Milimo 11 - UPANGANO UPYA

Petlo aluufwangila apa milimo yaakwe

¹ Ngi mitume na chao yano yatenzi uku Yudea, yapulika fino akulukuwa nayo kwene iyapokelela iswi lyi Leesa.

² Nga Petlo pano wapisile ukuya uku Yelusalemu, yano yachitwa ichibalu yapazyanya nawe.

³ Yaati: “Waile uku antu yano yatachisilwe ichibalu, walya nayo.”

⁴ Leelo Petlo atampa ukuyalandila ukuyalolola ningo, ati:

⁵ “Nali umunzi wa Yafa, ndupepa, umweso wane wapita akashe, indola amalele; ichivya chilwika wa mwenda nkulu chilwika ukufuma umwiyulu uku masempela yaakwe yani; changikila.

⁶ Nachilolekesya nkani, nelengula, nalola inkala zya kuno ukunzi, izili na mulu yani, ni vikangu vya nchundu, ni vikulusela, ni vyuni fino vikulelemba.

⁷ Napulika iswi lilunena, liluti: ‘Katuka Petlo, ufyule, ulye!’

⁸ Nene nati: ‘Awe Mwene, kuno ichintu chino chaipa nanti chino chaziliziwa chitachili chiye umu nnomo wane nanti uche.’

⁹ Iswi lyanena ilya uwili ukufuma umwiyulu, lyaati: ‘Vino Leesa wazilula, utachiti vyakulyikizya.’

¹⁰ Ichintu chi chachitika amaila yatatu; apalinji ifintu vyonsi vyaakweselwa kaili umwiyulu.

¹¹ Nga lolini, liyo kwene antu yatatu yimilila apa ng'anda muno twali, yano yatumwa kunondi ukufuma uku Kaisalia.

¹² uMweeso wannena ukuti ndondekana nayo nanti kopa. Alaya achane sita yapita ponga nene, twingila un-ng'anda ya ntu wiyo.

¹³ Watulandila fino wawine malaika wino wimilile un-ng'anda umwakwe, wannena, waati: ‘Tuma antu yaye uku Yafa, yakite Simoni wino yakuluti: Petlo.

¹⁴ Wino wankunena amaswi yano yankufyusya wewe ni ng'anda ko yoshi.’

¹⁵ Pano natampa ukuvwanga uMweeso Nswefu waikila ndi fino watwikile neswe apa ntangulo.

¹⁶ Niusya iswi lilye ilya Mwene, fino wavwanzile, ati: ‘Umwenemo Yoane wabatishanga uku manzi, leelo mwemwi mulubatiziwa uku Mweso Nswefu.’

¹⁷ Ali ndi Leesa wayapa uwila wuwu kwene, ndi fino watupile sweswe, yano twazumila uMwene Yesu Klisto, nene wini wino mpingule Leesa?”

¹⁸ Pano yapulika amaswi yao yatuzya, yatensya Leesa, yaati: “Fwandi Leesa watayapa akulukuwa nayo ukuvipela kuno kululeta upuma.”

Balanaba na Saulo yapita uku Antiokia

¹⁹ Ichino yano yasambazile uku nnandu wa uchuzi uno wakatukile pali Stefano, yapisile yafika uku Foiniki nu ku Kiplo nu ku Antiokia. Yatasunzile apiswi liyo, siku uku aYudea sile.

²⁰ Leelo yamwi pali yeneyo yali antu ya ku Kiplo ni Kilene, nga wene pano yafika uku Antiokia, yavwanga na aGliki, angi yalusunda iswi-zipe lya Mwene Yesu.

²¹ Ikasa lya Mwene lyawa ponga nayo, antu tupu yazumila yaseleukila uku Mwene.

²² Impwepwe zya antu yao zipulikikwa uku makutwi yi kanisa lya ku Yelusalemu. Yatuma Balanaba ukuti aye uku Antiokia.

²³ Nawe pano waya nu kulola inkumbu zyi Leesa, achimba, ayachinchizya yoshi yalemane nu Mwene uku kukunda kwa mweso.

²⁴ Kuno wali ntu nzipe wazyula uMweeso Nswefu nusumilo. Niumba ikulu lyungiliziwa uku Mwene.

²⁵ Nga atina kweneko aya uku Talso ukusita Saulo. Na pano wannola, anneta uku Antiokia.

²⁶ Nga uku mwaka mpuma yakonganaa ponga ni kanisa nu kusambilizya antu tupu. Na alondeshi apano yatangwile ukwitwa. “Aklisto” apa Antiokia.

²⁷ Amanda yao kwene amalau yapisile ukufuma um-Yelusalemu, yaya uku Antiokia.

²⁸ Wenga pali yeneyo, izina lyaakwe i Agabo, awimilila, alauzya uku maka ya Mweso Nswefu, fino inzala inkulu ilupona insi yoshi. Nayo yalolike apa manda yi Kalaudio.

²⁹ Nga alondeshi yao yasolola ukwazwilizya anina yao yano yatenzi uku Yudea, ukulingana na maka yi chila ntu.

³⁰ Yachita ndikuti fiyo kwene, yatwalila ayikolo uku makasa yi Balanaba na Saulo.