Mateo 8 - UPANGANO UPYA

Yesu waposha untu wa ntana

¹ Nga pano watentenka um-mwaamba, amaumba tupu yanndondela.

² Nga lolini, awiisa untu wa ntana, anfukamila, ati: “Mweene, ndi ukasi, ungansweefya.”

³ Nga Yesu aolola ikasa amwemya, ati: “Nkasi, usweepe.” Nga liyo kweene intana yaakwe insweepa.

⁴ Nga Yesu annena, ati: “Ulole utaneena untu naanti umwi; leelo pitaanga ukaulaange kuli kapela, ukafima isamaalisho ndi fino Mose watashile, iwe ushuuta kuno yali.”

Yesu waposha momvi wa wikolo wa salifi

⁵ Nga pano wingila um-Kapenaumu, unkulu wa yasifi umwi awisa kunalii,

⁶ apapata, ati: “Mweene, umuofi waane undwaale wikali tenda, aluwaika nkaani.”

⁷ Yesu annena, ati: “Namwisa mposhe?”

⁸ Unkulu wa asalifi wiyo wannena, waati: “Mweene, ntaine kuti weewe ungiza uku ng'anda ukwaane, leelo laanda iswii lyoonga sile, nu momfi waane wampola.

⁹ Kuno neene kweene neene ntu ntumwa ndi nasalifi; ngi naneena umwi, nati: ‘Pita!’ apita; nawi: ‘Nguna!’ awisa; nunsha waane: ‘Omba fi!’ aomba.”

¹⁰ Yesu pano wapulika amaswi ya, asunguka, aneena yano yanndondile, ati: “Umwenemo, ndumuneena: Ntachili ndole ukusumila nkaani ndi ku kuli weeshi um-Islaeli.

¹¹ Neemwi ndumuneena fino ainji yalwisa ukufuma uku kafuma ndaaka nu ku kawa ndaaka, nayo yalwikala poonga na Ablaamu na Isaka na Yakobo um-wenewa-mwiyulu.

¹² Leelo ana ya weene yalusumbilwa ukufika un-chaanda; kweneko ukuluwa ukulila ku kuchecheta amiino.”

¹³ Nga Yesu aneena unkulu wa asalifi, ati: “Pitaanga, fino usumile ifino chiombeke.” Umuofi waakwe apola liyo kweene.

Antu tupu yaposiwa

¹⁴ Nga lino Yesu waya uku ng'anda kwi Petlo, asaana nyinafyala wi Petlo, nyina wa nchi, awiisi apa chitala undwaale isuushi.

¹⁵ Amwemye ikasa, isuushi isiila, nawe akatuka ukuyaombela.

¹⁶ Na pano yawa mangushi, yannletela ainji aya fiwa. Awiinga ifiwa ukwiswii lyaakwe, aposha yooshi yano yalwiile.

¹⁷ Kuti liwe lino lyafwansilwe na kalausha Isaya, ukuti: “Unkola watoshile imbombo shiitu, aseenda ni ndwaala shiitu.”

Kulondela Yesu

¹⁸ Nga Yesu pano walola iumba lyanndisha, alaanda kuti yalaambe ukuya umbalama.

¹⁹ Kaandika weenga aya kunah, anneena, ati: “Kasambilisha, nankulondela kooshi kuno waya.”

²⁰ Yesu annena, ati: “Yankusa yali na machele, ni fyuuni fya mwiyulu fili ni fisaanzo, leelo Mwana-ntu atakwiite naanti apa kusamila untwe waakwe.”

²¹ Umwi apa alondesha yaakwe wannena, wati: “Mweene, ntane nkashike tata.”

²² Leelo Yesu annena, ati: “Ndondela, leka afwi yashiikane.”

Yesu wamyalasha chipupu pali yeemba

²³ Akwela um-waato, alondeshi yaakwe yanndondela.

²⁴ Ngi ipuunga ikulu likatuka muli yeemba, apalinji amawimbi yakupikishu wato, wene wawisi utulo.

²⁵ Apano yaya yanndansha, yati: “Mweene, tutule, twafwa!”

²⁶ Ayaneena, ati: “Nga fino muli ni ngofi, mwe ya usumilo uche?” Akatuka liyo kweene, akalipila unsa na yeemba, kuwa chele.

²⁷ Na antu yazunguka, yati: “Ngu ntu wi ali uli, wino ipuunga na yeemba filumpulika?”

Yesu waposha antu yaili a fiwa

²⁸ Nga pano wafika umbalama un-nsi ya a Gadala, aantu yaili aya fiwa yakomeengine nawe; yafuma uku malindi, yakalipa leka, kuushi umwi wino angapita isila yiyo.

²⁹ Nga lolini, yuma ichoongo, yati: “Tuli na chaani neewe, mwaana wi Leesa? Cheene! Uwishile ukwisu kutuchusha, amaanda yitu yachili yafike?”

³⁰ Nga kwaali ufyo wi yakapoli yalulya lwapatali.

³¹ Ifiwa fyampapata, fyaati: “Ngi watuwinga utute tukingile um-ufyo ulye uwi yakapooli.”

³² Nga afinena, ati: “Yangai!” Nga fifuma fingila muli yakapoli; nga ufyo wooshi utentenkela uku lwilo muli yeemba, yanweela.

³³ Weene achemi yitwike ulwilo ukuya ukufika, yalaanda fyooshi, ni fya kuli yaya aya fiwa kweene.

³⁴ Nga lolini, unsi wooshi wafuma ukuyukomaanya Yesu, nga pano yanndola, yampapata kuti atiine un-nsi yao.