Malko 14 - UPANGANO UPYA

Yesu wapakwa mafuta. Yuda wazumila ukumfima

¹ Ni chisila cha manda yaili wali uwanda ukulu wa Pasaka, ni mikate-isi-ninsasyo. Ayikolo iyakapela na yakaandika yasita inzila ya kunnema uku uchenjezu nu kumumola.

² Kuno yalile yaati: “Chitawa pa wanda ukulu, kutache kuwe ni mpanzyela unjantu.”

³ Nawe pano wali uku Betania un-ng'anda yi Simoni wa ntana, pano ali apa chakulya, awiza umwanachi ali nu nsazi wa mafuta ya nalido aya mpia tupu; atama unsazi awitulwila amafuta apa ntwe wakwe.

⁴ Pali antu yamwi yalakalike, yaati: “Uku chani ukulovya mafuta vi?

⁵ Kuno amafuta ya yali yakalwe uku mpia imyanda yitatu nu kuluta, yapiwe apina.” Yannakalikila nkani umwanachi wiyo.

⁶ Leelo Yesu wavwanga, waati: “Nnekini, uku chani mulumchuzya? Anchitile ichazipa.

⁷ Kuno amanda yoshi apina yali ponga nemwe, mungayachitila ichizipe chino mukasime, leelo nemwi musi nene manda yoshi.

⁸ Watachita chino awezizye, wapaka umwili wane inkolelo ya kunzyika.

⁹ uMwenemo ndumunena, konsi kuno iswi-zipe lilusundwa un-nsi yoshi, alachi chino umwanachi wachita chilulandwa uku kumwizukila.”

¹⁰ Pali yaya ikumi na yaili, wenga Yuda Iskaliote, ayu ku yikolo iyakapela, kuti amfime kuno yali.

¹¹ Nayo pano yapulika, yachimba yannanya ukumpa impia. Wasita inzila ya kumfima uwanda uno uzifile.

Wanda wa Pasaka

¹² Nu wanda wa ntangulo wa mikate-isi-ninsasyo, pano yafyuzile iPasaka, alondeshi yaakwe yannenile, yaati: “Api pano ukasime ukulyila iPasaka yi tukakuteye?”

¹³ Watuma yaili apa alondeshi yaakwe, waati: “Yangini uku nsi, mwankomengana nu ntu asensile ichalusi cha mansi, munnondele.

¹⁴ Na pano wingila, munnena unkola ng'anda, muti: ‘Kasambilizya aluti: Chilikwi ichumba chane icha eni, ndyile iPasaka muo ponga na alondeshi yane?’

¹⁵ Nawe unkola akumulanga chumba ichikulu ukwi golofa, ichiteye. Twimwile-mu.”

¹⁶ Nga alondeshi yafuma yayu uku nsi, yaya yalola ndi fino ayanenile; yateyanya iPasaka muo.

¹⁷ Nga pano yawa mangusi, awisa na yalye ikumi na yaili.

¹⁸ Na pano yalile iyikala apa chulya, Yesu wayanenile, waati: “Umwenemo ndumunena: wenga pali mwemwe, nawe alulya ponga nene, alunfima.”

¹⁹ Nga yalola ichikonko yamtondosya wenga wenga, yaati: “Chene! Nene?”

²⁰ Ayanena, ati: “Ali wenga pali ya ikumi na yaili, wino wasonda ponga nene un-nweso.

²¹ Kuno Mwana-ntu wapita fino waandikilwe, leelo akalanda uku ntu wiyo wino wamfima Mwana-ntu; change chizipe untu wiyo ndi atala vyalwe.”

Chakulya cha Mwene

²² Nayo pano yalyanga, watozile unkate aupepelela, aukunyola ayapa, avwanga, ati: “Tolini, alau mwili wane.”

²³ Nga atola untonto, asamalizya, ayapa, yanwela yoshi.

²⁴ Ayanena, ati: “Alau uli wazi wane uwa Upangano, uno ulwitika uku yantu tupu.

²⁵ Umwenemo ndumunena: ntalunwa kaili amasi ya nsabibu, kufika uwanda wuwu uno ndunwa apya um-wene-wi-Leesa.”

Yesu walanda fino Petlo wammkana

²⁶ Nga pano yamala ukulunda, yafuma yapita ukuya uku mwamba wa Mizeituni.

²⁷ Yesu ayanena, ati: “Mwanfwitoka mwemwi mwensi pa nnandu wane, kuno chaandikwe: ‘Nammuma unchemi ni nfwele zyansambala.’

²⁸ Leelo apa kututuluka kwane ndumukolelela ukuyu ku Galilea.”

²⁹ Petlo wannena, waati: “Nanti yakusya yoshi, leelo nemwi pole.”

³⁰ Yesu wannena, waati: “Umwenemo ndukunena wewe, ilelo usiku wu, pano nkolwe achili alamule amaila yaili, wannkana amaila yatatu.”

³¹ Leelo nawe avwanga na maka, ati: “Nanti ukufwa, namfwa ponga newe, napo kwene nsukukana nanti uche.” Yoshi yavwanga fiyo kwene.

Yesu un-Getsemane

³² Nga yiza ukwitimba lino yakuluti: “Getsemane,” anena alondeshi yaakwe, ati: “Wikalini pa, pano njilu pepa.”

³³ Wasenda Petlo na Yakobo na Yoane ponga nawe. Atampa kusima nkani nu kusamala.

³⁴ Ayanena, ati: “Umweso wane uli na malanda nkani nanti ukufwa; wikalini pa mutachilala.”

³⁵ Aya pa nkolelo uche, apona pansi, apepa ukuti: “Atachiya um-machulo ndi chingawela.”

