Mateo 4 - UPANGANO UPYA

Yesu alweeshiwa un-nyika

¹ Nga pano Yesu watwaalwa nu Mweso uku nyika, kuti aeshiiwe na Chiwa.

² Wausilisha ukulya usiku nu nsanya, amaanda amakumi yani. Palinji walola iasala yamwaya.

³ Keesha wishile, waneena, waati: “Ndi we mwana wi Leesa, nena amafiinga ya yawe iishima.”

⁴ Nawe waneena, waati: “Chaandikwe: ‘Untu ataangi awiikalile iishima intupu, leelo ukwiswii lyooshi lino lifumile un-nnomo wi Leesa.’ ”

⁵ Nga Chiwa wanseenda afika uku nsi nsweefu, wamwika apiyulu apa ng'anda-nkulu-iyi-Leesa,

⁶ wannena, waati: “Ndi wewuli Mwana wi Leesa, tumpuka apaasi, kuno chaandikwe: ‘Wankutumila yamalaika yaakwe; num-makasa yao yalukutoola. Utiise ukumike ikulu lyako ukwifiinga.’ ”

⁷ Yesu wannena, waati: “Chaandikwe kweene fino utachimweesha uMwene, Leesa waako.”

⁸ Nga kaili Chiwa wanseenda uku mwaamba untali nkaani, wandaanga uweene wooshi wa nsi nu usiipe waakwe.

⁹ Wannenile, waati: “Fyooshi fi nankupa, ndi wapona nu kufukamila.”

¹⁰ Apano Yesu wannena, waati: “Pita, Shetani we, kuno chaandikwe: ‘Umufukamile uMwene Leesa wako, nu kumwombela weenga kweene.”

¹¹ Apano Chiwa wanshiile; nga lola, yiisa yamalaika yamwombela.

Yesu watangula undimo

¹² Nga pano Yesu wapulika fino Yoane wanyepwa, wapisile uku Galilea.

¹³ Atina ku Nasaleti, aya wikala uku Kapenaumu, unsi uno uli umbali yi yeemba, um-wilaya yi Sebuloni na Naftali.

¹⁴ Kuti liwe iswi lino lyalaashilwe na kalausha Isaya, ukuti:

¹⁵ “Insi yi Sebuloni ni nsi yi Naftali, isila yi yeemba imbalama yi Yodani, Galilea yi yakulukuwa:

¹⁶ Antu yaya, yano yikashile un-chaanda, mwengelela unkulu. Nayo yano yikashile un-nsi ni chisau cha lufu, mwengelela wiisila.”

¹⁷ Ukufuma liyo kweene Yesu watampa ukusunda angaluti: “Fipelini, kuno uweene-wa-mwiyulu uwupalamila.”

Yesu wita alondeshi

¹⁸ Nawe pano wapitaala umbali yi yemba wi Galilea, wawine aantu yayili, Simoni wino yataangi Petlo, na Andelea unnina, angi yalusuumba isuumbo muli yeemba; kuno yelaanga.

¹⁹ Wayaneena, waati: “Ndondeliini; neene ndumuchita muwe yakeela ya aantu.”

²⁰ Liyo kweene yasha amasuumbo yao, yannondela.

²¹ Waya uku nkoleelo, waya wasaana kayili yamwi yayili, untu nunnina, Yakobo mwaana wi Sebedeo na Yoane unnina, yano yali um-wato apali poonga na Sebedeo, isi wao, aangi yalulimba masuumbo yao; wayita.

²² Liyo kwene yanshauwaayo na isi wao, yannondela.

Yesu wataampa ukuposha alwaale

²³ Nawe wapitananga um-Galilea yooshi, angalu sambilisha un-ng'aanda shaao iswii Leesa, nu kusuunda iswi-isiipe ilya weene, nu kuposha indwaala ni mboombo uku yantu.

²⁴ Amaswi yaakwe yalumbuka uku Silia yooshi. Yandeetela yooshi yano yaombokela ni mboombo sha chila mboombo na machuulo, yano yali ni fiwa na ya fifumfumi na yitenda, nga wayaposha.

²⁵ Na maumba tupu yannondela ukufuma ku Galilea nu kufuma ku Dekapoli, nu ku Yelusalemu nu ku Yudea nu ku mbalama ya ku Yodani.