Malko 12 - UPANGANO UPYA

Alimi ni chalo cha mizabibu

¹ Atampa ukuyavwanzya uku milumbe: “Untu wenga wapezile ichalo cha mizabibu; apindilila, awimba ichilina cha kukamila, akula ichipanda, awika alimi, ampita.

² Na pano vyacha, atuma umuofi kuli yalye alimi, ukuti aulile uku yalimi visêke vya mizabibu.

³ Yannema, yamuma, yamwinga minwe.

⁴ Atuma unzya unji kaili kuno yali, nawe yamuma uluma lwa vilonda uku ntwe, yankang'antizya.

⁵ Nga watuma unji na wiyo yamumola, na yanji ainji; yamwi yayuma na yamwi yayumola.

⁶ Nga asyala wenga, umwana nkundikwa; wiyo nawe ichisila amtuma kuno yali, avwanga, ati: ‘Yamchindika umwanane.’

⁷ Leelo alimi yao yanenana, yaati: ‘Umpyani wi; tumumole, ngu upyani wusyale uwitu.’

⁸ Nga yannema yamumola, yansumbila ukunzi ya chalo cha mizabibu.

⁹ Alu nkola chalo cha mizabibu, angachita uli? Alwiza nu kuyumola alimi yao ni chalo cha mizabibu alupa anji.

¹⁰ Nanti Ilyandiko li, mutachili musome: ‘Ifinga lino yakakula yasula, ilino lyawa ifinga ikulu ulya kumbali.

¹¹ Iswi li lifumile uku Mwene, nalyo lyatuzungusya apa maaso yitu.’ ”

¹² Nga yasita kuti yanneme, leelo yopa iumba; kuno yamanyile fino unnumbe uo ayumile akola. Nga yansya yampita.

Kulipa Kaisari ikodi

¹³ Nga yantumile yamwi aFaliseo na yaYelodi, kuti yanneme uku maswi.

¹⁴ Pano yafika yannena, yaati: “Kasambilizya, tumanyile fino wewe wa chumi, kuno utalondile uwikolo wa antu, nanti ukulola usyu wa antu, leelo ululangilila inzila yi Leesa ningo. Chiile ukupa Kaisali ikodi nanti awe? Tumpe, tutachimpa?”

¹⁵ Wene fino amanyile ufi wao, ayanena, ati: “Uku chani mulungesya? Ndetelini ihela njilole.”

¹⁶ Yaileta. Ayanena, ati: “Usyu wini u, na maandiko ya?” Yannena, yaati: “Uwi Kaisali.”

¹⁷ Nga Yesu ayanena, ati: “Kaisali mpini ivyaakwe, na Leesa ivyi Leesa.” Iyazunguka nkani.

Apa ututuluko

¹⁸ Nga aSadukeo, antu yano yakuluti: kusi ututuluko wa yantu, yaya kunali, yamtondosya, yaati:

¹⁹ “Kasambilisya, Mose watulembela ukuti untu ndi wafwa, nawe ali nunnina, wasya unchi asi nu mwana, unnina apyane unchi wiyo, kuti avyale nawe ana.

²⁰ Nga kwali aliyonga saba, isilenzi apindula, afwa, atasya ana.

²¹ Nu wa uwili amtola, afwa atasya ana. Nu wa utatu fiyo kwene.

²² Apalinji yoshi saba, yatasile ana. Ichisila chi yoshi nawe umwanachi wiyo wanfwa.

²³ Apa kututuluka kwa yafwi, aluwa inka wini pali yao. Kuno yoshi saba yamtozile.”

²⁴ Yesu ayanena ati: “Chene! Mutalowa kuli chi. Kuno mutamanyile aMaandiko nanti amaka yi Leesa?

²⁵ Kuno pano yalututuluka uku yafwi, yatalupindula nanti ukupindukwa. Leelo yaluwa wi yamalaika ya mwiyulu.

