Malko 4 - UPANGANO UPYA

Unnumbe wi kapela-mbezu

¹ Nga kaili atampa kusambilizya umbali yi yemba. Yankonganila iumba ikulu nkani. Chaleka wakwela um-wato wikala muli yemba, niumba lyonsi lyali umbali yi yemba.

² Ayasambilisha ifintu tupu uku milumbe, wayanena um-masambilisho yaakwe, ati:

³ “Pulikisyini, lolini, kapela wafumile ukuyupela.

⁴ Nga pano wapelanga, imbesu simwi syaponile umbali ya nzila. Ifyuni viza fyakompa.

⁵ Zinina shapona apifinga pano pasi unsili tupu; wene shamela suwa, kuno unsili wachepa.

⁶ Na pano unsanya wawala, shapya, fino sisi ni misisi; shanyala.

⁷ Zinina syapona apa myonga; Imyonga yiyi yamela, yasifyenka, zyaula kufukula.

⁸ Zinina zyapona apa nsili wa ningo, shamela nu kukula, shafukula nu kusêka; yonga makumi yatatu, yonga makumi sita na yonga umwanda.”

⁹ Alanda, ati: “Ali na makutwi ya kupulikila, apulike.”

¹⁰ Nawe pano wali wenga, antu yalye yano yannizizye na yalye ikumi na yaili, yamtondosizye amaswi ya milumbe ilye.

¹¹ Ayanena, ati: “Mwemwi mwapiwa ukumanya amelengwe ya wene-wi-Leesa; leelo kuli yalye alukunzi, vyonsi viluombeka uku milumbe.

¹² Ukuti: ‘ndi yalola, yalole yatamanya; na ndi yapulika, yapulike yatamanya, yaatiza yavipele nu kwelelwa.’ ”

¹³ Wayanena, waati: “Mutamanyile unnumbe uu? Mungamanya uli imilumbe yoshi?

¹⁴ Kapela wiyo akulupela iswi.

¹⁵ Eya yano yali umbali ya nzila, pano lipezilwe iswi, nayo ngi yapulika, awiza Shetani, alitisya liyo iswi lino lipezilwe um-myenzo yao.

¹⁶ Fiyo kwene nayo yano yapezilwe apa mafinga, yano ndi yapulika iswi lili, liyo kwene yalipokelela uku kuchimba.

¹⁷ Leelo unkasi unjakola yasi ni misisi, leelo yikala kazimbo kache; ndi pano malanda na machulo yaloleka ukwiswi liyo kwene, liyo kwene yampona.

¹⁸ Nayo yalye apezilwe apa myonga, antu alupulika iswi liyo.

¹⁹ Ni vya kuno ukunzi na mazosyo ya vyuma nu kulangilila umweso ifintu vinina, vingila vilifyenka iswi liyo, lintuza.

²⁰ Na yano yapezilwe apa nsili uli ningo, antu yano yalupulika iswi liyo nu kulipokelela, nu kusêka ivisêke, wenga amakumi yatatu, na wenga amakumi sita, na wenga umwanda.”

Ikozya ni chilingilo

²¹ Wayanena, waati: “Mwalola uli? Chene! Ikozyo yakuleta kuti yaliwike un-chiyo nanti umwizungu? Asi kuti yawika apa chilemelo chakwe?

²² Kuno kusi iswi nanti chino chafisama, leelo kuti chivumbululwe, nanti chafisama, leelo mpaka chimanyike apatiswe.

²³ Untu ngali na makutwi ya kupulikila, apulike.”

²⁴ Wayanena, waati: “Lolini, fino mulupulika. Ichilingilo chino mululingila, ali chino mululingliwa na kaili mulongeziwa.

²⁵ Kuno wino ali ni chintu, alupiwa, na wino asina chimwi, na chilye chino ali nacho alupokwa.”

Milumbe apa wene-wi-Leesa

²⁶ Walanda, waati: “Uwene-wi-Leesa, unnumbe waakwe chikoline na ntu wino wanyampa imbezu apansi.

²⁷ Awa lulala nu kukatuka, usiku nu nsanya, imbezu zyamela nu kukula, fino atamanyile.

²⁸ Kuno insi ilukuzya inkola, itangula imezya ifwa, kaili untwe apano ni impeche zya ngano uku ntwe.

²⁹ Na ndi zyacha, liyo kwene ayu kuyusakata, kuno imbezu zizikoma.”

³⁰ Walanda, waati: “Tuukolanye na chani uwene-wi-Leesa? nanti tuutele un-nnumbe uli?

³¹ Ukoline nu lupeche lwa Aladadi, luno lulupelwa pansi, nanti fino ulunono ukuluta impeche zyonsi,

³² leelo ngi lwapelwa lukukula nkani kuluta vimela vyonsi ivya n-chalo ivya visêke, ichita matai amakulu, apalinji ni vyuni vya nchundu vimwa nu kwikala un-chisau chakwe.”

³³ Uku milumbe tupu ndi fi wavwangaa nayo iswi lyaakwe fino yangapulika.

³⁴ Leelo pasu nnumbe atayafwansyanga, leelo ayalolwela alondeshi yaakwe unkola ifintu fyonsi uku mbali.

Yesu wamyalasha chipupu

³⁵ Uwanda ulye pano yawa mangusi wayanena, waati: “Tulambe umbalama.”

³⁶ Yasha iumba, yansenda fifi kwene finali um-wato; na mato manina yali ukuli konga nawe.

³⁷ Ngi chipunga chikulu chikatuka, na maimbi yumu wato, watangula kushula mansi.

³⁸ Nu nkola wala pi pinda lya wato, angatalala pa nsamilo. Yannansha yannena, yaati: “Kasambilisha, chisi chimwi kuli wewe, fino tukufwa?”

³⁹ Walanka, waukalipila unza, wanena yemba, waati: “Tusha, uwikale chele!” Unsa wansila, kwawa chele.

⁴⁰ Wayanena, waati: “Ifino muli ni ngofi? Muchili musumile nali kwene?”

⁴¹ Ingofi shayalema nkani, yanenana, yaati: “Uwini wi leelo, wino unsa na yemba filumpulika?”