Malko 5 - UPANGANO UPYA

Yesu waposha ntu wa fiwa

¹ Yaya umbalama yi yemba, yafika un-nsi ya aGelasi.

² Na pano wika um-wato, liyo kwene akomengana nu ntu wino wafuma ku malindi, ali ni chiwa ichiipe.

³ Uwikalo waakwe wali ku malindi, kutali untu nanti wenga wino angannyepa, nanti ku minyololo.

⁴ Kuna walile wanyepwa maila tupu ku choze ni minyololo; aiputula iminyololo ni chose kwene, nga kutali untu wa maka ya kunnuta.

⁵ Na manda yoshi usiku nu nsanya wawanga uku malindi nu ku myamba, angalwangula nu kuichembola-chembola na mafinga.

⁶ Nga pano wawine Yesu ukutali, wituka ulwilo, wamfukamila.

⁷ Wangula ku maka, waati: “Ndi na chani newe, Yesu, Mwana wi Leesa alu mwiyulu. Nakulafya kuli Leesa utachi nchuzya.”

⁸ Kuno wannena, ukuti: “We, chiwa chiipe, fuma uku ntu wi!”

⁹ Wamtondosya, waati: “Isina lyako weni?” Wannena, waati: “Isina lyane ne Legio, kuno tuli tupu.”

¹⁰ Nga apapata nkani kuti atayatwala ukunsi ya nsi ilye.

¹¹ Na palye pa mwamba pali ufyo unkulu wi yakapoli yalulya.

¹² Imyenzo ya viwa yapapata, yaati: “Tutwale muli yakapoli, twingile.”

¹³ Wafisumile. Imyenso ya fiwa yafuma, ingila muli yakapoli, Ngufyo onsi utentenkela uku lwilo ichaponga, ingila muli yemba; nayo yali elfu siili, yanwela muli yemba.

¹⁴ Nga achemi nayo yituka, yaya yalimvya amaswi umunsi num-vyalo; antu yafuma ukuyulola ichatunka.

¹⁵ Yaya kuli Yesu, yannola untu wilye uwali ni myenso ya viwa, atensi aswite umwenda, ali na malango yaakwe ningo, nawe uwino wali Legio; ingofi shayalema.

¹⁶ Na yalye yano yaile yalola yayalandila fino chaombike uku ntu wilye uwa viwa, ni syi yakapoli.

¹⁷ Yatampa ukumpapata atine un-nsi yao.

¹⁸ Nawe pano wakwela um-wato, wino wali ni viwa wampapata, ukuti awe ponga nawe.

¹⁹ Leelo wakana, wannena, waati: “Pita uku ng'anda ukwako, uku yanyonko; ukayasundi ifintu uli fikulu fino Mwene wakuchitila na fino wakulolela inkumbu.”

²⁰ Nga apita, atampa ukusunda um-Dekapoli ifintu vikulu fino Yesu wanchitila; antu yoshi yasunguka.

Mwana-kachi wi Yailo na mama wino waswanga wasi

²¹ Na pano Yesu walamba kaili um-wato ku mbalama, iumba ikulu lyakongana kunali, nawe wali umbali yi yemba.

²² Awiza wikolo wenga uwa ng'anda yi Leesa, isina lyaakwe Yailo, nga pano wannola, wapona pa mulu yaakwe.

²³ Wapapata nkani, waati: “Umwanane nnono kachi ali pa lufu; ndukulomba uwize, umwikile ikasa lyako apa nkola, ukuti apole nu kwikala.”

²⁴ Nga wapita ponga nawe, niumba ikulu lyannondela, lyamfyenenkezya.

²⁵ Nu mwanachi wenga wazwanga wazi imyaka ikumi na yiili,

²⁶ nga wachulila ivinji um-makasa yi yasing'anga tupu, nga wasumba ifintu vyonsi fino ali navyo, nu kupola atapola, nanti uche! Leelo ulwale waakwe usya unji inkolelo.

²⁷ Pano wapulika amaswi yi Yesu, wapisile mwiumba uku chisila, wemye umwenda wakwe.

²⁸ Kuno waatile: “Ngi nemya imyenda yaakwe sile, nampola.”

²⁹ Liyo kwene kafukoka wa wazi waakwe ankama, nawe amanya um-mwili waakwe fino wapola indwala iyo.

³⁰ Liyo kwene Yesu amanya um-mwili waakwe fino amaka yafuma, wasenuka pakasi yiumba, waati: “Uwini wino wangemya imyenda yane?”

³¹ Alondeshi yaakwe yannena, yaati: “Chene! Utawine maumba fino yalukufyenka, nawe usyuti: uwini wangemya?”

³² Walolekesya konsi, kuti alole wino achisile chintu chii.

³³ Umwanachi wiyo ingofi zyannema nu kutetema, amanya chino chiombike kunali, wiza wapona apa nkola, wannena ningo fino chili.

³⁴ Wannena, waati: “Mwana, usumilo wako wakupozya; pita lumi; uwe mpuma uku ndwala yako.”

³⁵ Pano achili aluvwanga, yiza antu kufuma kwa wikolo wa ng'anda yi Leesa, yaluti: “Mwanako kachi atafwa, kuni chani ukuchuzya Kasambilizya?”

³⁶ Leelo Yesu atalanga mweso, wanena uwikolo wa ng'anda yi Leesa, waati: “Utachopa, taila.”

³⁷ Walesizye antu yoshi kunnondela, siku Petlo na Yakobo na Yoane unnina wi Yakobo.

³⁸ Yaya ku ng'anda ya wikolo wa ng'anda yi Leesa, wasana impoma na antu yalulila nu kulosya nkani.

³⁹ Pano wingila ayanena, ati: “Uku chani umuchita impoma nu kulila? Mwana atafwile, leelo awizi sile.”

⁴⁰ Yansekelela nkani. Nga pano wayafumya yoshi apanzi, asenda isi na nyina wa mwana wiyo, na yalye yano yali ponga nawe, wingila ukukasi mnali umwana.

⁴¹ Walema umwana ikasa, waati: “Talita kumi.” ali kuti: “Nsungu nakunena, katuka!”

⁴² Liyo kwene awimilila nsungu wiyo wampita, kuno wali ni myaka ikumi na yiili. Liyo kwene yasunguka leka.

⁴³ Wayalesya yatanena umwi ifintu fi; nga alanda kuti yampe umwana ichakulya.