Luka 7 - UPANGANO UPYA

Usha wa Unkulu-wayasalifi

¹ Walangi pano wamala ukufwanga amaswi yaakwe yoshi apa yantu, waingila um-nsi wa Kapenaumu.

² Kwali unkulu wa yasalifi wali nunsha umwi, wali undwale pipi nu kufwa, nawe walile wamkunda nkani.

³ Walangi pano wapulika amaswi ya pali Yesu, watumile ayikolo ya aYudea kunali nu kunndomba awise aposhe umbofi wakwe.

⁴ Nayo lino yafika kuli Yesu, yapapata nkani, yaati: “Wene wasipile umbombele ichintu chi.

⁵ Kuno wakunda antu yitu; nawe watukulile ing'anda yi Leesa.”

⁶ Nga Yesu wapita ponga nayo. Nga pano wafika apipi ni ng'anda yaakwe, unkulu wa yasalifi wiyo, watuma kataakwe kunali, wannena, waati: “Mwene, utachichula, kuno intaine wewe ukwingila un-ng'anda yane.

⁷ Ichino nawine nenkola ntaine ukwisa kunuli, leelo ufwange iswi lyonga sile, nu momfi wane wampola.

⁸ Kuno nene kwene nene ntu wa kutumwa, indi na asalifi anono kuli nene, ngi nanena wi, nati: ‘Pita!’ wapita; nawi: ‘Nguna!’ awisa; nunsha wane: ‘Chita fi!’ achita.”

⁹ Yesu pano wapulika ifintu fi, asunguka; wasenuka ukwiumba lino lyanndondile, afwanga, wati: “Ndumunena, nanti umwi Islaeli ntatana ndole kusumila kukulu ndi ku.”

¹⁰ Na yaya yano yatumilwe, pano yawela uku ng'anda, yazana umbofi umpuma.

Unndumendo wa ku Naini watutuluka

¹¹ Ichisila amanda mache yapita ukuya uku nsi umwi ishina lyaakwe Naini. Alondeshi yaakwe yalonndekine nawe ponga niumba ikulu.

¹² Nga pano wapalamila ukwingila apa nndyango wa nsi, penepo pali ichala chiseshilwe apafika, nawe wali wenga umwana wi mama unsimbe, na antu tupu aya um-nsi yali ponga nawe.

¹³ Mwene pano wannola, wanndolela inkumbo, wannena, waati: “Utachilila.”

¹⁴ Wapalamila, wemya ichela—yano yaseshile yimilila—wafwanga ukuti: “Unndumendo, ndukunena, katuka!”

¹⁵ Wino wafwile wakatuka, wikala, watampa ukufwanga. Nga ampa nyina.

¹⁶ Ingofi shayalema yoshi, yatensha Leesa nukuti: “Ilau ikulu ililoleka kuno tuli na Leesa watalaula antu yaakwe.”

¹⁷ Amaswi yaakwe ya yalumbuka umu Yudea yoshi, nun-nsi shosi isha mbali mbali.

Yesu na Yoane Kabatisha

¹⁸ Alondeshi yi Yoane yanndandile amaswi ya ifintu fyoshi fiyo.

¹⁹ Apano Yoane witile alondeshi yaakwe yaili, wayatuma kuli Yesu, atondosha, wati: “Wewe ali wino alwisa, nanti tulolele unji?”

²⁰ Nayo pano yaya kunali, yaati: “Yoane Kabatisha atutumile kuli wewe, ukuti: ‘Ali wewe wino alwisa, nanti tulolele unji?’ ”

²¹ Na liyo kwene waposha ainji yali ni ndwala, na yano yalulukuwaika, ni fiwa fiipe, napofu ainji wayapile ukulola.

²² Apano wayanenile, ukuti: “Yangini mukalandile Yoane ifintu fino mwalola nu kufipulika: apofu yalulola, aitenda yalupita, aya ntana yaluswepa, yachipuli yalupulika, afwi yalututululwa, apina yalusundwa iswi-sipe.

²³ Inkatakwe untu weshi wino ataluchituwa nene.”

²⁴ Nga yano atumilwe na Yoane, pano yaatina, atampa ukunena amaumba amaswi yi Yoane. “Mwafumile ukuyulola chani ukunyika? Itete lino unsa ulutelenganya?

²⁵ Leelo mwafumile ukuyulola chani? Untu waswite imyenda imitele? Mumanye antu ya myenda ya ukulu, alulya ningo, yali un-ng'anda ya mwene.

