Malko 6 - UPANGANO UPYA

Yesu wakanwa uku Nasaleti

¹ Nga atina-ko, aya umunzi wa kumwao. Alondeshi yaakwe yannondela.

² Nga uwanda wa Sabato atampa kusa mbilizya un-ng'anda yi Leesa. Pano ainji yapulika yazunguka, yaati: “Alawi wafumya kwi ifintu vi? Amalango chi yano wapiwa wi? Ni chani ivipezya-mano fi ivikulu fino aluchita uku makasa yaakwe?

³ Asali wi kawaza wilye, umwana wi Malia, nanina asi Yakobo na Yose na Yuda na Simoni? Na siche yaakwe yatali kuli sweswe?” Nga yafwitoka panali.

⁴ Nawe Yesu ayanena, ati: “Ilau ataula unchinsi, siku kumwao nkola nu ku yaluko lwakwe nu ng'anda umwakwe.”

⁵ Chaleka waula ukuchita ichipesya-mano chimwi kweneko; leelo wawikile alwale yache amakasa, ayapozya.

⁶ Chaleka wasunguka uku kuntasumila kwao. Nga alila-lila um-misi yio asambilisya.

Yesu watuma alondesi

⁷ Nga ayita yalye ikumi na yaili atampu kuyatuma yaili yaili, ayapa maka uku viwa viipe.

⁸ Ayalesya ukusenda ichintu cha nzila, leelo intuwa sile; nanti unkate, nanti kwende, nanti mpia um-myenda.

⁹ Leelo yazwale infwato. Walanda waati: “Mutachizwala inkanjo siili.”

¹⁰ Ayanena, ati: “Ponsi pano mwingila un-ng'anda, wikalini fika na lino mwatina apantu pao.

¹¹ Na ponsi pano yatamupokelile mwemwe, nanti ukumupulika, apa kutina kwino, mukume ni nkungu ili uku mulu yino, iluwa usyuta ku yakola.”

¹² Yafuma yasunda kuti antu yavipele.

¹³ Yafumya iviwa tupu, yapaka mafuta antu alwale ainji, yayapozya.

Infwa yi Yoane Kabatisha

¹⁴ Nu mwene Yelodi apulika maswi yao, kuni sina lyaakwe lyalumbwike; yalanda yaati: “Yoane Kabatisha atatutuluka uku yafwi, chaleka maka yao yaluomba unnimo um-nkola.”

¹⁵ Yamwi yaati: “I Elia,” Yamwi yaati: “Alawi ilau, nantu nnina wi yakalauzya.”

¹⁶ Leelo pano Yelodi wapulika, waati: “Yoane wino naputwile untwe, watatutuluka.”

¹⁷ Kuno Yelodi unkola walila atatuma antu, walema Yoane, wannyepa uku nyololo, pa nnandu wi Yelodia nka Filipo, unnina, kuno wamtola.

¹⁸ Kuno Yoane wanenile Yelodi, waati: “Chitakuile wewe ukuwa na nka nnyonko.”

¹⁹ Na wilye Yelodia wasyala alunsita, kuti amumole, leelo atannola,

²⁰ kuno Yelodi wopanga Yoane, wammanyile fino untu wa chumi nu wa uswepe; amchinga, nga pano wampulikisya asima nkani, nawe wampulikisyanga uku kuchimba.

²¹ Na pano wanda uno uzifile wafika, uwanda ukulu uwa kuvyalwa kwakwe Yelodi, wachitile ayikolo yaakwe ichulya, naikolo ya asalifi na ayikolo ya m-Galilea.

²² Ali pano umwana kachi wi Yelodia wiyo wingile nu kuchina; chazipa kuli Yelodi na yalye atensi ponga nawe apa chulya. Mwene wanena wilye unsungu, waati: “Ndomba chonsi chino ukasime nankupa.”

²³ Wannapila, waati: “Chonsi chino wandomba, nankupa, nanti uwene wane apakasi.”

²⁴ Nga afuma atondosya nyina, ati: “Ndombe chani?” Nawe ati: “Untwe wi Yoane Kabatizya.”

²⁵ Liyo kwene wingile zuwa uku mwene, walomba, waati: “Ndusita umpe li kwene untwe wi Yoane un-chiyo.”

²⁶ Umwene akutamilwa nkani, leelo kuno walila atalapa na kuli yano yatenzi apa chulya, atakasime ukumkanya.

