Luka 8 - UPANGANO UPYA

Anachi yano yaombelanga Yesu

¹ Ichishila cha ifintu fi, wapitanga um-mizi nuntusi, angalusunda nu kuma imbila yi Iswi-sipe lya wene-wi-Leesa; na yaya ikumi na yaili yali ponga nawe.

² Na ananchi yamwi yano yali ni viwa ifiipe ni ndwala, yaposhiwa; nayo i Malia wino yatangi Mandalena wino wali ni fiwa saba.

³ Na Yoana nka Kuza, wino wali kalolela wa fyuma fyi Yelodi, na Suzana nanina inji, yano yamwaswilishanga uku fyuma fyao.

Unndumbe wi kapela-mbesu

⁴ Pano iumba ikulu lyakongana na yano yafumile chila nsi kwisa kunali, wafwangile uku nndumbe, ati:

⁵ “Kapela wafumile ukuyupela imbesu shakwe; nga pano wapelanga, shimwi shaponile apipi ninsila, shilyatolwa; ifyuni ifikulelemba fisa fyakompa.

⁶ Ni zinina shapona apipampa; pano shatampa ukumela shakala kuno shaula umfundo.

⁷ Ni shinji shapona apa myonga; imyonga yamela ponga nasho, yashifyenka.

⁸ Ni shinji shapona apa nsili mvundo, shamela, shasêka chila yonga umwanda.” Pano alufwanga ifintu fi, wakusha iswi, waati: “Uwa makutwi ya kupulikila, apulike.”

⁹ Alondeshi yaakwe yantondosha, yaati: “Unndumbe u ichili chani?”

¹⁰ Walanda, waati: “Mwemwi mwapiwa ukumanya melengwe ya wene-wi-Leesa, leelo anji uku milumbe, ukuti nanti yalola, yatamanya, nanti yapulika, yatamanya.

¹¹ Unndumbe uo alikuti: Imbesu, iswi li Leesa.

¹² Yaya yano yali apipi ni isila, ali yano yalupulika, nga awisa Chiwa atisha iswi liyo um-myenso yao, yaatisa yasumile nu kufyuka.

¹³ Na ya pipampa ali yano pano yapulika, yakulupokela iswi liyo uku kuchimba; nayo yatakwite imisisi, yalusumila manda mache, na pano yasanwa na masosho yaupalula.

¹⁴ Na shino shapona apa myonga, ayano yalupulika; num-wikalo wao yalufyenkwa ni milimo nu usafi ni fya kuno ukunshi, yatakusêka chimwi.

¹⁵ Na sha apa nsili uno wafunda, ali yaya yano ukuli yapulika iswi ni myenzo ya ningo, yalilema, nga yasêka ifisêke ukukuteka imyenso.

Mwengelela wi koloboi

¹⁶ “Kusi untu ndi wino wakosha koloboi, ankupike un-chifya, nanti ukuwika umwisungu, leelo akulwika lwa piyulu, ukuti yano yalwingila-mo, ayalola umwengelela wakwe.

¹⁷ Kuno kusi iswi lino lyafisama lino litalusweluka, nanti lino yafisa lino litalumanyika nu kuloleka apatiswe.

¹⁸ Ichino mulole fino mulupulika. Kuno wensi wino ali na chimwi alupiwa, na wiwi wino atakwite chimwi, kuli wene chilupokwa na chino alwelengula ali nacho.”

Yesu na a luko lwakwe

¹⁹ Nga nyina nanina yisa kunali, leelo yatampalamile uku winji wa antu.

²⁰ Yanndetela iswi, fino: “Nyoko na anyonko yimilile apashi, yalushita ukulolana newe.”

²¹ Leelo wayanena, waati: “Mama na chane aya, yano yalupulika iswi li Leesa nu kulilema.”

Yesu wamyalasha chipupu

²² Nga chali um-manda yalye wanda umwi, wakwesile um-wato ponga na alondeshi yaakwe, wayanena, waati: “Tulambe uku mbalama yi yemba.” Nga yakatusha itanga.

²³ Nga pano yapitanga walola utulo. Ichipupu chisa muli yemba, nu wato watampa ukushula amasi, yawa undufu.

²⁴ Nga yaya kunali, yanndansha, yaati: “Mwene nkulu, Mwene nkulu, twafwa!” Walanka, wachensela unsa nu mumo wa mansi. Fyanta. kwawa chele.

²⁵ Wayanena, waati: “Kusumila kwino kuli kwi?” Nayo yopa nu kusunguka, yafwashanya yonga, yaati: “Uwini wi leelo wino alunena unsa na masi, nafyo fimpulika?”

Yesu waposha untu wa fiwa

²⁶ Nga pano yalamba, yaya ukunsi ya yaGelasi, yino iloline ni Galilea.

²⁷ Pano wika umbalama, wakomengana nu ntu wenga uwa umunsi ulye, ali ni chiwa, uku manda tupu ataswalaa umwenda nanti ukuwa un-ng'anda, wikalanga uku malindi.

