Malko 2 - UPANGANO UPYA

Yesu waposha ntu witenda

¹ Walangi amanda yamwi yasila awela un-Kapenaumu; nga chimanyika fino alu un-ng'anda.

² Nga yakongana antu tupu, nu mweko wuwula na pa nnyango kwene, nga asunda amaswi yaakwe.

³ Nga yiza antu yannetela untu wino wikala itenda, asenzilwe na antu yani.

⁴ Nga lino yapotwa uku mpalamila uku winji wa antu, yalimbulwile idali, yatulula pano ali, nga pano yatulula, isya ichitala chino walalile untu witenda.

⁵ Nga Yesu lino walola utailo wao, wanena unwale witenda, waati: “Mwanane, welelwa amaifyo yako.”

⁶ Leelo yakaandika yamwi atenzi-po, nga yelengula um-myenzo yao, yaati:

⁷ “Uku chani untu wi aluvwanga imisuli mitupu fi kuli Leesa; alusula. Uwini angelela amaifyo asi Leesa wenga?”

⁸ Liyo kwene Yesu amanya um-mweso waakwe fino yalwelengula fi um-myenzo yao, wayanena, waati: “Ifino mulwelengula fi um-myenzo yino?

⁹ Chene! ichangupazu chilikwi, kunena uwitenda: Maifyo yako yalelwa; nanti ukuti: Katuka, wutwike ichitala chako, upite?

¹⁰ Leelo mumanye fino Mwana-ntu ali na maka kuno ukunzi ayaakwelela amaifyo, pao alunena uwitenda:

¹¹ Ndukunena, katuka, usende ichitala chako, upite uku ng'anda ukwako.”

¹² Liyo kwene wankatuka, wambutwika ichitala chakwe, wampita apa maaso yao yoshi; yazunguka yoshi, yatensya Leesa, yaati: “Alavi tutachili tulole nanti uche!”

Kwitwa kwi Levi

¹³ Kaili afuma apita umbali yi yemba, ngiumba lyonsi likongana kunali, ayasambilizya.

¹⁴ Nga pano wapita, alola Levi umwana wi Alifeo, atensi apa folozani, wannena, waati: “Ndondela.” Nawe wankatuka nu kunnondela.

¹⁵ Nga pano watensi apa chulya un-ng'anda mwakwe, yakalifya yikodi na yamaifyo yatensi apali ponga na Yesu na alondeshi yaakwe. Kuno yala yinji angi yannondile.

¹⁶ Lino yakaandika na aFaliseo yannola alulya ponga na yakalifya yikodi na yamaifyo, yanenile alondeshi yaakwe, yaati: “Nga fino alulya ponga na yakalifya yikodi na yamaifyo?”

¹⁷ Nawe Yesu wapulika, ayanena, ati: “Apuma yatangi yasite sing'anga, nkambi alwale. Ntizilu ita ayachumi, leelo ayamaifyo.”

Kuizilisha fyakulya

¹⁸ Nayo alondeshi yi Yoane na aFaliseo yaushilisha fyakulya, nga yisile yannena, yaati: “Uku chani alondeshi yi Yoane na alondeshi ya aFaliseo yauzilisha fyakulya, leelo alondeshi yako pole?”

¹⁹ Nawe Yesu wayanenile, waati: “Chene! Asindikile yangauzilisha na siwinga ali ponga nayo? Pano siwinga ali ponga nayo, yatangi yauzilizye.

²⁰ Leelo amanda yalwiza yano siwinga wacha wawa asipo, apano yalusilisha wanda uo.

²¹ Kusi untu akutela ichilaka cha mwenda umpya uku mwenda wa kali, ngalusuma; chichi chipya chino chatelwa chikulonona umwenda wa kali na pano palepuka pakulukula.

²² Na kushi untu akutela amasi ya nsabibu un-nyingu ya kali; ndi watela amasi mapya, singalepuka inyingu siyo, amasi itike, nyingu syononeke. Leelo angateka amasi mapya ku nyingu impya.”

Yesu, Mwene wa Sabato

²³ Nga pano wapitanga um-fyalo uwanda wa Sabato, alondeshi yaakwe pano yalupita un-nzila, yakuntola imitwe ya ngano.

²⁴ aFaliseo yannena, yaati: “Lola fino yachita lino litaile kuchita uwanda-wi-Leesa?”

²⁵ Nawe wayanena, waati: “Mutachili musome ponsi fino Daudi wachisile, pano wachuzile nu kulola inzala, unkola na achakwe?

²⁶ Vino wingile un-ng'anda yi Leesa, um-manda ya kali yi Kapela-nkulu Abyatali, wailya imikate ya Ulangizyo, yino chisi ningo unkola ukuilya, leelo kuli yakapela sile, wapa na achakwe?”

²⁷ Nawe wayanena, waati: “Wanda wa Sabato wachisilwe ku untu, asi untu wachisilwe uku wanda wa Sabato.

²⁸ Ichino Mwana-ntu ali Mwene kwene wa wanda wa Sabato.”