi.

²⁸ Wammanyisya inzila zya upuma; ulunzuzya ukuchimba pa usyu wako.’

²⁹ “Yatata yachane, muntekelele, mtane munene apatiswe ivya pali tata-kulu witu Daudi, fino wafwile azyikwa nilindi lyaakwe lilipo pa ukumwitu nilelo kwene.

³⁰ Nga fino ikalauzya, pano wamanya fino Leesa wannapile ichilapo fino aluteka wenga uwa mpanda wam-nsana wakwe, pa chisumbi chakwe icha ukulu,

³¹ unkola kwene watangwile uku chilola inkolelo, watasile apa kututuluka kwi Klisto, fino umweso waakwe utasilwe ukuzimu, nanti umwili waakwe utali nu kuola.

³² Yesu wiyo Leesa wantutulwile, neswe swensi swe yasyuta yaakwe.

³³ Nga pano wakweziwa afika ukwikasa ilya kwilunji ili Leesa, nu kupokelela kuli Tata ulanyo ulye wa Mweso Nswefu, atîta ichintu chi, chino mululola nu kuchipulika.

³⁴ Kuno Daudi atakwezile umwiyulu, leelo unkola kwene uwino afwashile, ati: ‘Umwene wanenile uMwene wane, waati: Wikala ulusansa kwikasa lyane ilya kwilunji,

³⁵ fika na lino nduwika asiluembu yako ukuwa ichisumbi cha mulu yako.’

³⁶ “Ichino ng'anda yoshi iya aIslaeli yamanye ningo, fino Leesa watamchita Yesu wino mwamkonkomile nu kumumola, ukuwa Mwene na Klisto.”

³⁷ Pano yapulika ifintu fi, fyayatota imyenzo, yanena Petlo ni mitume inina, yaati: “Tuchite uli yachitu?”

³⁸ Petlo wayanena, waati: “Vipelini, mubatishiwa chila ntu ukwizina li Yesu Klisto, uku kwelelwa amaifyo ino, nemwe mulupokelela uwila wa Mweso Nswefu.

³⁹ Kuno ulanyo u uwa kuli mwemwe nu ku ana ino, na antu yoshi aya kutali; na kuli yoshi yano yalwitwa nu Mwene Leesa witu yize kunali.”

⁴⁰ Nga ayasyutila uku maswi aminji amanina nu kuyasokesha, ati: “Ufyusini nu mpanda u unjipe.”

Fino asumila yateshi

⁴¹ Na yano yapokelile iswi lyaakwe, yabatishiwa; uwanda uo kwene yungilizike antu yawa imyanda amakumi yatatu.

⁴² Nga yikala nu kulemasya masambilizyo ya mitume numweeso onga, nu kukunyola unkate, nu kupepa.

⁴³ Chila ntu alemeka ni ngofi, ni fipesha-mano tupu ni vilangisho fichitwa ni mitume.

⁴⁴ Na yoshi yano yasumile yali apali ponga, yuminkinye ifintu vyao vyonsi.

⁴⁵ Yakasha ivyuma vyao ni ifintu vyao fino yali navyo, nu kwankanya antu yoshi ukulingana na fino untu waulilwe.

⁴⁶ Nga manda yoshi uku mweso onga yakonkowezya un-ng'anda-nkulu-iyi-Leesa, nu kukunyola unkate um-mang'anda yao, nu kulya ichakulya chao uku kuchimba ni myenzo na pe.

⁴⁷ Nga yatensya Leesa, yakundikwa na antu yoshi. uMwene aungilisha manda yoshi antu kuno yali, yano yafyusiwanga.