Mateo 23 - UPANGANO UPYA

Yesu wasumbikila yakaandika na aFaliseo

¹ Nga Yesu aneena amaumba na alondeshi yaakwe, aati:

² “Yakaandika na aFaliseo yikaliila ichisuumbi chi Mose.

³ Ichino ifiintu fyoonsi fino yamuneena, muleme nu kufioomba; leelo mutachichita ukukolanya na fino yaluchita, kuno weene yakululaanda, leelo yataomba.

⁴ Weene yakulunyepa ifiseendo ifinwaamu nu kutwiika aantu apa luto, leelo weene akola yataangi yemye naanti uku nwe wao.

⁵ Na kayili fino yaluchita, yaluchita ukuti yaloleke na aantu; kuno yalusalasha imikowa ya nsala nu kufusha matamfua.

⁶ Yakuunda ifisuumbi fya ku nkoleelo apa chakulya, nu kwikala uku nkoleelo un-ng'anda shi Leesa.

⁷ Nu kulaulwa um-masokoni, nu kwiitwa na aantu: Labi.

⁸ Leelo mweemwi yatachimwiita Laabi, kuno Kasambilisha wino ali weenga, neemwe mweensi mwe yali yoonga.

⁹ Leelo mutachiita untu wa kuushi, Taata, kuno So wino ali weenga, uwa mwiyulu.

¹⁰ Naanti mutiatwa yakakoleela, kuno Kakoleela wino ali weenga, nawe i Klisto.

¹¹ Na wino uwikolo kuli mweemwe awe umuofi wino.

¹² Na weeso wino waukusha, aluchefiwa, na weeshi wino wacha waucheefya, alukushiiwa.

¹³ “Akalaanda kino yakaandika na aFaliseo, mwe yaufi, kuno muluyalila aantu uweene-wa-mwiyulu; neemwe mwe yakola mutalwiingila, na yano yalushitu kwingila, mutaluleka yingile. [

¹⁴ “Akalaanda kino yakaandika na aFaliseo, mwe yaufi, kuno mululya ing'anda sha ashiimbe, nu ku ufi wino mululundulula insaala; ichaleka muluputwiilwa uputushii ukuluta.]

¹⁵ “Akalaanda kino yakaandika na aFaliseo, mwe yaufi, kuno mululila muli yeemba nu mbali ukushita untu wa kufyusiiwa, na pano wafyusiiwa, mulunchita awa umwaana wa Jenama amaila yayili nkaani ukuluta mweemwe, mwe yakola.

¹⁶ Akalaanda kino yankoleela apofu, yano mukuluuti: untu ndi walapila uku ng'anda-nkulu-iyi-Leesa, chisi chimwi; leelo untu wino walapa uku sahabu iya ng'anda-nkulu-iyi-Leesa, wataunyepa.

¹⁷ Mwe mwasowa nga mwapofula, kuno ichikulu ichilikwi, iyiyi isahabu nanti iyiyi ng'anda-nkulu-iyi-Leesa, yino iluswefya isahabu?

¹⁸ Kayili untu ndi walapila uku altale chisi chimwi, leelo untu wino walapila uku wiila uno uli penepo, wataunyepa.

¹⁹ Yapofu mwe, kuno ichikulu ichilikwi, uwiila wuuwu naanti altale, yino iluswefya uwiila?

²⁰ Ichino wino walapa uku altale, watalapa kuli yeneyo nu ku ifiintu fyooshi fino fili penepo.

²¹ Na wino walapa uku ng'anda-nkulu-iyi-Leesa, watalapa kuli yeneyo na kuli wino ateesi-mo.

²² Na wino walapila ukwiyulu, watalapa uku chisuumbi-cha-ukulu chi Leesa, nakuli wino awikalile.

²³ “Akalaanda kino yakaandika na aFaliseo, mwe yaufi, kuno mulufiima isempu li kumi lyi nachituumbi ni binzaali ni nkwila; leelo mwasha ifiintu fikulu ifya Ntaambi, ndi fino ichuumi, inkuumbu nu sumilo. Chimuyiile ukuchita fiyo na maniina yaaya mutachiyata.

²⁴ Yakakoleela yapofu, yano muluyunga kumpe nu kumila ntwanga-mwendo.

²⁵ “Akalaanda kino yakaandika na aFaliseo, mwe yaufi, kuno mulufula ulwaako ni mbale ukuushi, nu nkasi mwashula nu kupoka-ifya-antu nu kwinanguka.

²⁶ We mFaliseo mpofu, tangula fula ulwako unkasi, kuti nukuushi na ko kweene kusweepe.

²⁷ “Akalaanda kino yakaandika na aFaliseo, mwe yaufi, kuno mukoline na maliindi yano yapaka iswakala, yano ukuushi yaluloleka yasiipa, fwaandi, unkashi yashula amafupa ya yafwi ni fiole fyooshi.

²⁸ Ifino neemwe, ukuushi mululoleka na antu fino muli niingo, fwaandi unkasi mwashuula ufi nu kusuuli Ntaambi.

²⁹ “Akalaanda kino yakaandika na aFaliseo, mwe yaufi, kuno mulukuula amaliindi ya malau, nu kuyeefya maliindi ya achumi.

³⁰ Nukuti “Sweeswe ndi twaliko um-maanda iya taata yitu, tutali tuminkane nayo uku waashi wa malau.’

³¹ “Alafi muluumanyisha mwe yakola, fino mweemwe yana yi yano yumoshila malau.

³² Yanyini leelo ichilingilo chi ya so yino!

³³ Mwe soka, yana ya fisoka, mulwituka uli uputushi wa Jenama?

³⁴ Ichino fiyo, lolini, namutumila malau na ya maano na yakaandika; yamwi pali yeneyo mweemwe muluyumola nu kuyakonkomela apa nsalaba, na yamwi muluyuma un-ng'anda sino ishi Leesa nu kuyawiinga chila nsi.

³⁵ Ichino fiyo wise kuli mweemwe uwasi wooshi uno witika paasi uwa antu ya chuumi, ukufuma uwashi wi Abeli wiilye uwaali wa chuumi, fika nu waashi wi Sakalia umwaana wi Balakya, wino mumoshiile apakashi u ng'anda-nkulu-iyi-Leesa ni altale.

³⁶ Mweneemo ndumuneena: ifiintu fi fyooshi filwisa pa mpanda uo.

Yesu walilila iYelusalemu

³⁷ “We Yelusalemu, Yelusalemu, ukulumola malau nu kuyatama na mafiinga, yano yatumile kuli weewe, amaila yaanga nasita ukuyakonganika poonga ana yaako, ndi fino inkoko ikulufukatila poonga ana yaakwe um-mapa yaakwe. Leelo mutakashime.

³⁸ Lolini, ing'anda yino yashaala ichipoompa.

³⁹ Kuno ndumuneena: mutalundola naanti uche ukufuma kasalaka, fika na li mululanda, muti: ‘Wapepelelwa wino alwiisa ukwishiina lya Mweene!”’