Luka 5 - UPANGANO UPYA

Alondeshi ya ntangulo. Yakela aya antu

¹ Walangi pano iumba lyamfyenka pano lyapulikishanga iswi lyi Leesa, wene wimilile umbali yi yemba wi Genesaleti.

² Alola amawato yaili umbali yi yemba; leelo yakela iyafuma yalufula amasumbu yao.

³ Wingila um-wato umwi, nao uwi Simoni, annena kuti autwale apatali uche nuku misenga. Nga awikala um-wato angi aluyasambilisha amaumba.

⁴ Nga pano wamala ukuvwanga, annena Simoni, ati: “Twala ukwiyeshi, mkishe amasumbu yino, mwele inswi.”

⁵ Simoni wannena, waati: “Mwene nkulu, twaomba usiku kwacha, leelo tutalemile chimwi, leelo ukwiswi lyako namwisha isumbu.”

⁶ Nga pano yachita fiyo, yapasile inswi tupu nkani, na masumbo yao yatampa nu kuputoka.

⁷ Yakapilisha anina yano yali um-wato wa uwili, yise ukuyaswa. Nayo yisa, yasusha mato yoshi yaili, yashita nu kutuwila.

⁸ Simoni Petlo pano walola ifintu fiyo, wapona pa mulu yi Yesu, wati: “Tina kunondi, kuno nene nentu wa maifyo, Mwene.”

⁹ Kuno wazungwike ponga na yoshi yano yali ponga nawe, ku wingi wa inswi shino yalemile.

¹⁰ Fiyo kwene Yakobo na Yoane, ana yi Zebedeo yano yaombaa ponga na Simoni. Nga Yesu wanena Simoni, waati: “Utachopa; ukufuma li kwene li wambwa kela wa yantu.”

¹¹ Nga pano yaleta mato uku luselesenga, yasha fyoshi, yanndondela.

Yesu waposha untu wa ntana

¹² Walangi lino ali umunsi umwi, pali untu umwi, wino intana yalimba umwili woshi; nga pano walola Yesu, wapona afukime, wapapata, wati: “Mwene ndi ukasi, unganswefya.”

¹³ Nawe akatusha ikasa lyaakwe, amwemya, wati: “Nkasime, swepa.” Liyo kwene intana yaakwe yanshila.

¹⁴ Nga wanndesha, kuti atanena untu umwi. “Lelo yanga ukailange kuli kapela, ukafime uku kuswepa kwako, ndi fino Mose wafwanzile ifya pa kuswepa kwako, chiwe ushuta kuno yali.”

¹⁵ Leelo amaswi yaakwe yalumbukisha, yakongana amaumba tupu, kuti yampulikishe nu kuposhiwa indwala shao.

¹⁶ Leelo wene waile kuno kusi antu, ukuyupepa.

Yesu waposha witenda

¹⁷ Walangi apa wanda umwi um-manda yalye, wasambilishanga. Nga aFaliseo na amanya-ya-ntambi yatensi penepo, yano yafumile chila unzi wonsi uwa mu Galilea num-Yudea num-Yelusalemu. Na maka ya Mwene yalipo, kuti apozye.

¹⁸ Nga lolini, yisa antu yaseshile untu witenda apa chitala yashita ukuntwala unkashi nu kumbwika panali.

¹⁹ Nga pano yaula uwasa wa kuntwala unkashi uku winji wa yantu, yaakweshile apidali, yampisha um-matofwali yapiyulu, nga yamwisha ni chitala chakwe pali Yesu.

²⁰ Nawe pano walola kusumila kwao, wannena, waati: “We katane, welelwa amaifyo yako.”

²¹ Nga yakaandika na aFaliseo yatampa ukutondoshana, yaati: “Uwini wino alufwanga amaswi ya misuli? Uwini wino angelela amaifyo asi Leesa wenga?”

²² Yesu wamanyile amelengushi yao, wayanena, waati: “Mulwelengula chani um-myenso yino?

²³ Ichangupala chilikwi? Ukuti: ‘Welelwa amaifyo yako,’ nanti: ‘Katuka, upite?’

²⁴ Leelo mmanye fino uMwana-ntu ali na maka kuno ukushi aya kwelela amaifyo—wanenile uwitenda—ndukunena fi: katuka, utwike ichitala chako upite uku ng'anda ukwako.”

²⁵ Liyo kwene wankatuka pano yali, wambutwika chino walalile, wampita uku ng'anda ukwakwe, na kuno alutesha Leesa.

²⁶ Yoshi yasunguka ni ngofi shayalema, yatensha Leesa, angi yaluti: “Ilelo, twalola ifipesha-mano.”

Levi witwa

²⁷ Ichisila cha ifintu fi, wafuma walola kalifya wikodi, ishina lyaakwe i Levi, angi atesi apa folozani; wannena, waati: “Ndondela.”

²⁸ Nawe washa fyoshi, wakatuka ukunndondela.

²⁹ Nga Levi wamwimula uku ng'anda ukwakwe, pali iumba ikulu ili yakalisha yikodi na antu yanji kwene, yano yatesi apa chakulya ponga nayo.

³⁰ Nga aFaliseo na yakaandika yao yang'wing'witikila alondeshi yaakwe, yaati: “Nga fino mululya nu kunwa ponga na yakalifya yikodi na yamaifyo?”

³¹ Yesu wayanena, waati: “Apuma yatangi yashite shing'anga, nkambi alwale.

³² Ntisilu wita ayachumi, leelo ayamaifyo, kuti yafipele.”

Kuizilisha fyakulya

³³ Nayo yannena, yaati: “Alondeshi yi Yoane yakuluushilisa ifyakulya amaila tupu nu kupepa, ifino nalondeshi ya aFaliseo kwene, leelo alondeshi yako yalulya nu kunwa.”

³⁴ Leelo Yesu wayanena, waati: “Chene! munganena yano yali ponga na shiwinga yausilishe, ngi siwinga ali ponga nayo?

³⁵ Leelo amanda yalwisa yano siwinga ataluwa ponga nayo; apano yaluiushilisha amanda yao.”

³⁶ Wayanena unndumbe, waati: “Kushi wino akululepula ichilaka cha mwenda umpya nu kuchitela uku mwenda wa kali. Ngi watela, angalepula umpya, ni chilaka chio icha mwenda umpya chitalingine nu mwenda wa kali.

³⁷ Na kushi untu wino akutela amasi mapya aya mizabibu un-nyingu sha kali; ngi watela, amasi mapya yao yanndepulainyingu yiyo, amasi ya mizabibu yitike, ni nyingu shononeke.

³⁸ Leelo amasi mapya aya mizabibu ayakutelwa un-nyingu impya.

³⁹ Na kaili kushi wino akunwa amasi ya kali aya mizabibu, ashe awelengule amapya, kuno aluti: ‘Aya kali ayano yazipa.’ ”