²⁶ Nu ku maswi ya yafwi ukuti yalututuluka: Mutachili musome un-chitabu chi Mose, unnyango wa katûtu, fino Leesa wannenile, waati: ‘Nene ndi Leesa wi Ablaamu na Leesa wi Isaka na Leesa wi Yakobo?’

²⁷ Wene asi Leesa wa yafwi, leelo uwa yapuma. Fiyo mululowa nkani.”

Ichilangaso ichikulu

²⁸ Na pali yakaandika, kaandika umwi awiza apulika yaluvwanga, nawe amanya fino wayazumilizya ningo, amtondosya, ati: “Apa vilangaso vyonsi, ichilangaso cha ntangulo ichili kwi?”

²⁹ Yesu annena, ati: “Icha ntangulo ichi: ‘Pulikini mwe yaIslaeli. uMwene Leesa witu, ulu Mwene wenga.

³⁰ Newe ukunde uMwene Leesa wako uku mweso wako wonsi nu ku upuma wako onsi nu ku mano yako yoshi, nu ku maka yako yoshi.’

³¹ Ni cha uwili ichi: ‘Ukunde nnyonko ndi fino waukunda.’ Kusi chilangaso chinina ichikulu ukuluta vi.”

³² Kaandika wiyo wannena, waati: “Umwenemo Kasambilizya, walanda ningo, ukuti Leesa ali wenga nanti kusi unnina leelo wenga.

³³ Nu kumkunda ukumweeso wako wonsi nu ku mano yoshi na maka yoshi nu kukunda unnyonko ndi fino wauuunda wenkola, kwazipa kulusile uwila wa kuocha nu uwila onsi.”

³⁴ Nawe Yesu pano wawine fino wavwanga ningo uku mano, wannenile, waati: “Wemwi usu kutali nu wene-wi-Leesa.” Na kutali untu wino wachili amtondosye kaili iswi kufuma pao.

Mwana nu Mwene wi Daudi

³⁵ Nga Yesu pano alusambilizya un-ng'anda-nkulu-iyi-Leesa, ayanena, ati: “Yakululanda uli yakaandika ukuti Klisto umwana wi Daudi?

³⁶ Daudi unkola wavwanzile uku Mweso Nswefu, ati: ‘uMwene wanenile uMwene wane, ati: Uwikale ukwikasa lyane lya kwi lunji, fika na lino nacha nawika asiluembu yako apansi apa mulu yako.’

³⁷ Daudi unkola atile: ‘uMwene,’ nga wawa umwana uli?” Niumba ikulu lyampulikisyanga ku kuchimba.

Yesu wasokezya antu kuli yakaandika

³⁸ Ayanena um-masambilizyo yaakwe, ati: “Chenjelelini yakaandika yano yakunda ukupitana yazwite imyenda imitali nu kulaulwa um-masokoni.

³⁹ Nu kwikala uku nkolelo un-ng'anda zyi Leesa, nivisumbi vya nkolelo umvyakulya.

⁴⁰ Ayano yalulya ing'anda zya yasimbe nu ku uchenjezu wao uipe, yakusalika insala yalundulula; yao yaluputwilwa uputuzi unwamu nkani.”

Wila wa umwanachi umpina

⁴¹ Nawe awikala apipi ni mbokosi ya mpia, alola fino iumba lilutela impia um-mbokosi; asavi ainji yatela ivivuzu.

⁴² Awiza umwanachi wenga unsimbe, nawe umpina, watela isenti ziili, ali hela yonga.

⁴³ Nga awita alondeshi yaakwe, ayanena, ati: “Umwenemo ndumunena, unsimbe umpina wi, watatela ukuluta yoshi yano yalutela um-mbokosi ya mpia.

⁴⁴ Kuno yao yoshi yatezile simwi kufuma ku uvuzu wa usavi wao. Leelo wi um-upina wakwe, watela vyonsi fino ali navyo. Ali vyonsi vyaakwe na swe.”