Malko 8 - UPANGANO UPYA

Yesu wayapa vyakulya antu ielfu zini

¹ Um-manda yalye fino iumba lyali ikulu kaili, nalyo lyaula ichakulya, wita alondeshi yaakwe, ayanena, ati:

² “Nakumbukila iumba, kuno yawa manda yatatu yatensi ponga nene na yatakwite ichakulya.

³ Nene ngi nanti njalambalike yapite uku mang'anda yao, nayo yauzilizya vyakulya, yakukalila un-nzila, kuno yamwi yafumile ukutali.”

⁴ Alondeshi yaakwe yaati: “Uwini angayapa ichulya cha kuti yalye yikute yoshi ya, na pa tuli apa nyika?”

⁵ Wayatondosya, waati: “Muli ni mikate yinga?” Yaati: “Saba”.

⁶ Wayanena iumba likale apansi. Nga pano yikala, atola mikate saba ilye, asamalizya aikunyola, apa alondeshi yaakwe, yayape. Nga yapa iumba.

⁷ Yali ninswi nche; azipepelela, walanda, waati: “Yapini nazyo kwene.”

⁸ Yalya yikuta; yakonganika ivikunyolwa vya mikate, iviyo saba.

⁹ Na antu yano yalile yali elfu zini. Nga ayalambalika.

¹⁰ Liyo kwene akwela um-wato ponga na alondeshi yaakwe, aya ku wilaya ya Dalmanuta.

aFaliseo yalusita ichilangizyo. Insasyo zya aFaliseo na Yelode

¹¹ Nga aFaliseo yafuma, yatampa ukupazyana nawe. Yasita kunali ayalange chilangizyo ukufuma umwiyulu, angi yalumwezya.

¹² Awayika um-mweso wakwe, ati: “Ku chani uluko lu lulusita ichilangizyo? uMwenemo ndumunena: uluko lu lutalulola ichilangizyo!”

¹³ Wayasya wakwela kaili um-wato, ayu kumbalama.

¹⁴ Yalatila kusenda mikate num-wato kwene musi, leelo wonga sile.

¹⁵ Ayasunda, ati: “Lolini, chenjelelini insasyo zya aFaliseo ni nsasyo zyi Yelodi.”

¹⁶ Yatondosyana akola na akola, kuno yasi ni mikate.

¹⁷ Na Yesu amanya, ayanena, ati: “Uku chani mulutondosyana, kuno musi ni mikate? Muchili mumanye nanti kumanya? Chene! imyenzo yino imikomu?

¹⁸ Mukwite amanso, mutalulola? Mukwite makutwi, mutalupulika? Nantu kwelengula?

¹⁹ Pano nakunyozile imikate isano ilye nu kuyapa yalye elfu zisano, mwatozile iviyo vinga vizyuzile ivikunyolwa?” Yannena, yaati: “Ikumi na viili.”

²⁰ “Na ilye saba ukuyapa yalye elfu zini, mwasenzile iviyo vinga vivizyula ivikunyolwa?” Yannena, yaati: “Saba.”

²¹ Wayanena, waati: “Muchili mumanye na li kwene?”

Yesu wapozya umpofu wa ku Betsaida

²² Nga yaya uku Betsaida; yannetela umpofu, yampapata, kuti amwemye.

²³ Walema umpofu wiyo ikasa, wamfumya umunsi, answila mati um-manso, wamwikila makasa, wamtondosya, waati: “Walola chimwi?”

²⁴ Walolekesya mwiyulu, waati: “Nalola antu kanti viti vilupita.”

²⁵ Apano wamwikila kaili makasa yaakwe apa maaso yaakwe, nawe walola ningo, wawu mpuma, walola vyonsi ningo.

²⁶ Annena aye ku ng'anda kwakwe, alanda, ati: “Nantu umunzi utachipitana.”

Petlo wataka Yesu fino i Klisto

²⁷ Yesu afuma na alondeshi yaakwe, yaya uku mizi ya Kaisalia Filipi; nun-nzila atondosha alondeshi yaakwe, ati: “Antu yakuluntaka, yaati: nene wini?”

²⁸ Yannena, yaati: “We Yoane Kabatisha; yamwi yaati: We Elia, na yamwi: wewe unnina wi yakalausha.”

²⁹ Nawe wayatondosya, waati: “Nemwe mukuluntaka nene, muti: nene wini?” Petlo wannena, waati: “Wewe ulu Klisto.”

³⁰ Wayasunda yatanena untu amaswi yaakwe.

Yesu walanda machulo, infwa na kututuluka kwakwe

³¹ Watampa ukuyasambilizya fino uMwana-ntu aluchula nu kukanwa na ikolo na ayikolo iyakapela na yakaandika, nu kumolwa; ichisila cha manda yatatu alututuluka.

³² Nawe walanzile iswi liyo apatiswe. Petlo amsenda ukumbali, atampa kunnesya.

³³ Nga asenuka, alolekesya alondeshi yaakwe, achenzela Petlo, ati: “Yanga ku chisila chane, Shetani, kuno utalwelengula ayi Leesa, leelo aya antu.”

³⁴ Awita iumba ponga na alondeshi yaakwe, ayanena, ati: “Untu wensi wino alusita ukundondela, aukana unkola, autwike unsalaba wakwe, andondele.

³⁵ Kuno untu wino alusita ukufyusya upuma wakwe, aluulovya, nuntu wacha walovya upuma waakwe ukwizina lyane, niswi-zipe, wiyo aluufyusya.

³⁶ Kuno chingamwazwilizya chani untu ndi wapata insi yoshi na kaili alovye upuma wakwe?

³⁷ Nanti untu angafima chani aukulule upuma wakwe?

³⁸ Kuno untu wensi uwacha wandolela insoni nene na maswi yane, apa luko lu ulwa upundu na maifyo, uMwana-ntu alunnolela insoni untu wiyo, pano wacha wiza um-ukulu wi Tata ponga na yamalaika yaswepe.”