²⁶ Leelo mwafumile ukuyulola chani? Ilau? Endita! namunena, wene wino alesile ilau.

²⁷ Wiyo uwino waandikilwe fi: ‘Lolini natuma intumi yane apa maaso yako; wino alukuteyanyisha insila yako.’

²⁸ “Nene namunena, pali yano yafilwe nanachi, kushi wino alushile Yoane, leelo wino unnono um-wene wi Leesa, anndusile.”

²⁹ Nga antu yoshi na yakalifya yikodi, pano yapulika ifintu fi, yasumile ichumi chi Leesa, kuno yabatishiwa ulubatisho lwi Yoane.

³⁰ Leelo aFaliseo na amanya-ntambi yakanile ukuchita fino Leesa wakasime kuti yachite, kuno yatabatishilwe nawe.

³¹ “Njakolanye na chani antu ya mpanda u? Yakoline na chani?

³² Yakoline nanche yano yatenzi apa sokoni nu kwitana angi yaluti: ‘Tumumile impilimbi, leelo mutachili muchine; twalosyaa, leelo mutachili mulile.’

³³ “Kuno Yoane Kabatizya wizile, atalyanga unkate nanti ukunwa amasi ya mizabibu, nemwe muti: ‘Ali ni chiwa!’

³⁴ uMwana-ntu wiza alulya nu kunwa, nemwe muluti: ‘Lolini, alawi walaka, nakuno ikanwa wa manzi ya mizabibu, ikatakwe na yakalifya yikodi na yamaifyo.’

³⁵ Na mano yamanyika fino aya chumi uku yana yaakwe yoshi.”

Yesu wapakwa mafuta na mama umwi

³⁶ Untu wenga apa aFaliseo wamwisile akalye ichakulya ukwakwe; nga awingila un-ng'anda ya nFaliseo wiyo, wikala ukulya ichakulya.

³⁷ Nga lolini, umwanachi umwi uwa umunsi uo kwene, nawe untu wa maifyo, pano wapulika fino alimo un-ng'anda ya nFaliseo wiyo uku chakulya, waleta unsazi ka mafuta ya manunkilo.

³⁸ Awimilila uku chisila pipi na mulu yaakwe, angalulila, wata mpa ukutonesha amulu yaakwe amososhi nu kumpulukusa ni nyele sha ku ntwe waakwe nu kutunga amulu yaakwe nu kumpaka amafuta yao.

³⁹ Nga nFaliseo wiyo pano walola fiyo, um-mweso waakwe wati: “Untu wi, ngangi ilau, ngangi wamanya umwanachi wi wino wamwemye, ngu wini nawe ali uli, fino uwa maifyo.”

⁴⁰ Yesu wannena, waati: “Simoni, ndi niswi lino ndushita ukukunena.” Nawe afwanga ukuti: “Kasambilisha, nnena.”

⁴¹ Nga waati: “Untu wenga ikakopisha, wali na yakakopa yaili; wenga wakopa impia imyanda isano, nu wa uwili amakumi yasano.

⁴² Nga pano yaula ichakunndipa, wayelela yoshi yaili. Pali yao yaili uwini wino angamkunda nkani?”

⁴³ Simoni wafwanga ukuti: “Ndwelengula uwiwi wino welelwa ifyafula.” Nawe wannena, waati: “Walanda ningo.”

⁴⁴ Nga waseleuka uku mwanachi, wanena: “Simoni wati walola umwanachi wi? Nalingingile un-ng'anda umwako; utachili umpe amasi ya kufulala amulu yane, leelo wi wantonesha amulu yane amonsoshi nu kuyapulukusa uku nyele sha ntwe wakwe.

⁴⁵ Wemwi mchili untunge, leelo li fuma pano ngingile antoswelile nkani amulu yane.

⁴⁶ Uchili umpaka amafuta ukuntwe wane, leelo wi watampaka amulu yane amafuta.

⁴⁷ Uku finto fiyo ndukunena, atelelwa amaifyo yaakwe yano yafulisha, kuno wakunda nkani; leelo wino alwelelwa tuche, uwino wakunda tuche.”

⁴⁸ Apano wanenile umwamachi, waati: “Welelwe amaifyo yako.”

⁴⁹ Apano yaya yano yatesi ponga nawe apa chakulya, yatampa ukufwangila um-myeso yao, ukuti: “Uwini wi, wino angelela amaifyo?”

⁵⁰ Wanena umwanachi wiyo, waati: “Ukusumila kwako kwakufyusha; pita lumi.”