Mateo 7 - UPANGANO UPYA

uKuyangwiila Ayaanji

¹ “Mutachiputula, kuti neemwe mutachi muputwiilwe.

² Kuno uputushi uno muluputula, ifino neemwe kweene muluputwiilwa; ni chilingilo chino mululingila, ichino neemwe kwene mululingilwa.

³ Ali nga fino ululola ichikoona chino chili umwiliisho lya nnyoonko, ni imbao lino lili umwiliisho lyaako wenkola utalulilola?

⁴ Naanti unganeena unnyoonko uli, uti: ‘Leka inchitiishe ichikoona chino chili umwiliisho lyaako?’ Na kuno umwiliisho lyaako kweene muli iboliti?

⁵ Wa ufi we, tangula fumya iboliti liyo lino lili umwiliisho lyaako wenkola, apano ungalola niingo ukutisha unnyoonko ichikoona, chino chili umwiliisho lyaakwe.

⁶ Mutachipa imbwa ichisweepe, naenti ukusumbi lulu shino pali yakapooli; yatiise yashilyatoole na amakuulu yao, yasenuke nu kumumoola.

uKupulikwa Amapepo

⁷ “Lombini, neemwe mwapiiwa; sitini, neemwe mwanchisaana; kong'onshini, neemwe yamuyulila.

⁸ Kuno weeshi wino aluloomba, akupiiwa; wino alushita, akuchisaana; na wino alukong'onsha, akuluyulilwa.

⁹ Naanti kuli umwi kuli mweemwe, wino ndi umwanaakwe waloomba iishima, angampo ifiinga?

¹⁰ Naanti ndi waloomba iswi, nawe angampa iisoka?

¹¹ Ali ndi mweemwe muli yayiifu, mwamanya ukuyapa aana yiino ifiintu ifisiiifu, Cheene! So wino uwa mwiyulu atangayapa ifisiifu nkaani yao yano yalundoomba?

¹² Ichino fiyo fyooshi fino mulushita muchitilwe na aantu, neemwe muyachitile fiyo kweene; kuno fiyo ali Tolati na malau.

Imilyaango yiili

¹³ “Ingilini apa nndyaango ufyenkanu; kuno unndyaango unsalasu ni isila isaalazu iyiile uku wonooni, na yano yalwingila uku nndyaango uo ainji.

¹⁴ Kuno unndyaango ufyenkanu ni isila ifyenkanu iyiile uku upuma, nayo yano yailondela, yali yache.

¹⁵ “Chenjelelini malau yaufi, aantu yano yalumwisila yaswiite imikweela ya fweele, leelo unkashi, fwaandi, angi imiyiishi mikangu.

¹⁶ Muluyamanva uku ivisêke fyaao. Cheene! aantu yakulushikula imisabibu um-myoonga, naanti masamasaafu kuli sokolo?

¹⁷ Ifiyo kweene chila chiti chisiifu chikusêka ivisêke fisiifu ni chiti chisiifu chikusêka ivisêke ifisiifu.

¹⁸ Ichiti chisiifu chitaangi chifyaale ifisêke fiipe, naanti ichiti chiipe chitaangi chifyaale ifisêke fiyifu.

¹⁹ Ichiti chooshi chino chitalusêka ifisêke fisiifu, chikulukomwa nu kusumbilwa um-mooto.

²⁰ Ichino uku fisêke fyaao muluyamanya.

²¹ “Asi chila ntu wino aluuti: ‘Mwene, Mweene,’ uwino alwingila um-weene-wa-mwiyulu; leelo wino aluchita fino akasime Tata waane uwa mwiyulu.

²² Ainji yalunneena uwaanda ulye; ‘Mweene, Mwene, tutalawizye ukwishiina lyaako, nu ukwishina lyaako akutisha ifiwa, nu ukwishina lyaako kuchita ifipesha-maano tupu?’

²³ Apano nduyaneena apatiswe, ukuti: ‘Ntamumanyile mweemwe naanti uche; tinini kunondi, mwe yano muluchita ifiyiifu.’

Yakakula yaili

²⁴ “Ichino wino wapulika amaswi yaane yao nu kuyalema, alukolana nu ntu wa maano wino wakuushile ing'anda yaakwe apa mafinga.

²⁵ Iseemba yatoonya, unndamba wiisa, nunsa wakatuka, wapuunga ing'anda ilye naanti kupona, kuno ichiimbili chaakwe chakulilwa api paampa.

²⁶ Na chila ntu wino wapulika amaswi yaane yao atayalema, alukolana nu chiwiila wino wakushile ing'anda yaakwe apa miseenga.

²⁷ Iseemba yatoonya na nndamba wiisaa nunaa wakatuka, wapuunga ing'anda ilye, yapona; nu kupona kwaakwe ukulongoloka pyu.”

²⁸ Pano Yesu wamaliila amaswi yao, amaumba yasunguka leka uku masambilisho yaakwe.

²⁹ Kuno wayasambilishanga wa ntu wino ali na amaka, asi ndiwi yakaandika yao.