Milimo 17 - UPANGANO UPYA

Paulo uku Tesalonike

¹ Walangi pano yapita apakasi ya Amfipoli na Apolonia, yafika ukuTesalonike, pano pali ng'anda yi Leesa ya aYudea.

² Na Paulo fino walile wamanyilila, awingila muno yali, nga apa manda yatatu ayi Leesa afwanga nayo um-Maandiko.

³ Aswelula nu kulolola fino chilungime Klisto ukuchula nu kututuluka uku yafwi, na fino Yesu wi wino ndumupa amaswi yaakwe, ali Klisto.

⁴ Yamwi pali yeneyo yazumila, yalemana na Paulo na Silasi, na aGliki yano yachindika Leesa ainji kwene, na yanachi ayikolo a izina yatali yache.

⁵ Nga aYudea yawa nuzuwa, yatola antu tupu tupu muli yano yasi ningo, yaipa, nga yakonganika iumba, yachita impanzyela un-nzi. Yaya uku ng'anda i Yasoni, yasita ukuyatwala apa yantu ya mu-nzi.

⁶ Nga pano yaula ukuyazana, yaakwekwesa Yasoni na yachitu yamwi apa maaso ya ikolo yanzi, angi yalumi chongo, yaati: “Antu ya yano iyaseleula insi, iyiza na ku kwene.

⁷ Yasoni watayapokelela, na antu ya yoshi yaluchita ivitaine na masunde i Kaisali, angi yaluti alipo umwene unji, wino yaluti i Yesu.”

⁸ Nga yasimya iumba na ikolo yanzi, pano yapulika ifintu fiyo.

⁹ Nga pano yalifya Yasoni na achakwe ilambo, yayata.

Paulo uku Beloya

¹⁰ Nga liyo kwene achitu yao usiku uo kwene yasindikila Paulo na Silasi ukuya uku Beleya. Nayo pano yaya kweneko, yingila un-ng'anda yi Leesa iya aYudea.

¹¹ Antu ya yali atekele ukuluta aya ku Tesalonike, kuno yapokelela iswi liyo uku kukunda kwamweeso, yalondola ningo manda yoshi um-Maandiko, ukuti yalole ifintu fiyo ndi fino vili.

¹² Nga antu tupu pali yeneyo yasumila, na anachi ayikolo a izina aya chiGliki nayonsi tupu.

¹³ Leelo pano aYudea ya ku Tesalonike yamanya, fino iswi li Leesa ilisundwa na Paulo nu ku Beleya kwene, yaya yatunkola antu nu kusimya maumba na ku kwene.

¹⁴ Nga liyo kwene achitu yasindikila Paulo, kuti aye kuli yemba; leelo Silasi na Timoteo yasyala kweneko.

Paulo uku Atene

¹⁵ Leelo yano yasindikile Paulo yapisile nawe uku Atena; nga pano yatumwa amaswi kuli Silasi na Timoteo, ukuti yatazimba ukunnondela, nga yampita.

¹⁶ Nga pano Paulo aluyalolela uku Atena nu kulola fino unzi uo wazyula ifilui, um-mweso waakwe walakalika nkani.

¹⁷ Nga un-ng'anda yi Leesa apashanya na aYudea na yano yachindika Leesa; na yano yakomengananga nawe manda yoshi apa sokoni.

¹⁸ Yamwi apa ya-Epikuleo na Astoiki aya mano yakomengana nawe, yamwi yaati: “Chene! ummankala wi alusita ukulanda chani?” Yamwi yaati: “Aluloleka fino ikuma wa mbila ya maleza aeni.” Kuno wasundanga amaswi ya pali Yesu nu kututuluka.

¹⁹ Nga yannema, yamsenda uku Aleopago, yaati: “Chene! tungamanya amasambilizyo mapya ya yano ululanda?

²⁰ Kuno waleta amaswi ameni um-makutwi yitu. Tungakunda ukumanya muno ifintu vi viile.”

²¹ Kuno a-Atene na eni yano yatenzi kweneko, yatali nu wasa ukwiswi nanti limwi, siku ukulanda nu kupulikisya amaswi ya ifintu vipya.

²² Paulo awimilila apakasi ya Aleopago, ati: “Mwe yantu ya mwiAtene, uku ifintu vyonsi nalola fino mwachindikisya nkani imyao.

²³ Kuno pano napitananga ku na ku nu kulola fino mulupepa, nazana ialtale iwaandikwe amaswi ya: Kuli Leesa wino atamanyike. Ichino nemwi ndumusundila amaswi yaakwe fino mwemwi mulumpepa mutammanyile!

²⁴ Leesa wino walengile insi na vyonsi fino vili mwenemo, wene kuno Mwene wi yulu ninsi, atakwikala un-ng'anda-zyi-Leesa zino zyakuzilwe uku makasa.

²⁵ Nga ataluombelwa nanti uku makasa ya antu, ungati alusita chimwi, kuno uwino alupa antu yoshi upuma nu kwesela ni ifintu vyonsi.

²⁶ Nawe wachisile antu yoshi ukufuma kuli wenga, kuti yikale un-nsi, ayankanya amanda yao aya kwikala, ayaputwila lwato wa mikalo yao.

²⁷ Kuti yasite Leesa, manye nanti uku kupalakasya-palakasya, yakamzana, nanti fino asi kutali na chila ntu wensi.

²⁸ ‘Kuno muli Wenewe sweswe tutenzi nu kupita, nu kuwa nupuma witu.’ Ndi fino kalunda wa myimbo umwi watasile: ‘Kuno swensi kwene swe ana yaakwe.’

²⁹ “Ichino ngi swe ana yi Leesa, chitazifile ukuti twelengule fino uleza ukoline ni zaabu nanti feza nanti finga, ifintu fino vyawazwa uku kumanya na mano ya antu.

³⁰ Ichino amanda ya kali ya kuntamanya, Leesa wasulanga kunti atalulola, leelo kasalaka wanena antu yoshi konsi yavipele.

³¹ Kuno wawika uwanda uno aluputwila akuno kunzi imilandu uku chumi, uku ntu wino wasolola, nawe wapa antu yoshi ichimanyisyo uku ifintu vi, kuno wamtutulwile uku yafwi.”

³² Walangi pano yapulika amaswi ya kututuluka uku yafwi, yamwi yasoweka, leelo yamwi yaati: “Tulukupulikisya kaili uku chintu chi.”

³³ Apano Paulo atina pano yali.

³⁴ Leelo yamwi yalemana nawe, yazumila, Dionisi mwAleopago walipo pali yao, nu mwananchi umwi, izina lyaakwe i Damali, na antu yamwi ponga nayo.