Mateo 21 - UPANGANO UPYA

Yesu wingila um-Yelusalemu

¹ Nga pano yapalamila uku Yelusalemu nu kuya uku Betfage, uku mwaamba wa Miseituni, apano Yesu watumile alondeshi yayili.

² wayaneena, waati Yangini umunsi wuwu uli apipi; liyo kweene mwausaana impuunda inyepe, nu mwaana-mpuunda poonga nawe. Isapulini. mundetele.

³ Ngi umwi wamuneena chimwi, mulaande muti: ‘UMweene aluishita. Nga akuiwesha suwa.’ ”

⁴ Chawa fiyo kuli yao yooshi, ukuti liwe iswii lino kalausha watashile, ukuti:

⁵ “Nenini umwaana kachi uwa Sioni: Lola uMweene waako alwisha kuno uuli; wafyalika nawe akwesilu mwaana-mpuunda, wino ali na nyina wa kuseenda ifiseendo.”

⁶ Alondeshi yao yampita, yachita ndi fino Yesu ayaneniile.

⁷ Yanndetela mpuunda nu mwaana wa mpuunda, yawiika imyeenda yao apiyulu nga Yesu awikala penepo.

⁸ Aantu tupu apiumba liyo yaala imyeenda yao un-nsila, na yamwi yatema amafwa ya fiti, yaala un-nsila.

⁹ Na maumba yano yakoleshile na yano yalondiile yafumya amaswii, yalaanda yaati: “Osana, Mwaana wi Daudi! weewe wapepelelwa, wino alwiiaa ukwishina lya Mweene! Osana umwiyulu!”

¹⁰ Nga pano wingila um-Yelusalemu, unsi wonsi wakatuka ukulola ngi chani, yaati: “Uwini wi?”

¹¹ Amaumba yaati: “Alawi ikalausha, Yesu wa ku Nasaleti ya ku Galilea.”

Yesu waswefya ng'anda-nkulu-iyi-Leesa

¹² Nga Yesu awingiila un-ng'anda-nkulu-iyi-Leesa, awinga yooshi yano yakashanga nu kukala un-ng'anda-nkulu-iyi-Leesa, apenola imesa shi yakakaulula ya mpia, ni fisumbi vyao yano yakashanga inkuunda.

¹³ Wayanena, waati: “Chaandikwe: ‘Ing'anda yaane ilwitwa ing'anda ya saala,’ leelo mweemwi umuichita ukuwa ichele lyi yakapoka-fya-aantu.”

¹⁴ Nga apofu na ya matenda yaya kunali un-ng'anda-nkulu-iyi-Leesa, ayaposha.

¹⁵ Leelo ayikolo iyakapela na yakaandika, pano yalola ifipesha maano fino wachita, na anche yano yafumishe amaswi yao un-ng'anda-nkulu-iyi-Leesa, yalaanda ukuti: ‘Osana, Mwaana wi Daudi!’ yalakalika.

¹⁶ Yannena, yaati: “Wapulika fino ya yalutaka?” Yesu wayaneena, waati: “Ee.” Waati: “Mutachili musome fino ‘Uku milomo ya tunya na apiyele fino weewe uli wa kulumbaanya?’ ”

¹⁷ Nga ayasha, afuma umusi, aya uku Betania, ukuno walala.

Unsamfu utasêkile

¹⁸ Nu ntoondo, pano; wawelanga ukushi, wali ni sala.

¹⁹ Alola unsamvfu weenga umbali ya sila, waya anga waula ukusaana amasamfu, leelo amafwa sile. Wauneena, waati: “Ukufuma ilelo na maanda yooshi amasamfu yatachisêka kuli weewe!” Liyo kweene unsamfu wanyaala.

²⁰ Pano alondeshi yaakwe yalola fiyo, yasunguka, yaati: “Chili uli unsamfu wanyaala li kweene?”

²¹ Yesu wayaneena, waati: “Umwenemo ndumuneena, ndi mwawa nu sumilo, mutachi tentenganya, mutaluchita liyo ilya unsamfu sile, leelo naanti ngi mwaneena umwaamba uo, mwaati: ‘Wipuka, ukaponela muli yeemba,’ liluombeka.

²² Ni ifiintu fyooshi fino mwacha mwalomba un-sala, ndi mwasumila, mulupokelela.”

Kutondosha Yesu apa maka yaakwe

²³ Nga pano wingila un-ng'anda-nkulu-iyi-Leesa, ayikolo iyakapela na akoombe ya yaantu yayiile kuno alii, pano alusambilisha, yannena, yaati: “Uku maka chi uluchita ifiintu fi? Na wino wakupiile amaka ya uwini?

