Malko 1 - UPANGANO UPYA

Yoane Kabatisha wasunda

¹ Intangulo yi iswi-sifu li Yesu Klisto, uMwana wi Leesa.

² Vino chaandikwe muli ilau Isaya: “Lolini, natuma untu wane inkolelo yako, akukuteyanyisisha insila yako.

³ Iswi lyi umwi lilulaisha un-nyika: Teyanyangini insila ya Mwene. Ololini muno alupita.”

⁴ Yoane wisile wabatishanga un-nyika nu kusunda lubatisyo lwa ufyusi wa kwelela amaifyo.

⁵ Nga yooshi yasi ya aYudea na ya m-Yelusalemu yooshi yayile kunali, ayabatisha un-nusi lwa Yodani, pano yafipela amaifyo yao.

⁶ Na Yoane waswiite mafumbu ya mtwanga-mwendo nu nkowa wa nkwela um-nsana, walyanga makanta nu wuchi wa nchundu.

⁷ Wasundile, nati: “Wamwisa uku chishila chane, wino ali na maka ukunduta nene, wino nemwi ntalingine nu kwinama ntolompole imikowa ya nfwato shaakwe.

⁸ Nemwi namubatisisha um-maasi, leelo wene alumubatisha nu Mweeso Nswefu.”

Yesu wabatishiwa nu kweshiwa un-nyika

⁹ Nga chali um-manda yalye, Yesu wishile ukufuma uku Nasaleti ya m-Galilea, abatishiwa na Yoane um-Yodani.

¹⁰ Nga liyo kwene, lino alufuma um-maasi, alola iyulu lyalepuka, nu Mweeso alumwikila panali wa nkuunda.

¹¹ Niswii liifuma umwiyulu, liti: “Wewe mwanane nkundwa, nduchimba newe.”

¹² Liyo kwene Mweeso wantisya waya uku nyika.

¹³ Nga wawa kuwo un-nyika amanda amakumi yani, angalweshiwa na Shetani, nawe wali ponga ni nyama sha nchundu. Na yamalaika yamwaswanga.

Yesu watampa kusuunda nu kwita alondeshi yani

¹⁴ Nga lino Yoane wanyepelwe uku nyololo, Yesu waile uku Galilea angalusunda iswi-isifu ili Leesa,

¹⁵ ati: “Amanda iyafika nu wene-wi-Leesa iupalamila; vipelini nu kuzumila iswi lya mene.”

¹⁶ Nga pano wapitanga umbali yi yeemba wa Galilea, walola Simoni na Andelea unnina wi Simoni, yalusumba masumbu muli yemba, kuno yeelanga.

¹⁷ Nga Yesu ayanena, ati: “Nguni mundondele, nene ndumuchita yakela ya yantu.”

¹⁸ Liyo kwene yasya masumbu yao, yannondela.

¹⁹ Waile inkolelo wuche, alola Yakobo umwana wi Sebedeo na Yoane unnina, nayo kwene yali um-wato angi yalulimba amasumbu yao.

²⁰ Liyo kwene wayita; yasya isi wao Sebedeo um-wato ponga na aluomba kunali, yapita ukunndondela.

Yesu waposha ntu wa chiwa uku Kapenaumu

²¹ Yalondela insila yafika uku Kapenaumu; na liyo kwene uwanda wa Sabato, aingila un-ng'anda yi Leesa, asambilisha.

²² Yazunguka leka uku masambilisho yaakwe, kuno wayasambilishanga kanti untu wa maka, asi wi yakaandika.

²³ Liyo kwene pali untu wa mweso wa chiwa un-ng'anda yi Leesa, waangile,

²⁴ waati: “Yesu wa ku Nasaleti, tuli na chani newe? Chene! uwisa ukwisa tonona? Nkumanyile wewe wini: Wenswefu wi Leesa.”

²⁵ Yesu wamkalipila, waati: “Tusha, fuma muliwi!”

²⁶ Umwenso wa chiwa wanfulukusha kanti uwa chifumfumi, walila ukwiswi ikulu nu kufuma.

²⁷ Yasungwike yooshi nu kutondoshana, ukuti: “Ichani chi? Amasambilisho mapya kuno uku maka! Aluchensela imyenso ya chiwa, nayo impulika.”

²⁸ Liyo kwene fino aluwomba na maswi yaakwe, yamanyishwa konsi nu mbali mbali ya Galilea.

Yesu waposha aluale ingi un-ng'anda yi Petlo

²⁹ Liyo kwene yafumile un-ng'anda yi Leesa, ingila un-ng'anda yi Simoni na Andelea, ponga na Yakobo na Yoane.

³⁰ Na nyina-fyala wi Simoni wali apa chitala unwale insusi, yannena amaswi yaakwe.

³¹ Awisa annema ikasa, ankatusha; ni nsusi insila, anjaombela.

³² Amangusi pano ilansi lyasyutukila, yannetile yooshi yano yali alwale na ya myenso ya chiwa.

³³ Na ya umunsi yooshi yakonganile apa nnyango.

³⁴ Aposha inji yano yali ni ndwala sha misangano, wafumya ifiwa tupu, atachili aleke vifwaange, kuno fyammanyile.

³⁵ Untondo-ntondo lino uchili usiku, afuma ukuya kuno kusi antu, ukuyupepa.

³⁶ Simoni nanina yannondela.

³⁷ Pano yannola, yannena yaati: “Antu yooshi yalukusita.”

³⁸ Wayanena, waati: “Tuyini nu kunji, imisi ya pipi, kuti nkasunde na ko kwene; kuno nafyo kwene nafishile.”

³⁹ Ayasunda iswi-sifu un-ng'anda syao isi Leesa, isha m-Galilea monsi, nu kufumya imyenso ya chiwa.

Yesu waposha ntu wa ntana

⁴⁰ Awiza kunali untu wa ntana, afukama nu kupapata, ati: “Ndukasime, unganswefya.”

⁴¹ Nga annolela inkumbu, akatusya ikasa lyaakwe, amwemya, annena, ati: “Nkasi, uswepe.”

⁴² Liyo kwene intana yansila, waswepa.

⁴³ Amsokezya uku maka, amwinga liyo kwene.

⁴⁴ Annena, ati: “Ulole utanena untu iswi limwi. Leelo yanga ukawulangizye kuli kapela, ukafime fino wamunenile Mose uku kuswepa kwako, chiwe usyuta uku yakola.”

⁴⁵ Leelo wafuma nu kulanda amaswi tupu, apalinji Yesu atachili awingile kaili umunzi apatiswe. Leelo wali apashi kuno kusi antu. Na antu yaya kunali ukufuma konsi konsi.