²⁸ Pano walola Yesu, wauma ichongo, wapona panali, afwanga ukwiswi ikulu, wati: “Ndina chani Yesu, Mwana wi Leesa uwa mwiyulu? Napapata utachinchusha.”

²⁹ Kuno wanena ichiwa chiyo ukufuma umuntu wiyo. Kuno amaila tupu chikulunndema, watana wanyepwa uku nyololo nu kunyepwa ni minyololo ni mpingu; aputula ifinyepelo fiyo, awituka uku maka ya chiwa ukuya uku luselesenga.

³⁰ Nga Yesu wamtondosha, waati: “Ishina lyako we weni?” Nawe waati: “Ishina lyane ne Legio.” Kuno ifiwa tupu fyamwingila.

³¹ Fyampapata kuti atafinena fiye ukusimu.

³² Nga pao kwene kwali ufyo wi kapoli, walyanga um-mwamba, fyampapata, kuti afisumile ukuya muli yao. Wafisumila.

³³ Ifiwa fyafuma ununtu wiyo, fingila yakapoli, nu ufyo watentenkila suwa uku lwilo, wingila muli yemba, wanwela.

³⁴ Achemi pano yalola chino chatunka, yituka, yaya yalimfya amaswi umunsi nu m-fyalo.

³⁵ Nga antu yafuma ukuyulola ichatunka, yaya kuli Yesu, yalola untu wiwi wino waatishiwa ifiwa, atesi apa mulu yi Yesu, aswite imyenda akwite amano, ingofi shayalema.

³⁶ Na yano yalile iyalola, yayalandila fino wiyo waposiwa wino wali ni ifiwa.

³⁷ Na antu ainji aya nsi ya yaGelasi iya mbali mbali, yannenile atine uku mwao, kuno yalemike ni ngofi nkani. Nga wakwela um-wato, wawela.

³⁸ Nu ntu wiyo wino waatisishiwa ifiwa, wanndomfile kuti alondekana nawe. Leelo wene wanndambalika, waati:

³⁹ “Suwila uku nganda ukwako, ukusunda ifintu fino Leesa wakuchitila.” Nawe waya, wasunda umunsi wonsi ifintu ifikulu fino Yesu wamchitila.

Mwana-kachi wi Yailo na mama wino wafwanga uwashi

⁴⁰ Nga pano Yesu wawela iumba limpokelela uku kuchimba, kuno yoshi yanndolelanga.

⁴¹ Nga lolini, untu wenga awisa, ishina lyaakwe i Yailo; nawe wali untu nkulu un-ng'anda yi Leesa. Wapona apa mulu yi Yesu, wapapata kuti awingile un-ng'anda umwakwe.

⁴² Kuno umwanakwe kachi ali apa lufu, nawe ali wenga, imyaka yaakwe yali ikumi na ili. Nga pano wapitanga, amaumba yamfyenka.

⁴³ Nu mwanachi wenga wino waswanga uwasi uku myaka ikumi na ili—wasumfile ifyuma fyaakwe fyoshi ukupa yasinganga—lelo kusi umwi wino wamwaswishe.

⁴⁴ Waile uku ntindi yaakwe, awemya isempele lya mwenda wakwe; liyo kwene ukuswa kwakwe uwashi kwashila.

⁴⁵ Yesu wafwanga ukuti: “Uwini wino wangemya?” Nga pano antu yoshi yakana, Petlo wannena, waati: “Mwene nkulu, amaumba yakulisishe nu kukufyenka.”

⁴⁶ Leelo Yesu wafwanga ukuti: “Umwi wangemya, kuno nalola amaka yanfuma.”

⁴⁷ Umwanachi wiyo pano walola fino atangafisame, wisa nakuno alutetema, wapona apa mulu yaakwe, wanndandila apa yantu yoshi, chino chaleka wamwemya, na fino wapola suwa.

⁴⁸ Nga wannena, waati: “Mwanane, kusumila kwako kwakuposha, pita lumi.”

⁴⁹ Pano achili alufwanga fiyo, awisa untu ukufuma kwa wikolo wa ng'anda yi Leesa, waati: “Umwanako kachi watafwa; mululu kuchusha Kasambilisha.”

⁵⁰ Leelo Yesu pano wapulika fiyo, wannenile, waati: “Utachopa, leelo sumila shile, nawe akupola.”

⁵¹ Pano wafika uku ng'anda, atachili aleke umwi awingile ponga nawe, shiko Petlo na Yoane na Yakobo ni isi wa mwana wiyo na nyina.

⁵² Na antu yoshi yalilanga na kulosha. Leelo wafwanga ukuti: “Mutachilila; alawi atafwile, watalala utulo sile.”

⁵³ Yanseka nkani, kuno yamanyile fino watafwa.

⁵⁴ Wanndema ikasa, afwanga ukwiswi kulu, wati: “Mwana, katuka!”

⁵⁵ Umweso waakwe wapiluka, nawe wamwimilila liyo kwene. Wayanena kuti apiwe chakulya, alye,

⁵⁶ Avyazi yaakwe yasunguka nkani, leelo wayalesha yatachinena umwi chino chaombeka.