Malko 16 - UPANGANO UPYA

Yesu watutuluka

¹ Na pano uwanda wa Sabato wasila, Malia Mandalena na Malia nyina wi Yakobo, na Salome yakazile amafuta, kuti yakampake.

² Na katondo-tondo, wanda wa kutampa ijuma, yaile ukwilindi, pano ilanzi lyapalala.

³ Yatondosyana atupu, yaati: “Uwini wautukunkila ifinga lili apilindi?”

⁴ Nga pano yalola, yawine fino ifinga lili isunkulusye; nalyo lyali ikulu ndi.

⁵ Pano yingila umwilindi, yalola unnumendo atensi uku lusansa lwi lunji, aswite umwenda untiswe, nga yachintukila.

⁶ Nawe ayanena, ati: “Mutachi chintukila; mulusita Yesu wa ku Nazaleti, wino wakonkomilwe apa nsalaba; watatutuluka, asipo pa; lolini pano yamwisile.

⁷ Leelo pitangi, mukanene alondeshi yaakwe na Petlo, ukuti: wamukolelela ukuyu ku Galilea, ukuno mulunnola, ndi fino wamunenile.”

⁸ Nga yafuma ukunsi, yituka kufuma ukwilindi, kuno yali ni ngofi nu kutetema. Na yatachili yanena umwi iswi, kuno yofile. [

Yesu waloleka uku yantu. Watuma alondeshi

⁹ Nawe pano watutuluka untondo-tondo, wanda wa kutampa ijuma, intangulo walolike na Malia Mandalena, wino waatisiziwe iviwa saba.

¹⁰ Nawe wayile anena yano yali ponga nawe, nayo yalile yachili yalulila nu kulosya.

¹¹ Nayo yao pano yapulika fino umpuma, nawe watannola, yatachili yazumile.

¹² Ichisila cha ifintu vi walolike ku yantu yaili pali yeneyo, angali nu mwata unji, nayo yayanga uku vyalo.

¹³ Nayo yao yapita yaya yanena anji; nayo kwene yatachili yayazumile.

¹⁴ Ichisila cha ifintu fiyo, aloleka na yalye ikumi na wenga, pano yalyanga, wayasunda uku kuntazumila kwao nu ukomu wa myenso yao, kuno yatachili yayazumile yalye yano yamwine pano watatutuluka uku yafwi.

¹⁵ Wayanena, waati: “Pitini un-nsi monsi nu kusunda iswi-zipe uku vilengwa vyonsi.

¹⁶ Uwazumila nu kubatiziwa, alufyuka; leelo wino atasumile aluya umu uputuzi.

¹⁷ Ni vilangizyo vi vilulondela azumile; ukwizina lyane yalufumyi viwa, yaluvwanga imivwango mipya.

¹⁸ yalulema inzoka; nanti yanwa chimwi ichakuyumola, chitangi chiyakole nanti uche; yaluwika makasa yao apa yalwale, nayo yalupola”.

¹⁹ Ngu Mwene Yesu lino wavwanga nayo, wapokelelwa umwiyulu, wikala ikasa lyi lunji lyi Leesa.

²⁰ Nayo yao yapita yasunda konsi konsi, uMwene angaluomba ponga nayo, nu kukomya iswi liyo ku vilangizyo fino vyalondekine nalyo.]