Mateo 6 - UPANGANO UPYA

Kufiima uwiila

¹ “Lolini niingo; mutachita usiifu wiino apa maaso ya yaantu, kuti yamulole; kuno ndi mwachita ndi fiyo, mutalupiiwa unnambu kuli So wino wa mwiyulu.

² “Ichino weemwi, pano ulufiima amawiila, utachuuma imbila, ndi fino yaufi yakuchita un-ng'anda shaao ishii Leesa nunnsila, kuti yateshiwe na aantu.

³ uMwenemo ndumuneena, yaati yapokelela unndambu wao. Leelo weemwi pano ulufiima amawiila, naanti ikasa lyaako lya kuli kamani litachimanya chino ikasa ilya kwiluunji liluomba.

⁴ Uwila waako uwa ufiso; na So wino alulola uku nfiso, alukupa unndambu.

Apa kupepa

⁵ “Kayili pano mulusaalika, mutachikolana na yaufi, kuno weene yakuunda ukusaalika aangi yimiliile un-ng'anda shii Leesa nu masansa ya sila, kuti yaloleke na aantu. uMwenemo ndumuneena, fino yati yapokelela unnambu wao.

⁶ Leelo weemwi, pano ulusaalika, ingila un-ng'anda unkasi, na ndi wayaala undyaango waako, usaalike pali So uku ufiso; na So wino alulola uku ufiso, alukupa unnambu.

⁷ Neemwe ndi mulusaalika, mutachi laoka-laoka, ndi fino akulukuwa; kuno yao yakulweleengula, fino yampulikikwa uku wiinji wa maswi yao.

⁸ Ichino mutachikolana nayo; kuno So wino amanyile chino mulusita naanti muchili munndoombe.

⁹ Ichino mwemwi musaalika fi: ‘Tata witu wino alu umwiyulu. Ishina lyaako liteshiiwe. Uweene waako wiise.

¹⁰ Finukasi fiombeke, pano apaasi ndi fino umwiyulu.

¹¹ Utupe ichakulya chiitu chi leelo,

¹² Utweelele amaifyo yiitu, ndi fino neeswe kweene twelela yano yatuifya.

¹³ Utatutwala um-mazosyo, leelo tukulule nUnjipe.

¹⁴ “Kuno ndi mwelela antu yano yamuifya, na So wino uwa mwiyulu alumwelela nemwe kwene.

¹⁵ Leelo ndi mutalwelela antu yano yamuifya, nanti So wino atalumwelela mwemwe kuifya kwino.

Kuizilizya vyakulya

¹⁶ “Kaili pano umuizilizya, vyakulya mutachikolana na yaufi, yano yakunyepa ichikole apa maaso yao, kuno yakuufisa ku maaso, kuti yaloleke na antu fino iyaizilizya vyakulya. Mwenemo, ndumunena, fino yaati yapokelela unnambu wao.

¹⁷ Leelo wemwi pano ukuizilizya, upakale amafuta ku ntwe, ufulale uku manso,

¹⁸ kuti utachiloleka ku yantu, fino ukuizilizya, leelo So wino ali uku nfiso; na So wino alulola uku nfiso, alukupa unnambu.

Ifyuma mwiyulu

¹⁹ “Mutachi uwikili ifyuma kuno ukuushi, kuno impese ni ngalawa fikulonoona, na ifi yakufuna nu kwiiya.

²⁰ Leelo muuwikili ifyuma umwiyulu, kuno kusulononeka chimwi uku mpese naanti ngalawa, naanti aivi yasufuna naanti ukwiiya.

²¹ Kuno pano pali ifyuma fyaako, apano paluwa nu mweeso waako.

²² Ikosho lya mwiili ilisho; ndi iliiso lyaako liswefile, umwiili waako wooshi uluuwa nu mwengelela.

²³ Leelo iliisho lyaako, ndi lyononeka, umwiili waako wooshi uluuwa ni chaanda. Ichino umwengelela uno ulimo muli weewe, ndi wawa ichaanda, ichaanda chiyo ichikulu nkaani.

²⁴ “Kusi uuntu wino angaombela ayeene yaili, kuno alutuwa weenga nu kukasama weenga; naanti ukulemana na weenga nu kusuula weenga. Mutangi muombele Leesa ni fyuma.

Kuchuulila

²⁵ Chaleka fiyo ndumuneena, mutachi chuulila amikalo yiino, mulye chaani naanti munwe chaani, naanti imyiili yiino, mushwaale chani. Chene! amikalo yatalushile ichuulya? Nu mwiili utalushile ifya kuswaala?

²⁶ Lolini ifyuuni fya mwiyulu: fisulukomela naanti kusakaata, naanti ukukôsha un-ntaanta; na So wino uwa mwiyulu ukulufilyiisha. Cheene! mweemwe mutalushi nkaani fiyo?

²⁷ Uwiini pali mweemwe, wino, ndi wauchusha, angauluunja utali waakwe naanti ikasa lyoonga?

²⁸ Ni ifya kuswaala, uku chaani ukufichuulila? Mwelengule ingala sha nchuundu, fino sikulumela. Sisuomba unndimo naanti ukupiliinga.

²⁹ Neene ndumunena, fino naanti Salomoni um-ukulu waakwe wooshi, ataswiite niingo wi limwi pali yeneyo.

³⁰ Ali ngi Leesa, wino akuluswiika fi amasote ya nchuundu, yano yalipo ileelo, ni iyulu yasumbwa umwiluungu, Cheene! atalulusha nkaani ukumuswiika mweemwe mwe ya usumilo uche?

³¹ Ichino mutachi chulila, ukuti: twandya chaani, naanti: twanwa chani, naanti: twanswaala chaani?

³² Kuno ifiintu fi fyooshi akulukuwa yakulushita; kuno So wino uwa mwiyulu amanyile fino mulushita fiyo fyooshi.

³³ Leelo icha ntangulo mushite uweene waakwe ni chumi chaakwe, na fyooshi fiyo mulongeshiwa.

³⁴ Ichino mutachi chulila ifya uwaanda wi yulu, kuno waanda wi yulu uluuchulila ukola; kuno chila waanda ukuulwisa nuyiipe waakwe.