³⁶ Avwanga ukuti: “Aba, Tata; vyonsi vingaombeka kuli wewe, untisizye ulwako lu kuli nene; leelo chitaombeka fino nkasime nene, leelo chiombeke chino ukasime wewe.”

³⁷ Nga awiza azana iyalala utulo, wanena Petlo, waati: “Simoni, ukulala? Wapotwa ukuntalala nanti insaa yonga?

³⁸ Mutachilala, pepini, mutachimwingile um-mazosyo; umweso ukasime, leelo umwili utonsile.”

³⁹ Aya kaili apepa iswi lili kwene.

⁴⁰ Apiluka kaili azana iyalala, kuno amaso iyalemeka nu utulo; nga yatamanyile ni chakunnena.

⁴¹ Wisa ilya utatu, ayanena, ati: “Ali lalini, puzini; chi chilingana; kazimbo ikafika, lolini Mwana-ntu watelwa um-makasa iya maifyo

⁴² Katukini tupite; lolini wino alunfima watapalamila.”

Yalema Yesu

⁴³ Nga pano achili aluvwanga, liyo kwene Yuda awisa, wiwi uwikumi na yaili, ponga nawe iumba yali ni mpanga ni nonga, yafuma uku yikolo iyakapela na yakaandika na yikolo.

⁴⁴ Na wino alumfima walile watayapa akamanyililo, ati: “Wino natoswela uwiyo kwene; innemini, mnsende ningo.”

⁴⁵ Nga lino wiza wiyo kwene aya kunali, avwanga, ati: “Labi.” Wantosola.

⁴⁶ Yakatusya makasa yao, yannema.

⁴⁷ Nga wenga pali yano yalipo, asomola impanga, akoma unzya wi Kapela-nkulu, amsesula ikutwi.

⁴⁸ Yesu ayanena, ati: “Umufuma kuti myilulema ukulu poka-ivyayantu, muli ni mpanga ni nonga, ukundema nene?

⁴⁹ Manda yoshi nali pali mwemwe un-ng'anda-nkulu-iyi-Leesa, angi ndusambilizya, mutandema; leelo ifintu vi vyaloleka ukuti aMaandiko yafikilile.”

⁵⁰ Apano alondeshi yamsya, yituka yoshi.

⁵¹ Nu nnumendo wenga wannondile, wakuwile uku mwili waakwe umwenda untiswe, yannema.

⁵² Nawe wasya umwenda uo untiswe, wituka tupu.

Yesu mwitengo

⁵³ Pano yasenda Yesu kwi Kapela-nkulu, yankonganila yoshi ayikolo iyakapela na yikolo na yakaandika.

⁵⁴ Petlo nawe wannondela lwa patali, afika unkasi um-nsolo wi Kapela-nkulu, anga tenzi ponga na asalifi, alota umoto.

⁵⁵ Nga yikolo iyakapela na kombe yoshi, yasita usyuta kuli Yesu, kuti yamumole, leelo waula.

⁵⁶ Kuno ainji yamsyutile ufi, leelo nusyuta wao waleunkana.

⁵⁷ Na yamwi yimilile yamsyutile ufi, yaati:

⁵⁸ “Sweswe twampulike, aluti: ‘Nene nampomola ng'anda-nkulu-iyi-Leesa, yino yakuzilwe uku makasa, nu ku manda yatatu ndukula inina yino italukulwa uku makasa.’ ”

⁵⁹ Leelo na fiyo kwene usyuta wao utakomengine, waleunkana.

⁶⁰ Apano Kapela-nkulu wimilile apakasi, watondosya Yesu, waati: “Utaluvwanga chimwi? Alaya yalukutakila chani?”

⁶¹ Leelo atuzya, atavwanga chimwi. Kapela-nkulu wamtondosya kaili, waati: “Wewe uli Klisto, Mwana wa Mpepelelwa?”

⁶² Yesu avwanga, ati: “Ali nene; nemwe mululola Mwana-ntu atensi ikasa lya kwi lunji ilya Maka, alwisa na mapufi ya mwiyulu.”

⁶³ Kapela-nkulu walepola imyenda yaakwe, wafwaanga, waati: “Tulusitila yasyuta chani kaili?

⁶⁴ Mwapulika imisuli yaakwe; mwalola uli nemwe?” Yoshi yamputwila, yaati: “Chinjile ukumolwa.”

⁶⁵ Yamwi yatampa ukunswila amati, yamkuwa ukumanso nu kumuma vikonde, yannena, yaati: “Lauzya!” Na asalifi nayo yamuma makofi.

Petlo wamkana Yesu

⁶⁶ Nga Petlo wali um-nsolo apansi; awisa umwi apa asungu yi Kapela-nkulu.

⁶⁷ Annola Petlo alotu moto, wamkundwile amanso, wavwanga, waati: “Newe kwene wali ponga na wiwi Yesu umNasaleti!”

⁶⁸ Wakana, waati: “Ntamanyile nanti ukupulika fino ululanda uwewe.” Afumila apansi unduselelo.

⁶⁹ Na wiwi umuofi annola kaili, atampa kuyanena yano yimilile palye, ati: “Alawi unnina wao.”

⁷⁰ Wakana kaili. Kazimbo kache kaili yano yimilile palye, yannena Petlo, yaati: “Umwenemo, wewe unnina wao, kuno wewe umGalilea.”

⁷¹ Atampa kutipa nu kulapa, ati: “Ntamanyile untu wi wino mulutaka.”

⁷² Liyo kwene nkolwe alamula ilya uwili. Petlo wisukila iswi lili lino Yesu wannenile, ukuti: “Pano nkolwe achili alamula luwili, ulunkana amaila yatatu.” Nga watalika ukulila.