Mateo 1 - UPANGANO UPYA

uLuko lwi Yesu Klisto

¹ Ichitaabu cha luko lwi Yesu Klisto, umwaana wi Daudi, umwaana wi Ablaamu.

² Ablaamu wafiile Isaka; Isaka wafile Yakobo; Yakobo wafiiile Yuda na aniina yaakwe.

³ Yuda wafiile Pelesi na Sela kuli Tamali; Pelesi wafiile Esloni; Esloni wafiile Lamu;

⁴ Lamu wafiile Aminadabu; Aminadabu wafiile Nashoni; Nashoni wafiile Salmoni;

⁵ Salmoni wafiile Boazi kuli Laabu; Boazi wafiile Obedi kuli Luti; Obedi wafiile Yese;

⁶ Yese wafiile umwene Daudi; Daudi wafiile Salomoni kuli nka Ulia;

⁷ Salomoni wafiile Loboamu; Loboamu wafiile Abiya; Abiya wafiile Asa;

⁸ Asa wafiile Yosafati; Yosafati wafiile Yolamu; Yolamu wafiile Usia;

⁹ Uzia wafiile Yotamu; Yotamu wafiile Akazi; Akasi wafiile Yesekia;

¹⁰ Yesekia wafiile Manasa; Manasa wafiile Amoni; Amoni wafiile Yosia;

¹¹ Yosia wafiile Yekonia na aniina yaakwe apa manda ya usaamyo wa Babeloni.

¹² Na pa chisila cha usaamyo wa Babeloni, Yekonia wafiile Syealtieli; Syealtieli wafiile Selubabeli.

¹³ Selubabeli wafiile Abyudi; Abyudi wafiile Elyakimu; Elyakimu wafiile Asoli;

¹⁴ Asoli wafiile Sadoki; Sadoki wafiile Akimu; Akimu wafiile Eliudi;

¹⁵ Eliudi wafiile Eliasali; Eliasali wafiile Matani; Matani wafiile Yakobo;

¹⁶ Yakobo wafiile Yosefu, nka Malia, wino wafiile Yesu wino yakuluuti i Klisto.

¹⁷ Ngi iinko syooshi ukufuma Ablaamu kufika Daudi, iinko ikumi na yiini; na fuma Daudi kufika usaamyo wa Babeloni, inko ikumi na ini; na fuma usaamyo wa Babeloni kufika Klisto, imipanda ikumi na ini.

Kufyaalwa kwi Yesu

¹⁸ Ukufyaalwa kwi Yesu Klisto kwaali fi: Malia nyina wayiile wimalwa na Yosefu, lino yatatana yemana, walolike ali ninda uku maka yi Mweso Nswefu.

¹⁹ Nawe Yosefu iya, fino waali uwa chumi, atakasime uku nsekelisha, wakasime ukumta ukumbali.

²⁰ Nga pano welengulanga fiyo, lola, malaika wa Mwene wamwisila un-chiloto, waati: “Yosefu, mwaana Daudi, utachopa ukumtola Malia awe uwaako, kuno iinda yaakwe iya ku maka ya Mweso Nsweefu.

²¹ Nawe alufyaala umwaana; newe uluntema ishina lyaakwe i Yesu. Kuno wiyo uwino akukulula aantu yaakwe na maifyo yao.”

²² Fyoshi fi fyaombike, kuti chiwe chino uMweene wafashile na kalausha, ati:

²³ “Lola, unsuungu aluseenda iinda, nawe alufyala umwaana; nawe yalunta ishina lyaakwe: ‘Imanueli’,” alikuti: “Leesa apalipoonga neswe.”

²⁴ Nawe Yosefu pano walanka un-tulo, wachita ndi fino malaika wa Mwene wannenile; wamtola ukuwa uunchi.

²⁵ Nanti kumweema kufika na lino wafyala umwaana. Wamtema ishina lyaakwe i Yesu.