Malko 3 - UPANGANO UPYA

Yesu wapozya ntu wino walemala ikasa

¹ Aingila kaili un-ng'anda yi Leesa, na kuwo pali untu wali nikasa lyalemala.

² Nga yannolekesha ndi akumposha uwanda wa Sabato, kuti yakamsongelele.

³ Nga wannena untu wino walemala ikasa, waati: “Imilila pakasi.”

⁴ Wayatondosya, waati: “Chili ningo uwanda wa Sabato ukuchita ifisipe nanti ukuchita iviipe? Kufyusha mweso naanti ukuumola?” Yatusha chele.

⁵ Nga wayakundwile amaso konsi kuno yali uku chilakali, alola chikonko uku wukomu wa myenso yao, anena untu wiyo, ati: “Olola ikasa lyako!” Nawe walyolola ikasa lyaakwe, lyawi puma kaili.

⁶ Pao kwene yantina aFaliseo nga yafwaanga yamba ponga na antu yi Yelodi, ifyakuti yamumole.

Yesu ni fiwa viipe

⁷ Yesu na alondeshi yaakwe yaya kuli yemba. Iumba ikulu lifuma ku Galilea linnondela, niumba linina lifuma ku Yudea,

⁸ nuku Yelusalemu nu ku Idumea nu ku Yodani mbalama zilye nu ku mbali ya Tilo na Sidoni yaile kunali, iumba ikulu. Pano yapulika amaswi yaakwe yano wachitanga.

⁹ Wanena alondeshi yaakwe ukuti uwato unono wikale apipi nawe, kuno iumba lya antu litamfyenenkesha.

¹⁰ Kuno waposishe ainji, chaleka alwale yoshi yamfyenenkesha, kuti yannemeleme.

¹¹ Ni myenso ya chiwa, chila pano yannola, ipona pansi panali, ilila, iti: “Wewe uli Mwana wi Leesa.”

¹² Nga ayilesha nkani, kuti itammanyisha konsi.

Yesu wasolola alondeshi ikumi na yaili

¹³ Nga kwela um-mwamba, awita yano akasime unkola, yaya kunali.

¹⁴ Wawika antu ikumi na yaili, angi yali ponga nawe, nu kuyatuma ukusunda.

¹⁵ Kaili yawe na maka ya kutisya imyenzo yi chiwa.

¹⁶ Wayawika ikumi na yaili; na Simoni wampa izina li Petlo.

¹⁷ Na Yakobo, umwana wi Sebedeo, na Yoane, unnina wi Yakobo, ayapa isina lyi Boanega, alikuti: Ana ya nunkumo.

¹⁸ Na Andelea na Filipo, Batolomeo na Mateo na Toma na Yakobo, mwana wi Alifeo, na Tadeo na Simoni mKananeo,

¹⁹ na Yuda Iskaliote, wino wamfimile.

Yesu na Beelsebuli

²⁰ Nga wingila un-ng'anda. Iumba lya antu likongana kaili, kufika nakola yapotwa nu kulya ichulya; kutali fwasi.

²¹ Nga a luko lwakwe pano yapulika fiyo, yafumile ukuyunnema. Kuno yatangi: “Watapena.”

²² Nga yakaandika yaile ukufuma uku Yelusalemu, yalanda, yaati: “Ali na Beelsebuli, na ku wikolo wa viwa aluwinga iviwa.”

²³ Nga ayita kunali, ayanena uku milumbe, ati: “Ichiwa chingawinga ichiwa chinina wuli?

²⁴ Nga ndu wene waipalunkanya wonga, uwene ungashala wimilile?

²⁵ Ndu luko lwaipalunkanya longa, uluko lu lutangi ushale lwimilile

²⁶ Ni Shetani ndi waatina onga, waupalula, kutangi kushala chimwi kaili, leelo chinsila.

²⁷ Kusi untu wino angingila un-ng'anda ya ntu wa maka nu kutola ifintu vyaakwe, mpaka atangula anyepe uwa maka, apano angatola ivya ng'anda.

²⁸ uMwenemo ndumunena: amaifyo yoshi antu yalwelelwa, ni misuli yao yino yalusula kuli Leesa.

²⁹ Leelo untu wacha wasula Mweso Nswefu, atalwelelwa manda ti. Leelo aluwa ni yifyo lya manda ti.”

³⁰ Kuno yaatile: “Ali ni chiwa.”

Yesu na a luko lwakwe

³¹ Nga nyina nanina yiza, yimilila apanzi, yatuma untu kumwita.

³² Niumba lyalile likala, lyannisishe, yanena, yaati: “Lola, nyoko na nyonko yala panzi. Yalukusita.”

³³ Nawe wayanena, waati: “Mama na chane ayani?”

³⁴ Walolekesha yano yatensi yannisha konsi konsi, waati: “Lolini, mama na chane.

³⁵ Kuno untu wensi uwacha wachita fino Leesa akasime, wiyo ali uwachane nu nsiche wane na mama wane.”