Luka 4 - UPANGANO UPYA

Yesu alweshiwa

¹ Nga Yesu lino washula uMweso Nswefu, wawela uku Yodani, wakolelelwa nu Mweso ukunyika.

² Angi alweshiwa na Chiwa amanda makumi yani. Na manda yao atalyanga chimwi, na pano amanda yashila alola insala.

³ Chiwa wannena, waati: “Ndiwe Mwana wi Leesa, nena ifinga li liwe inshima.”

⁴ Yesu wannena, waati: “Chaandikwe fino untu atalwikala ukukulya ichakulya sile.”

⁵ Amkwesha apiyulu, wanndanga uwene ni ifintu fyoshi ifya kuno ukushi uku kashimbo kache.

⁶ Nga Chiwa wannena, waati: “Ukulu u na maka ya nankupa wewe, kuno fili um-makasa yane, nene nkulupa weshi ndi fino nkasime.

⁷ Ichino ngi wafukamila, fyoshi fyambwa ifyako.”

⁸ Nga Yesu annena, wati: “Chaandikwe, fino, ufukamile uMwene Leesa wako, umombele wenga mpela.”

⁹ Ankolelela uku Yelusalemu ambwika apa nsonje wa ng'anda-nkulu-iyi-Leesa, nga wannena, wati: “Ndi we Mwana wi Leesa, tumpuka apansi.

¹⁰ Kuno chaandikwe: ‘Wankutumila yamalaika yaakwe yakusunge.

¹¹ Num-makasa yao yakukulema, kuti utakumika ikulu lyako apifinga.’ ”

¹² Yesu wannena, waati: “Chafwangwa fino utachesha uMwene Leesa wako.”

¹³ Nga pano wamala insila shoshi isha kumwesha, Chiwa wapita, wansha uku kashimbo.

Yesu wakanwa uku Nazaleti.

¹⁴ Nga Yesu wawela na maka ya Mweso, waya uku Galilea. Na maswi yaakwe yalimba isi shoshi isha mbali mbali.

¹⁵ Nawe wasambilishanga um-mang'anda yao ayi Leesa, nu kuteshiwa na antu yoshi.

¹⁶ Nga waya uku Nazaleti kuno wakulile nu wanda wa Sabato wingila un-ng'anda iyi Leesa, ndi fino wamanyilila, awimilila kuti asome.

¹⁷ Yampa ichitabu chi lau Isaya, wakupula washita pano paandikwe vi:

¹⁸ “Umweso wa Mwene uli ponga nene, kuno wampaka amafuta, ukuyumila apina imbila yi Iswi-sipe; wantuma ukuyumila imbila yano yanyepwa ukusapulwa kwao. Napofu ukupiwa ukulola kaili, nu kukulula yano yaonelwa.

¹⁹ Nu kuyumila imbila ya mwaka wa Mwene uno wasipa.”

²⁰ Akupika ichitabu, asuwisisha umbofi, nga wikala; na antu yoshi yano yalimo un-ng'anda iyi Leesa, yankundwila amanso.

²¹ Atampa ukuyanena, wati: “Ilelo Amaandiko ya iyafikilila um-makutwi yino.”

²² Yamsumilisha yoshi, yasunguka uku maswi masipe yano wafwanga, nga yafwanga ukuti: “Alawi asu mwana wi Yosefu?”

²³ Nawe wayanena, waati: “Umwenemo, mwannena ishenteko li: ‘Shing'anga auposhe wenkola. Ifintu fyoshi fino twapulika fino fyaombeka umu Kapenaumu, fichite nu munsi wa kumwino,’ ”

²⁴ Nga wafwanga, wati: “Umwenemo ndumunena, kushi ilau ukulusumilwa uku mwao.

²⁵ Leelo uku chumi, namunena, pali yano yafwilwa ainji un-nsi ya Islaeli um-manda yi Elia, pano iyulu lyayashilwe imyaka itatu ni myezi sita, insala inkulu yaponile isi yoshi.

²⁶ Elia atatumilwe nanti kuli umwi, siku ku mafwilwa wenga uwa ku Salepta, un-nsi ya Sidoni.

²⁷ Na kaili yalipo aya ntana ainji umwi Islaeli um-manda yilau Elisya, nga kusi wino waswefiwe, siku Naamani, uwa ku Silia.”

²⁸ Nga yoshi yano yali un-ng'anda yi Leesa yakalipa, pano yapulika ifintu fi.

²⁹ Nga yakatuka yansunkilisha ukutika yansi, yantwala uku lwema, kuno unsi wao ukushilwe wapiyulu, kuti yantenkele kweneko.

³⁰ Leelo wene wafyontoka muli yeneyo, wampita.

Yesu waposha aluale

³¹ Atentenka ukuya um-Kapenaumu, unsi wa Galilea, angi aluyasambilisha apa wanda wa Sabato.

³² Nga yasunguka leka uku masambilisho yaakwe, kuno iswi lyaakwe lyali na maka.

³³ Ngu un-ng'anda yi Leesa mwali untu wino wali ni chiwa ichiipe, wangula ukwiswi kulu,

³⁴ waati: “Leka nga tuli na chani newe Yesu wa ku Nazaleti? Uwisile ukwisa tonona? Nkumanyile we weni: We Nswefu wi Leesa.”

³⁵ Nga Yesu wachichensela, wati: “Tusha, ufume!” Nga apano ichiwa champonya apakasi yao, chafuma nanti kumchita chimwi.

³⁶ Yasunguka yoshi yafwangyanya, yaati: “Ichintu uli chi? Kuno alufwanga nkani na maka uku fiwa, nafyo filufuma.”

³⁷ Amaswi lyake yalimba koshi koshi unsi-nâsi iyo.

³⁸ Afuma un-ng'anda iyi Leesa, wawingila un-ng'anda yi Simoni. Na nyinafyala wi Simoni wali undwale insushi nkani, yanndombela kunali.

³⁹ Awimilila pipi nawe, wachensela insusi iyo, insila; liyo kwene wankatuka nu kuyaombela.

⁴⁰ Nga pano ilashi lyashutukila, yoshi yano yali nalwale ya ndwala tupu tupu, yayaleta kunali. Wawika makasa yaakwe kuli chila wenga, wayaposha.

⁴¹ Ni fifa fyafumile uku yantu tupu, fyuma ichongo nu kuti: “Wewe uli Mwana wi Leesa!” Wafichensela fitachifwanga, kuno fimmanyile fino ali Klisto.

Unndimo wi Yesu

⁴² Na pano kwacha, wafuma waya kuno kushi yantu. Na maumba yanshita, nga yaya kunali, yashita ukunndesha atachitina ukumwao.

⁴³ Leelo wayanena, waati: “Chindungime nkasunde Iswi-sipe ilya wene-wi-Leesa um-misi minina kwene, kuno ichino natumilwe.”

⁴⁴ Nga wasundaa um-mang'anda iyi Leesa aya uku Yudea.