Milimo 10 - UPANGANO UPYA

Petlo na Koloneli

¹ Kwali untu umwi uku Kaisalia, isina lyaakwe i Koloneli, unkulu wiumba lya asalifi ya Italia,

² untu unchindamu, wa chopo kuli Leesa na ya ng'anda umwakwe yoshi, nawe wali nuwila tupu uku yantu, wapepanga Leesa manda yoshi.

³ Pano lyatemba alola amalele apatiswe, amalaika wi Leesa alwiza nu kunnena, ati: “Koloneli!”

⁴ Annolekesya, aopa nkani, ati: “Kwawa chani, Mwene!” Annena, ati: “Ukupepa kwako nuwila wako vyafika umwiyulu, mwizu kuli Leesa.

⁵ Ichino tuma antu uku Yafa, uwite Simoni wino yakuluti Petlo,

⁶ umweni wa ntu umwi, isina lyaakwe i Simoni, kanyuka wa mikwela, wino ing'anda yaakwe ili pipi na yemba.”

⁷ Malaika wiyo wino wavwanzile nawe, pano wapita, Koloneli awita yamwi yaili apa yaomvi ya un-ng'anda yaakwe nu nsalifi wenga, untu wa nchishi kuli Leesa uwa pali yano yammombelanga manda yoshi.

⁸ Na pano wayalandila ifintu fyoshi, wayatuma uku Yafa.

⁹ Ngu wanda wa uwili pano yapitanga angi yapalamila unsi, Petlo akwela apidali ukuyupepa, nao wali unsanya pakasi.

¹⁰ Insala imwaya nkani, asita ukulya; leelo pano vachili yateyanya chimwi, umweso waakwe upita akazye.

¹¹ Alola iyulu lyayulika, ni chivya chilwika wa mwenda unkulu, ulwikisiliwa uku masempele yaakwe yani fika na pansi.

¹² Uno mwenemo mwali inyama ni fikalakasi fyoshi ifya mulu yani, na fino vikulusela ni fyuni ifikulelemba.

¹³ Ngiswi lisa kunali, liti: “Katuka Petlo, ufyule, ulye!”

¹⁴ Leelo Petlo ati: “Awe Mwene, kuno ntachilindye nanti uche ichintu chimwi chino chaipe, nanti chino chikulyikisha.”

¹⁵ Iswi lyamwisile ilya uwili, lyaati: “Vino Leesa wasilula wemwi utachiti ifisilishe.”

¹⁶ Ichintu chi chachitika amaila yatatu, apa chisila ichifya chiyo chapokelelwa kaili umwiyulu.

¹⁷ Nga Petlo pano channowana um-mweso wakwe, ichili chani amalele yao, yano walola, antu yalye yano yatumilwe na Koloneli, pano yatondosya ing'anda yi Simoni, yimilila pa nnyango.

¹⁸ Yalaizya yatondosya, ndi Simoni wino yakuluti Petlo ngu muno alwikala.

¹⁹ Nga Petlo welengulanga amalele yao, uMweeso wannena fino: “Kuli antu yaili yalukusita.

²⁰ Ichino katuka uwike, ulondekana nayo, utachopa, kuno inene njatumile.”

²¹ Petlo awika uku yantu yao, ati: “Nene ndi wino mulunsita. Mwizile chani?”

²² Yaati: “Koloneli unkulu wa yasalifi, untu wa chumi, wa chopo kuli Leesa; wino antu yoshi um-Yudea yamchindika; wanenilwe na malaika nswepe ukutuma antu kunuli, uye uku ng'anda ukwakwe, ukuti akapulikisye amaswi kunuli.”

²³ Ayapokelela, ayasezya. Nu wanda wa uwili Petlo afuma apita ponga nayo, na yamwi apa yachitu yano yatenzi uku Yafa yalondekana nawe.

²⁴ Uwanda wa uwili yafika uku Kaisalia. Na Koloneli wayalolelanga, walile atita a luko lwakwe na ankula nachakwe.

²⁵ Pano Petlo alwingila, Koloneli afuma ukunkomanya, amfukamila nu kwinamila apa mulu yaakwe.

