Mateo 3 - UPANGANO UPYA

Yoane Kabatisha

¹ Um-manda yalye wisile Yoane kabatisha angalusuunda un-nyika ya Yudea, ati:

² “Fipelini, kuno uweene-wamwiyulu uwupalamila.”

³ Kuno wiyo uwino watasilwe na kalausha Isaya, ati: “Iswi lyi umwi lilulaisha un-nyika. Teyanyangini isila ya Mweene; ololini muno alupita.”

⁴ Yoane nawe wali nu mweenda wa mafumbu ya ntwangamweendo, nunkowa wa nkwela umu-nsana waakwe. Ni chulya chakwe chali makaanta nu uchi wa nchundu.

⁵ Apano yanjilile a mu Yelusalemu na amu Yudea syooshi, ni nsi syoonsi isha mbali mbali yi Yodani.

⁶ Nawe wayabatisha unduusi lwi Yodani, nakuno angi yaluilongwela amaifyo yao.

⁷ Leelo pano wawine ayinji um-aFaliseo na aSadukeo yalwisilu ulubatisho lwakwe, wayanenile, waati: “Mwe ana ya soka, uwini wino atamusokesha ukwituka ichilakali chino chilwiisa?

⁸ Ali sêkini ifisêke fya kufipela.

⁹ Mutachelengula umyeeso yiino, fino tuli na tata, ali Ablaamu; kuno ndumunena, fino Leesa angakatusisha Ablaamu ana um-mafiinga ya.

¹⁰ Ni mpasa itiwikwa apa mashiinda ya fiti; ichiti choosi chitalusêka ifisêke fisiifu, chilukomwa nu kusumbilwa um-mootou.

¹¹ Nemwi ndumubatisha na maasi uku kufipela, leelo wino alwiisa ichisila chane, wene ali na maka ukunduta neene, wino ntalingine nanti ukuseenda infwato shaakwe; wene alumubatisha uku Mweso Nswefu nu ku mooto.

¹² Wino ulupe luli umwikasa lyaakwe, nawe aluswefya nkani ulwano lwakwe; nu kukonganika ingano yaakwe un-ntanta, leelo chileshe alumocha nu mooto untashima.”

Yesu wabatishiwa

¹³ Liyo kwene Yesu wiisa ukufuma uku Galilea, wafika nu ku Yodani kuli Yoane, kuti abatishiwe nawe.

¹⁴ Leelo Yoane wakasime ukundesha, waati: “Chingasiipa, nene ukubatishiwa neewe, newe wiisa kuli neene?”

¹⁵ Leelo Yesu wannena, waati: “Sumila uleka chiombeke, kuno ifino chiine, ukuti tufikilishi ichuumi choosi.” Nga pano wasumila.

¹⁶ Nawe Yesu pano wabatiisiiwa, liyo kweene wapita ukufuma um-maasi; nga lola, iyulu lyayulika, walola Mweso wi Leesa ulwika wa nkuunda ulwiisa pali wenewe.

¹⁷ Nga lola, iswi ukufuma umwiyulu, lyaati: “Alawi uMwanaane, unkundikwa waane, wino wansiipila.”