Mateo 18 - UPANGANO UPYA

Wikolo uwini um-wene-wa-mwiyulu

¹ Liyo kweene alondeshi yaya kuli Yesu, yannena, yaati: “Uwikolo uwini fwaandi um-weene-wa-mwiyulu?”

² Awita umwaanche weenga, amwiika apakasi yao.

³ Afwaanga, ati: “uMwenemo ndumunena: ngi mutasenwiike nu kuwa wa yaanche, mutalwiingila naanti uche um-weene-wamwiyulu.

⁴ Ichino weeshi uwacha waucheefya unkola wa mwaanche nnono wi, wiyo ali wikolo um-weene-wa-mwiyulu.

⁵ Na weeshi uwacha wapokelela umwaanche weenga, wino akoliine nawi ukwishina lyaane, ampokelile neene.

⁶ Nu wacha waleka umwaanche nnono weenga pali ya yano yantauile wonoona, chilingiine anyepelwe un-ngalo ifiinga ikulu ilya kusyiila nu kusumbilwa muli yeemba apiyeshi.

⁷ “Akalaanda ukuushi uku ifiintu fya konoona; kuno chilungiime ukwiisu ifiintu ifya kononela, leelo akalaanda kaakwe uuntu wiyo, wino aluleta ifya konoona,

⁸ Ichino ikasa lyaako naanti ikulu lyaako ndi liluleka ulonoona, liputule, ukalisuumbe ukutali; chili uche uche ukwingila um-upuma neewe waulilwa ikasa naanti ikulu, kuleka ukuwa na makasa yaili nanti amuulu yaili nu kusumbilwa um-mooto wa maanda ti.

⁹ Ni liiso lyako ngi lyaleka wonoona lifyonkole, ukalisumbe ukutali; chili uche uche ukwingila um-upuma we chitonko, kuleka ukuwa na maaso yaili nu kusumbilwa un-chilinkwe cha mooto.

¹⁰ Mulole mutasula umwaanche weenga pali ya; kuno ndumunena, fino yamalaika yao umwiyulu manda yoshi yalulola usyu wi Taata alu mwiyulu. [

¹¹ Kuno Mwaana-ntu wzulilu fyusha chino chalowa.]

Unndumbe wa fweele yino yalowa

¹² “Mwalola uli? Untu ndali ni fwele umwaanda, yoonga yalowa, Cheene! atakusha shiishi amakumi tisa na tisa uku myaamba, ayu ukushita yiyi yino itilowa?

¹³ Nga pano ndi wayilola, umweneemo ndumunena: aluichimbila nakani yiyo, ukuluta shiisi amakumi tisa na tisa, shino shitalowile.

¹⁴ Ifino chitashifiile kuli Taata wino alu umwiyulu, ukuti weenga pali ya anoono alowe.

Ifyo lya nnyonko. Kunyepa nu kusapula

¹⁵ “Nu nnyonko ndi wakuyifya yanga unsuunde, weewe nawe mweenga; ndi wakupulika, ukupata unnyonko.

¹⁶ Ndi waula ukukupulika, toola untu weenga naanti yayili, ukuti uku ushuta wa antu yayili naanti yatatu chila iswi liwe niingo.

¹⁷ Ngangi waula ukuyapulika yao, lineene ikongaani; na ngi waula ukulipulika ikongaani kweene, munndeke awe wa aantu yakulukuwa na yakalifya yikodi.

¹⁸ Umwenemo ndumunena: yooshi yano mwacha mwanyepa kuno ukuushi, yalunyepwa nu mwiyulu. Na yooshi yano mwacha mwasapula kuno ukuushi, yalusapulwa nu mwiyulu.

¹⁹ “Kayili ndumuneena fino aantu yayili ndi yacha yapulikana kuno ukuushi ukulomba ichiintu chimwi, Taata uwa mwiyulu aluyachitila.

²⁰ Kuno pano yali yaili naanti yatatu iyakongana ukwishiina lyaane, neene kweene ndipo.”

Kwelela aanji

²¹ Nga Petlo aya kunli, annena, ati: “Mweene, uwachane anjifye amaila yaanga, neene mwelele? Naanti amaila saba?”

²² Yesu wannena, waati: “Ntalukuneena ukuti amaila saba, leelo naanti saba maila sabini.

²³ “Chaleka uweene-wa-mwiyulu wakolana nu mweene weenga, wino wakasiime ukusolosha na aomfi yaakwe.

²⁴ Pano watangula ukusolosha, yanndetela untu weenga wakopa impia, talanta elfu ikumi.

²⁵ Nawe pano waula ichakulipa, umweene waakwe waati akalwe, unkola nunchi na aanakwe ni ifiintu fyooshi fino ali nafyo, kuti alipe impa iyo.

²⁶ Nga umuofi wiyo apona pa muulu yaakwe amwinamila, afwaanga ukuti: ‘Mweene, untekelele, neene nankulipa yooshi swe.’

²⁷ Umweene wa momfi wiyo wankumbukila, wansapula, wamweleela impa yiyo.

²⁸ Ngu momfi wiyo pano wafuma, alola umuofi weenga apa yanina, nawe wakopa kunali impia umwaanda woonga, wanndema wankama ilongomilo, annena, ukuti: ‘Undipe impa yaako.’

²⁹ Nga umuofi nachakwe wiyo apona pa muulu yaakwe, apapata kunalii, ati: ‘Unteekelele, neene nankulipa fyooshi swe.’

³⁰ Leelo wene atakasime, wannyepa uku nyololo, kufika na lino wacha walipa impia yiyo.

³¹ Nga pano aomufi yanina yalola chino wachita, yawa ni chikoonko nkaani, yaya yalandila umweene wao fyooshi fino wachisile.

³² Apano umweene waakwe wamwita, wannena ukuti: ‘Uweewe, we momufi njipe, uweewe nalile nkweleela impia yiilye yooshi pano wampapaata.

³³ Nga weemwi utali ukumbukile umuofi na chaako, ndi fino neemwi nakukumbukile weewe?

³⁴ Umweene waakwe walakalika, wantwaala kuli yano yakunyepa, kufika na lino wacha walipia impa yaakwe yooshi.

³⁵ Ifino na Taata uwa mwiyulu alumuchita mweemwe, ngi mutalweleela um-myeeso yino, chila ntu nu nnina.”