Milimo 13 - UPANGANO UPYA

¹ Nu mwi kanisa uku Antiokia kwali amalau na yakasambilisha, nayo i Balanaba na Simeoni, wino yatangi Nigeli na Lusio wa ku Kilene, na Manaeni, wino yonkile iyele lyonga nu mwene Yelodi, na Saulo.

² Pano yalupepa uMwene nu kuzilizya ivyakulya, Mweso Nswefu waati: “Mpalwilini Balanaba na Saulo uku nnimo uno njitile.”

³ Nga pano yaluzilizya ukulya nu kupepa, yayawikila makasa apa mitwe yao, nga yayata, kuti yapite.

Mitume yasunda uku Kiplo.

⁴ Nga antu yao, pano yatumwa nu Mweso Nswefu, yapita ukuya uku Seleukia, ukuno yaakwela uwato ukuya uku Kiplo.

⁵ Nga pano yali uku Salami, yasunda amaswi yi Leesa un-ng'anda zyi Leesa izya aYudea. Yoane wali ponga nayo, angi aluyaombela.

⁶ Yapita apakasi um-mânda yoshi, yafika uku Pafo, yazana unnozi umwi, kalauzya wa ufi, mYudea, izina lyaakwe i Ba-Yesu.

⁷ Untu wiyo wali pipi nu nnâsi Segio Paulo, untu wa mano. Nga unnâsi wita Balanaba na Saulo yize kunali, asita ukupulika iswi li Leesa.

⁸ Leelo Elima unnozi wiyo, izina lyaakwe ndi lyasenulwa—apazyana nayo, asita ukuti azozye unnâsi wiyo, ukuti ate usumilo wa mweso wakwe.

⁹ Leelo Saulo, nawe uli Paulo, azyula Mweso Nswefu, ankundwila maaso,

¹⁰ ati: “We wazyula uchenjezu nuipe onsi, mwana wi Chiwa, siluembu wa chumi chonsi, utaluta ukunyonganika inzila zya Mwene zino zyololwike?

¹¹ Nga lola, ikasa lya Mwene lili panuli ukukuma, newe wampofula utachilola ilanzi uku manda yamwi.” Liyo kwene apofula, ichanda chimkupila, apalapasya nu kusita untu wa kunnema ikasa nu kumkolelela.

¹² Ngu nnâsi wiyo pano walola chino chaombeka, asumila, azunguka uku masambilisho ya Mwene.

Balanaba na Paulo uku Antiokia Pisidia

¹³ Nga Paulo na chakwe yaakwela uwato, yafuma uku Pafo, yafika uku Pelge um-Pamfilia. Yoane wayasya, wawela uku Yelusalemu.

¹⁴ Leelo wene yaatina uku Pelge, yafika uku Antiokia, unzi wa Pisidia. Uwanda wa Sabato yingila un-ng'anda iyi Leesa, yikala mwenemo.

¹⁵ Nga pano yasoma Ntambi ni chitabu cha malau, ayikolo ya ng'anda yi Leesa yatuma untu kuno yali, ayanena, ati: “Yachitu, ngi muli niswi lya kuzipila antu ya, vwangini.”

¹⁶ Apano Paulo awimilila wayasonizya, ati: “Mwe yatata ya mwIslaeli, nemwe yano mwachindika Leesa, pulikisyini.

¹⁷ Leesa wa antu ya Islaeli wasolwile yatata itu, ayakuzya antu yao, pano yikalanga wa yeni un-nsi ya Misili. Nga kaili akatusya ikasa lyaakwe, ayafumya nu kuyakolelela.

¹⁸ Imyaka amakumi yani angi ali ni chelelezi kuno yali undusanga.

¹⁹ Nga pano wonona inko saba un-nsi ya Kanani, ayapa insi yao kuti yapyanile.

²⁰ Uku myaka imyanda inni na makumi yasano pa chisila cha ifintu vi ayapa aputuzi ukufika na manda yi Kalauzya Samweli.

²¹ Pano yasita umwene, Leesa ayapa Sauli umwana wi Kisi, untu wa luko lwi Benyamini, uku myaka amakumi yani.

²² Na lino waatisya wiyo, akatusya Daudi uwino awe umwene wao, nawe uwino wamwimikile, ati: ‘Nalola Daudi umwana wi Yese, untu wino anzipile uku mweso wane, wino aluchita vyonsi fino nkasime.’

²³ Umwikwata lyaakwe wiyo, Leesa waletela aIslaeli Unkuluzi Yesu, ndi fino wayalainye.

²⁴ Lino achili awize kuno yali, Yoane walile wasunda ulubatizyo lya kuvipela, kuli yoshi ya mwIslaeli.