²⁶ Leelo Petlo amkatusya, annena, ati: “Wimilila, nene kwene nene ntu.”

²⁷ Nga pano aluvwanga nawe awingila un-ng'anda, alola antu tupu iyakongana.

²⁸ Nga ayanena, ati: “Nemwe akola mumanyile fino untu wino mYudea atangi auminkanye na antu yanji nanti ukuya kunali. Leelo Leesa atandanga fino ntangi ntake untu umwi fino uwa kulukuwa nanti uwa kukowezya.

²⁹ Ichino fiyo ngizile pano nitwa nanti kukana. Nga ndumutondosya, iswi uli lino mungitile?”

³⁰ Nga Koloneli ati: “Ilelo uwanda wa uni ukufuma lino napepaa Leesa un-ng'anda umwane, pano lyatemba. Liyo kwene untu umwi awimilila panondi, azwite imyenda ilumesamesa.

³¹ Nawe ati: ‘Koloneli, ukupepa kwako kwapulikikwa, na mawila yako yelengulwa apa maaso yi Leesa.

³² Ichino tuma antu yaye uku Yafa, yakite Simoni wino yakuluti: i Petlo; afikile un-ng'anda mwi Simoni kanyuka wa mikwela, umbali yi yemba.’

³³ Ichino liyo kwene nakutumila; wachita chino chazipa ukwiza. Ichino swensi tulipo pa apa maaso yi Leesa, kuti tupulikisye amaswi yoshi yano unenilwe nu Mwene.”

³⁴ Petlo avwanga, ati: “Chumi, namanya fino Leesa asi nu nsumbo,

³⁵ leelo ali apa antu yoshi, nguntu wensi wino amchindike nu kuchita ivya chumi, akuluzumilwa nawe,

³⁶ kuyana niswi liyo lino watwalile ana ya Islaeli, angi alusunda iswi-zipe ilya kuwelezyana muli Yesu Klisto. Alu Mwene wa antu yoshi.

³⁷ Ichintu chiyo muchimanyile mwemwi, chino chalimba um-Yudea onsi, ukufuma uku Galilea, ichisila cha lubatizyo luno Yoane wasundanga.

³⁸ Amaswi yi Yesu wa ku Nazaleti, fino Leesa wampakile amafuta uku Mweso Nswefu na maka; nawe walîlanga ku na ku, angi aluomba imilimo mizipe, nu kupozya yoshi yano yaluchuziwa na chiwa; kuno Leesa wali ponga nawe.

³⁹ Neswe tuli yasyuta ya ifintu fiyo vyonsi, fino waomvile umunsi ya Yudea num-Yelusalemu. Wino yumozile yansamika uku chiti.

⁴⁰ Wene Leesa wamtutulwile uwanda wa utatu, amtuma kuti aloleke;

⁴¹ asu ku antu yoshi, leelo kuli yasyuta yano yalile yasololwa na Leesa, alu sweswe, yano twalyanga nu kunwa ponga nawe ichisila cha kututuluka kwakwe ukufuma uku yafwi.

⁴² Atutuma tusundile antu nu kwimikila fino wiyo kwene uwino wimikwe na Leesa awe Umputuzi wa milandu ya apuma nafwi.

⁴³ Uwino amalau yoshi yalwimikila, fino ukwizina lyaakwe wensi uwa mzumila, apokelele ukwelelwa kwa maifyo.”

⁴⁴ Pano Petlo achili aluvwanga amaswi ya, uMweeso Nswefu uikila yoshi yano yalipulikisyanga iswi liyo.

⁴⁵ Na yano yazumila yano yachitwa ichibalu, yazunguka, antu yoshi yano yizile ponga na Petlo, kuno akulukuwa nayo kwene iyitililwa uwila wa Mweso Nswefu.

⁴⁶ Kuno yayapulike yaluvwanga imivwango mipya nu kutensya Leesa. Apano Petlo waati:

⁴⁷ “Uwini wino angalesya amasi, yatabatiziwa ya, antu yano yapokelela uMweeso Nswefu ndi fino sweswe kwene?”

⁴⁸ Alanda kuti yabatiziwe ukwizina lyi Yesu Klisto. Nga yampapata, kuti awikale kweneko amanda yamwi.