Milimo 19 - UPANGANO UPYA

Paulo asunda uku Efeso

¹ Nga chali pano Apolo wali uku Kolinto, Paulo apita un-nsi ya myamba aya uku Efeso, akomengana na alondeshi yamwi kweneko.

² Ayatondosha, ati: “Chene! mwapokelile uMweso Nswefu, lino mwasumile?” Yaati: “Awe! Nanti ukupulika fino kuli uMweso Nswefu, tutachili tupulike.”

³ Ayatondosha, ati: “Nga mwabatisiwe uku lubatisho chi?” Yaati: “Uku lubatisho lwi Yoane.”

⁴ Paulo ati: “Yoane wabatishanga ulubatizyo lwa kwelelwa maifyo, angi alunena antu yamsumile wino alwiza uku chisila chakwe, ali Yesu.”

⁵ Pano yapulika amaswi yao, yabatishiwa ukwisina lya Mwene Yesu.

⁶ Nga lino Paulo wayawikila amakasa apa mitwe yao, uMweso Nswefu waikila, yatampa ukuvwanga imifwango minina nu kalauzya.

⁷ Nayo paliponga yali ayonsi ikumi na yaili.

⁸ Nga Paulo wingilanga un-ng'anda yi Leesa, avwanga uku chiposye imyezi itatu, angi alupazyana na antu nu kuyaakwesela uku ifintu vya wene-wi-Leesa.

⁹ Leelo palolike yamwi aya mweso mikomu, yakana ukuzumila, angi yaluvwangila iviipe inzila iyo apiumba, nga atina kweneko ayasya, atalunkanya alondeshi, angi alutondosyana na antu manda yoshi un-ng'anda ya ntu umwi, izina lyaakwe i Tilano.

¹⁰ Ifintu vi viwa uku myaka ili, apalinji yoshi yano yatenzi umu Asia, yapulika iswi lya Mwene, aYudea na aGliki.

¹¹ Nga Leesa waombela ifipesha-mano uku makasa yi Paulo, imilimo mikulu nkani,

¹² apalinji alwale yatwalilwa ifitambala ni myenda ino ifumile uku mwili wakwe, indwala shao sitina, niviwa iviipe vifuma.

Ana yi Skefa yesha kutisha ifiwa

¹³ Ayudea yamwi, yakuma ya viwa, yano yalutangela, yesha ukulanda isina lya Mwene Yesu, kuli yano yalemwa ni fiwa ifiipe, yaati: “Ndumulafya kuli Yesu, wino alusundwa na Paulo.”

¹⁴ Yano yachisile fiyo ana saba aya ntu wenga, um-Yudea, Skeva, wikolo wi yakapela.

¹⁵ Leelo ichiwa ichiipe chiyo chavwanga, chati: “Yesu mmanyile na Paulo mmanyile, leelo nemwe mwe yani?”

¹⁶ Nguntu wiyo wino walemilwe ni chiwa ichiipe ayakundunkila, ayatonsya yaili, apalinji yituka ulwilo ukufuma un-ng'anda iyo na kuno yali tupu, iyachisika.

¹⁷ Ichintu chi chimanyika uku aYudea na aGliki, yano yatensi uku Efeso, ingofi siyalema yoshi, nizina lya Mwene Yesu litensiwa.

¹⁸ Na inji yano yasumile, isa yaulanda patiswe nu kumanyisha imilimo yao miipe.

¹⁹ Na yamwi yano yapendosyanga, yakonganika ivitabu vyao, yavyocha um-moto apa maaso ya antu yoshi. Nga yasolozya impiya fino yakazile, yazana impia ielfu amakumi yasano.

²⁰ Ndi fiyo ifino iswi lya Mwene lilimba nkani, liwa na maka.

Demetlio, kasula wi feza

²¹ Pano ifintu fiyo vyasila, Paulo um-mweso waakwe wakasi ukupita uku Masedonia nu ku Akaya, nga aye uku Yelusalemu, ati: “Ichisila ngi naya kweneko, chiile nkalole ni Loma kwene.”

²² Atuma antu yaili pali yano yammombelanga, yaye uku Masedonia, nayo i Timoteo na Elasto. Wene unkola asyala uku Asia, awikala kweneko manda yamwi.

²³ Apa manda yao kwene kukatuka impanzyela inkulu apa nzila iyo.

²⁴ Kuno untu wenga, izina lyaakwe i Demetlio, kasula wi feza, wino wasulanga iving'anda vyi feza ivyi Altemi, waletelanga yakasula yi feza usavi tupu.

²⁵ Wayakonganika ponga na yanji aya milimo ndi iyo kwene, ati: “Mwe yatata, mumanyile fino usavi witu ulufuma umu nnimo u.

²⁶ Na kaili mululola nu kupulika fino asu mwEfeso sile, leelo um-Asia yoshi kwene, Paulo wi watazosya nu kupulusya antu, ati, fiyo fino viluombwa uku makasa, fisi yalesa.

²⁷ Nga asi kuti unnimo witu u ulusulwa sile, leelo ni ng'anda i leza umwanachi unkulu, Altemi, ukuloleka chisi chimwi nu kusulwa, wino i Asia yoshi ninsi yoshi yalumpepa.”

²⁸ Nga pano yapulika ifintu vi yazyula ichilakali, yuma ichongo, yaati: “Altemi wa ku Efeso unkulu!”

²⁹ Unzi onsi watûkana, yitukilila yoshi ichaponga ukuya uku ng'anda ya kuchinila, yalema Gayo na Alistako, antu ya ku Masedonia, yano yapisile ponga na Paulo.

³⁰ Nga Paulo wakasime ukwingila apa yantu, leelo alondeshi yatalekile aye.

³¹ Na ikolo yamwi aya ku Asia, yakatakwe, yatuma antu kunali, yampapata ataulangizya muno yaluchinila.

³² Nga yamwi yangula vi na yamwi vi, kuno iumba lyalile ilitûkana, nainji pali yeneyo yatamanyile kuno ichani iyakongana ponga.

³³ Yafumya Aleksanda umwiumba, wino aYudea yamwika apa antu. Aleksanda ayapungila ikasa, asita ukuuvwangila apa antu yao.

³⁴ Leelo pano yamanya fino mYudea, yuma ichongo yoshi ponga ukwiswi lyonga uku nsaa ziili, yaati: “Altemi wa ku Efeso unkulu!”

³⁵ Nga pano kaandika wanzi wamyalazya antu, ati: “Mwe yatata ya ku Efeso, uwini wino atamanyile fino unzi wa Efeso uli kalolela wa ng'anda i Altemi unkulu, nu wa chilui chino chaponile ukufuma umwiyulu?

³⁶ Nga fino ifintu vi vitangi vikanike, tuzyini, mutachichita iswi uku lwilo lwilo.

³⁷ Kuno mulesile antu ya, yano yaatiile ifintu vya ng'anda yi leza witu umwanachi, nanti ukumtuka.

³⁸ Ichino Demetlio na yafundi yano yali ponga nawe, ngi yali niswi na umwi, amatengo yaliko, nalâsi yalipo, yasitachane.

³⁹ Leelo ngi mulusita iswi limwi uku ifintu vinina, vingavwangwa umwikongani lya chenecho.

⁴⁰ Kuno tungasitachiwa uku nnandu wa ifintu vi ivilelo, navyo ivya uwelewele; nu kwiswi liyo, tutangi tuukanile apiumba li.”

⁴¹ Pano wamala ukuvwanga ifintu vi, aomolola iumba.