Milimo 14 - UPANGANO UPYA

¹ Nga chali uku Ikonio yingila ichaponga un-ng'anda yi Leesa iya aYudea, nga fino yavwanga, iumba ikulu ilya aYudea ni lya aGliki yazumila.

² Leelo aYudea yano yatasumile, yasongelekanya antu yakulukuwa, nu kuyalakalisya imyenzo chino chaipa uku yanina.

³ Nga ikala kweneko amanda tupu, angi yaluvwanga uku chiposye uku maka ya Mwene, wino wimikile iswi lyaakwe ilya nkumbu zyaakwe, nu kuyapa ivilangizyo ni vipezya-mano viombeke uku makasa yao.

⁴ Leelo iumba lya antu ya nzi lipalunkana. Yamwi yawile uku aYudea na yamwi uku mitume.

⁵ Apano akulukuwa na aYudea ponga na ikolo yao yayakatukila, kuti yayachite iviipe nu kuyatama na mafinga.

⁶ Nayo yachimanya yitukila uku Listela nu ku Delbe, imizi ya Likaonia, ninsi zya mbali mbali.

⁷ Ikala kweneko angi yalusunda iswi-zipe.

⁸ Nu ku Listela kwali untu umwi, waomboka, wikala itenda ukufuma unda i nyina, wino atachili apite nanti uche.

⁹ Untu wiyo wampulikisya Paulo lino aluvwanga; nawe wankundwila maaso, alola fino untu wiyo ali nusumilo wa kupoziwa.

¹⁰ Avwanga ukwiswi ikulu, ati: “Katuka uwimilile uku mulu yako!” Apano awimilila zuwa ampitana.

¹¹ Amaumba ya antu pano yalola chino Paulo wachita, yakuzya amaswi yao um-mvwango wa chiLikaonia, yaati: “Yaleza iyatwikila um-mwata wa antu.”

¹² Balanaba yaati, ali Zeusi, na Paulo, Yeme; kuno wali alikavwanga.

¹³ Kapela wi Zeusi wino ing'anda yaakwe yali uku nkolelo ya nzi, aleta intwazi ni nkata zya malua apa nnyango wilinga, asita ukufima ivipelo ponga na maumba.

¹⁴ Leelo imitume Balanaba na Paulo, pano yachimanya, yalepola imyenda yao, yituka ulwilo yaya ingila imwiumba, na kuno yaluma chongo,

¹⁵ yaati: “Yatata, uku chani muluchita chi? Neswe kwene sweswe yantu ndi mwemwe; tulumusunda iswi-zipe, ukuti musenuke nu kuta ifintu vi ivya uwelewele, museleukile kuli Leesa uwa upuma, wino walenzile iyulu ni nsi na yemba ni ifintu vyonsi fino vili mwenemo.

¹⁶ Wino amanda ya kali walekile antu ya misangano yoshi angi yalupita un-nzila zyao akola.

¹⁷ Leelo atautile nanti kuumanyisya, kuno wamuchitile ivizipe, angi alumutonyezya isemba ukufuma umwiyulu, nu mmacha, angi alwikusya imyenzo yino ichakulya ni nsânsa.”

¹⁸ Nu ku maswi yao yayalesya amaumba uku uchuzi, yatachiyapa ivipelo.

¹⁹ Leelo aYudea iza ukufuma uku Antiokia nu ku Ikonio, yasongelela amaumba, apalinji yatama Paulo na mafinga, yamkwesela ukunzi ya nzi, yatangi watafwa.

²⁰ Leelo alondeshi pano yalile iyannizya konsi, akatuka, asuwila umunzi. Nu wanda wa uwili afuma mwenemo, apita ponga na Balanaba, aya ku Delbe.

Paulo na Balanaba yasuwila uku Antiokia

²¹ Nga pano yasunda iswi-zipe umunzi uo, yapata alondeshi tupu, nga yawela uku Listela na ku Ikonio na ku Antiokia.

²² Angi yalukomya alondeshi imyenzo, nu kuyasunda ikale um-usumilo uo na fino tulungime ukwingila um-wene-wi-Leesa uku nzila ya machulo tupu.

²³ Nga pano yayasolwela akombe um-makongani yoshi, nu kupepa ponga na kuuzilizya ichakulya, yayawika um-makasa ya Mwene, wino yamzumile.

²⁴ Yapita insi ya Pisidia apakasi, yafika uku Pamfilia.

²⁵ Nga pano yasunda iswi liyo uku Pelge, yapita uku Atalia.

²⁶ Apa kufuma kweneko, yaakwela um-wato yaya uku Antiokia, nako ukuno yalombilwe inkumbu zyi Leesa uku nnimo ulye uno yamalilile.

²⁷ Nga pano yaya, yakonganika ikongani, yayalandila ifintu vyonsi fino Leesa waomba ponga nayo, na fino watayulila akulukuwa unnyango wa kuya um-usumilo.

²⁸ Yikala kweneko amanda yasi mache ponga na alondeshi.