²⁴ Nga Yesu wayaneena waati: “Neene nammutondosha iswii lyoonga, lino ngi mwannena, neene namuneena uku maka chi nduchita ifiintu fi.

²⁵ Ulubatisho lwi Yoane lwafumile kwi? Lwafumile umwiyulu naanti uku yaantu?” Nga yatondoshana akola na akola, yaati: “Ngi twalaanda twaati; ‘lwafumile umwiyulu,’ wantuneena, aati: ‘Nga fino mutachili munsumile?’

²⁶ Na ngi twaati: Lwafumile uku yaantu,’ tuloopa iumba, kuno aantu yooshi yalulola Yoane fino i kalausha.’’

²⁷ Yannena Yesu, yaati: Tutamanyile.” Nawe wayaneena, waati: “Naanti ineene kweene nsumunena mwemwe fino uku maka chi nduchita ifiintu fi.

Unndumbe wa ayaana yayili

²⁸ “Mweemwi mwalola uli? Untu weenga waali na aana yayili; waaya kuli wiiwi uwa ntangulo, waati: ‘Mwanaane, unnimo wi leelo, yanga ukaombe un-chaalo cha misabibu.’

²⁹ Wannena, waati: ‘Endita taata, nanja,’ leelo ataya.

³⁰ Waya kuli wiiwi uwa uwili, wannena fifi kweene; nawe walaanda, waati: ‘Ntakasi!’ Ichisila wafipela, waaya.

³¹ Pali yao yayili, uwiini wino achisile ningo fino isi akasiime?” Yannena, yaati: “Uwilye uwa wili.” Nga Yesu wayaneena, waati: “Umwenemo ndumuneena: yakaliffa yikodi na yamalaya yalumutangwila ukwingila um-weene-wi-Leesa.

³² Kuno Yoane wishile kuno muli kumulaanga isila ya chumi, neemwe mutamsumile, leelo yakalifya yi koodi na yamalaya yamsumiile; neemwe pano mwalola fi, mutachili mufipele pa chisila, ukuti mumsumile.

Alimi ni chaalo cha misabibu

³³ “Pulikiini unndumbe unnina. Kwaali untu ali ni ng'anda, nawe wapela ichaalo cha misabibu, wapindilisha, wimba ichiliina cha kukamila unkashi, wakula chipanda, wawiika alimi, wampita um-masi.

³⁴ Pano imisabibu yasha iche, watuma aomfi yaakwe uku yalimi yaaya, yapokeele ivisêke fyaakwe.

³⁵ Alimi yao yayalema aomfi yaakwe, yamuuma weenga nunji yamumoola, nuunji yantama na mafiinga.

³⁶ Watuma kayili aomfi aanji ukuluta aya ntangulo, yayachita fifi kweene.

³⁷ Ichisila watuma umwaanakwe kuno yali, ati: ‘Yanchindika umwaanane.”

³⁸ Leelo alimi pano yalola umwaana wiyo, yaamba atupu, yaati: ‘Alawi umpyaani, tumumoole, tutoole upyaani waakwe.’

³⁹ Yannema, yansumbila ukuushi ya chaalo cha misabibu, yamumoola.

⁴⁰ Ali pano wacha wisa wiiwi unkola chaalo cha misabibu, aluyachita uli alimi yao.

⁴¹ “Yannena, yaati: “Aluyumoola aantu ayiipe yao uku machuulo mayiipe, aluwika alimi yanji uku chaalo cha misabibu, yano yalumpa imisabibu pano yacha.”

⁴² Yesu wayaneena, waati: “Mutachili musome um-Maandiko: ‘Ifiinga lino yakakuula yakaana, ilino lyawa ifiinga ikulu ilya kumbali. Iswii li lifumile uku Mweene; nalyo ilya kusunguka apa maaso yiitu?’

⁴³ “Ichino fiyo ndumuneena, uweene-wi-Leesa ulutishiwa kuli mweemwe, nao ulupiiwa aantu yaanji yano yalusêka ivisêke fyaakwe. [

⁴⁴ Na wino wapona apifiinga liyo, alufunokafunoka; na weeshi wino lyaponela, lilumfyengola.”]

⁴⁵ Ayikolo iyakapela na aFaliseo pano yapulika imiluumbe yaakwe, yamanya fino aluyaneena akola.

⁴⁶ Nayo pano yashita kunnema, yopa amaumba, kuno yamwine fino i kalausha.