²⁷ Liyo kwene umwene watuma unsalifi, waati: “Kalete untwe wi Yoane.” Nawe wanja, wamputula untwe umunyololo.

²⁸ Waleta untwe waakwe un-chiyo, wapa wiwi unsungu, nawe unsungu wapa nyina.

²⁹ Pano alondeshi yaakwe yapulika amaswi ya, yaile yatola ichala chakwe, yazyika umwilindi.

Alondeshi yawela. Yesu wayapa antu ielfu zisano vyakulya

³⁰ Ni mitume yakongana pa Mwene Yesu. Nga yannandila vyonsi fino yachisile na fino yasambilizye.

³¹ Wayanenile, waati: “Nguni mwemwe mwenga kunondi, apantu pasi antu, mupuze uche.” Kuno kwali antu tupu, yalwiza nu kupita. Chaleka yaula nu wasa wa kulya.

³² Yapita yonga akumfiso um-wato, apantu pano pasi antu.

³³ Antu yayalola yalupita, na yinji yamanya, yaya kweneko ulwilo lutupu ku mulu kufuma imizi yoshi, yakolela kufika.

³⁴ Nawe pano wika um-wato, alola iumba ikulu lya antu, ayalolela inkumbu, kuno yali wa nfwele izisi nu nchemi; atampa kuyasambilizya ifintu tupu.

³⁵ Nga pano lîla alondeshi yaakwe yaile yannena, yaati: “Apantu pa inyika ntupu, nilanzi lîla.

³⁶ Ulambalike antu ya, kuti yapite um-vyalo num-mizi, yakakale ivyulya.”

³⁷ Leelo wayanena, waati: “Yapini mwemwe ichakulya.” Yannena, yaati: “Chene! Tuye tukakale imikate ya mpia myanda yiili, kuti yalye?”

³⁸ Wayanena, waati: “Muli ni mikate inga? Yangini mukalole.” Pano yalola, yaati: “Yisano, ninswi ziili.”

³⁹ Wayanena, yikale yoshi um-matulo matulo apa nnemvwe.

⁴⁰ Yikali mitantali mitantali; epu mwanda na pa makumi yasano.

⁴¹ Atola mikate ilye isano ninswi zilye ziili, alolekesya umwiyulu asamalizya, akunyola imikate iyo, ayapa alondeshi yaakwe, kuti yayape, ninswi ziili zizi ayankanya yoshi.

⁴² Yalya yoshi yikuta.

⁴³ Yasola ivikunyolwa vya kuzyula iviyo ikumi na viili, ni vilepu vya nswi kwene.

⁴⁴ Na yano yalile imikate iyo yali elfu zisano ayonsi.

Yesu wapita pa manzi

⁴⁵ Liyo kwene wafyengelesha alondeshi yaakwe, yaakwele um-wato, yakolele ukuya umbalama, yafike uku Betsaida, pano unkola alulambalika iumba.

⁴⁶ Pano walambalikana nayo, waya uku mwamba ukuyupepa.

⁴⁷ Na pano yawa manguzi, uwato wali apakasi yi yemba, nawe wali wenga ukunzi.

⁴⁸ Alola yaluchula ukukasa amakasia, kuno unza wali unkomu; na pano yawa manzacha ya usiku, waya kuno yali, angalupita piyulu pa manzi yi yemba, wasita kuyasya.

⁴⁹ Nayo pano yannola alupita pa manzi, yaati: “Kunde imikosi.” Yopa nu kwangula, owe!

⁵⁰ Kuno yoshi yamwine yopa; nga wavwanga nayo, waati: “Tekini myenso, inene, mutachopa!”

⁵¹ Nga wankwela um-wato muno yali, unza wansila, yazunguka leka um-myenso yao.

⁵² Kuno yatamanyile izya mikate ilye, leelo imyenso yao yali mikomu.

Yesu waposya aluale uku Genesaleti

⁵³ Na pano yalamba, yafika insi ya Genesaleti, yanyepelelu wato apilambwa.

⁵⁴ Nayo pano yafuma um-wato, liyo kwene antu yammanya zuwa.

⁵⁵ Yituka ulwilo, yalîla insi yoshi, yatampa ukusenda alwale apa vitala ukuyatwala ponsi pano yapulika ali.

⁵⁶ Na konsi kuno wayile, wingila un-tuzi, nanti imizi nanti ivyalo yaleta alwale uku sokoni, yampapata yamwemye nanti sempele lya mwenda wakwe. Na yoshi yano yamwemizye, yapola.