Mateo 9 - UPANGANO UPYA

Witeenda wapiozwa

¹ Awingila um-waato nga alaamba, aya ukutilea wa kumwao.

² Nga lolini, yanndetela untu wikali teenda, awiishi apa chitala. Yesu pano walola usumilo wao, aneena wino wikala itenda, ati: “Teka umweso, mwanane, welelwa amaifyo yaako.”

³ Nga lolini, yakaandika yamwi yafwaanga um-myeeso yao, yati: “Alawi, alusula Leesa.”

⁴ Nga Yesu fino wamanyile ameleengushi ya myeeso yao, ati: “Uku chaani mulwelengula ifiyiifu um-myeeso yiino?

⁵ Kuno ichangupasu ichilikwi, ukuti: ‘Weleelwa amayiifyo yaako,’ naanti ukuti: ‘Katuka, upite?’

⁶ Leelo kuti mumanye fino uMwaana-ntu ali na maaka kuno ukuushi aya kweleela amaifyo, aneena uwi tenda, ati: Katuka uutwiike ichitala chaako, upite uku ng'anda ukwaako.”

⁷ Akatuka, apita uku ng'anda ukwaakwe.

⁸ Nga amaumba pano yalola ifiintu fiyo, ingofi shayalema, yateesha Leesa wino wapiile aantu amaka ndi yao.

Mateo wiitwa

⁹ Nga lino Yesu alupita ukufuma kweneko, alola untu ishiina lyakwe i Mateo, ateesi apa folosani, wannena, wati: “Ndondela.” Nga wakatuka, wanndondela.

¹⁰ Nga pano wikala un-ng'anda, kuti alye ichakulya, lolini, yakalifya yikodi tupu na yamaifya yisile ikala poonga na Yesu na alondeshi yaakwe.

¹¹ Afaliseo pano yalola fiyo, yanena alondeshi yaakwe, yati: “Kuno ichaani Kasambilisha wino alulya poonga na yakalifya yikodi na yamaifyo?”

¹² Nawe pano wapulika, ayaneena, ati: “Apuma yatangi yashite sing'anga, nkambi alwale.

¹³ Leelo pitaangi mukasambilile ichaani amaswi ya: ‘Ndushita ukukumbukila; ntalushita ifipelo.’ Kuno ntisilu wita ayakapanga, leelo ayamaifyo.”

Kuushilisha ifyakulya

¹⁴ Apano alondeshi yi Yoane yayiile kuno alii, yati: “Uku chaani kuno sweemwi na aFaliseo tuluwushilisha iyakulya, leelo aloondeshi yaako poole?”

¹⁵ Yesu ayaneena, ati: “Yano yalalikwe uku wiinga, yangaloosha uli lino siwinga ali poonga nayo? Leelo amaanda yalwisa yano yalutisiwa siwiinga, apano yaluwushilisha.

¹⁶ Kuusi untu wino akuteela ichilaka cha mweenda umpya uku mweenda wa kali, kuno chino wateela, chilulepula pooshi pano wasuma, na pano palepuka apasha apakwa.

¹⁷ Naanti aantu yasutela amaasi ya misabibu un-nyiingu sha kali, na ndi yateela, inyiingu shiyo ishilepuka, na maasi ya misabibu yitika ni nyiingu shononeka; leelo yakulutela maasi mapya ya misabibu un-nyiingu mpya, shoonsi ishikôsheka niingo.”

Mwana-kachi wi Yaifo na mama wino washwaanga uwaashi

¹⁸ Pano achili aluyalandila ifiintu fiyo, lolini, yumbe umwi awisa, anfukamila ati: “Umwaanane kachi wafwa li kweene li, leelo tuye ukambwikile ikasa lyaako, nawe akupola.”

¹⁹ Nga Yesu akatuka, alondekana nawe, poonga na alondeshi yaakwe.

²⁰ Nga lolini, umwanachi umwi waali nu lwaale wa kuswa uwaashi, imyaka ikumi na yiili, awisa lwa ku chisila, awemya isempele lya mweenda waakwe,

²¹ Kuno um-mweeso waakwe watile: “Ngi nemya isempele lya mwenda wakwe sile, nampola.”

²² Nga Yesu aseleuka anndola, anneena, ati: “Teka umweeso, kachi waane, ukusumila kwaako kwakuposha.” Umwanachi wiyo apola ukufuma liyo kweene.

²³ Yesu lino wafika uku ng'anda kwi yumbe wiyo, alola yano yaluma mwiilwa, na maumba ya antu yaluloosha.

²⁴ Wayaneena, waati: “Fumini, kuno unsuungu atafwile, awiisi sile.” Yansekela nkaani.

²⁵ Leelo pano wawinga iumba, awingila, anndema ikasa lyaakwe, unsuungu wiyo akatuka.

²⁶ Nga amaswi ya chintu chi yalumbuka iisi yiilye yooshi.

Yesu waposha apofu na chinuunu

²⁷ Nga pano Yesu wapitaanga ukufuma kweneko, apofu yaili yanndondela, angi yalwaangula yaluuti: “Utukumbukile, mwaana wi Daudi!”

²⁸ Nga pano wingila un-ng'anda, apofu yao yaya kunaali, nga Yesu wayaneena, waati: “Musumile fino ngaomba ichintu chi?” Yaati: “Endita, Mweene.”

²⁹ Apano wayeemya amaaso yao, afwaanga, ati: “Ndi fino musumile ifino chiwe.”

³⁰ Amaaso yao yayulika. Nga Yesu ayaneena uku maka, ati: “Mulole niingo untu umwi atamanya!”

³¹ Leelo yafuma yaliifya amaswii yaakwe un-nsi yiilye yooshi.

³² Nga pano yao yalufuma, lolini, yanndetela untu chinuunu ali ni ichiwa.

³³ Pano ichiwa chiyo chawingwa, chinuunu wiyo afwaanga. Amaumba yasunguka, yaati: “Um-Islaeli tutachili tulole naanti limwi!”

³⁴ Leelo aFaliseo yaati: “Uku maka ya wikolo wa fiwa aluwiinga ifiwa.”

Inkuumbo shyi Yesu uku yaantu

³⁵ Yesu nawe walilaanga um-misi yooshi nutusi, angi alusambilisha un-ng'anda shao ishi Leesa, nu kusuunda iswi-isiifu lya weene, nu kuposha indwaala shooshi ni mboombo shooshi.

³⁶ Nga pano walola amaumba, ayalolela inkuumbu, kuno yalile iyatoonta nu kusambaala wa fweele shino shitakwiite unchemi.

³⁷ Apano wayaneena alondeshi yaakwe, waati; “Imboto ilipo, leelo aomfi yachepa.

³⁸ Ichino pepini uMweene wa mboto, atwaale aomfi uku mboto yaakwe.”