²⁵ Yoane nawe pano wamala manda yaakwe, avwanga, ati: ‘Mulungelengula fino nene wini? Nene insi wenewe; leelo lolini, alwiza umwi uku chisila chane, wino ntalingine nu kusapula imikowa ya nfwato zya ku mulu yaakwe.’

²⁶ “Yachane, ana yikwata li Ablaamu, nemwe yano mwachindika Leesa, iswi lya ufyusi lyatumilwe ukwiza kuno tuli sweswe.

²⁷ Kuno yano yatenzi uku Yelusalemu na ikolo yao yatamanyile wiyo, leelo amaswi ya malau yano yalusomwa chila wanda wa Sabato, yayafikilizya uku kumputwila ukufwa.

²⁸ Nanti fino yatawine unnandu wa kumumola, leelo yalomvile kuli Pilato, kuti yamumole.

²⁹ Nga pano yamala vyonsi fino waandikilwe, yamwisya uku chiti chiyo, yamwika umwilindi.

³⁰ Leelo Leesa wamtutulwile uku yafwi.

³¹ Aloleka amanda tupu kuli yano yapisile nawe ukufuma uku Galilea fika nu ku Yelusalemu, yano uku kasalaka ali yasyuta yaakwe apa maaso ya antu.

³² Neswe tulumsunda iswi-zipe lya ulanyo ulye kwene, uno yatata yapilwe.

³³ Vino Leesa wayafikilizizye ana itu ulanyo uo, kuno watutulula Yesu ndi fino chaandikwe un-Sabuli ya uwili: ‘Wewe uli mwanane, nene ilelo nakuvyala.’

³⁴ Na kaili fino wamtutulwile uku yafwi, kuti atawelela ukuola, avwanzile, ati: ‘Mwemwe namupa ifintu viswepe ivyi Daudi ivya kutailwa.’

³⁵ Ichino avwanzile na panina, ukuti: ‘Utaluleka unswepe wako aole.’

³⁶ Kuno Daudi waombelanga Leesa ningo apa manda yaakwe, pa mpanda wakwe, walala undufu, azyikwa ponga na yaisi, wazana ukuola.

³⁷ Leelo wino watutulwilwe na Leesa, atatana zane ukuola.

³⁸ Ichino chimanyike kuli mwemwe yachane, fino kuli wiyo mulusundwa uwelelo wa maifyo.

³⁹ Na kaili kuli wenewe wino azumile akulwalilwa ichumi uku ifintu vyonsi fino atangi awalilwe ichumi uku Ntambi yi Mose.

⁴⁰ Ichino fiyo chenjelini mwemwe, vitamwizila fino vyandikwe na malau:

⁴¹ ‘Lolini mwe yano mulusula, zungukini mulowe; kuno nduomba nene unnimo apa manda ino, unnimo uno mutali muuzumile nanti uche, nantu ntu angalandisya kuno muli.’ ”

⁴² Nga pano yafumanga yayalomba, kuti kuche yasome kaili amaswi ya wanda wa Sabato unina.

⁴³ Nga pano yano yali un-ng'anda yi Leesa yasansantika, aYudea na alondeshi yao, yano yachindika Leesa, yalondekana na Paulo na Balanaba, yano pano yavwanga nayo, yayachinchizya, kuti yalande un-nkumbu zyi Leesa.

⁴⁴ Uwanda wa Sabato wa uwili antu tupu kwela unzi wonsi yakongana, yapulika iswi lyi Leesa.

⁴⁵ Leelo aYudea pano yalola maumba, yazyula uzuwa, yakana maswi yano yavwanzilwe na Paulo, angi yalupazya nu kusula.

⁴⁶ Leelo Paulo na Balanaba yavwanga uku chiposye, yaati: “Chalingine kuti iswi li Leesa litane lilandwe kuno muli; leelo kuno mwalitenkela ukutali, nu kuulola fino mutaine nupuma wa manda ti, lolini, twaseleukila uku akulukuwa.

⁴⁷ Kuno ifino utunenwa nu Mwene, ukuti: ‘Nakuwika uwe mwengelela wa antu yakulukuwa, kuti uwe wa ufyusi fika na kuno insi yapela.’ ”

⁴⁸ Akulukuwa pano yapulika ifintu vi, yachimba, yatensya iswi lya Mwene; na yoshi yano yateyanyiwa upuma wa manda ti, yasumila.

⁴⁹ Iswi lya Mwene lyalimba insi ilye yoshi.

Yapita uku Ikonio ni Listela ni Delebe

⁵⁰ Leelo aYudea yatuwanya anachi yachindamu yano yachindika Leesa, na ikolo ya nzi, yasongelekanya antu, kuti yachuzye Paulo na Balanaba, yayaatisya muli lwato wao.

⁵¹ Nayo yakung'unta inkungu ya ku mulu yao, yapita uku Ikonio.

⁵² Na londeshi yashula ukuchimba na Mweso Nswefu.