Luka 3 - UPANGANO UPYA

Yoane Kubatisha wasunda

¹ Um-mwaka wikumi na usano uwa kulâsa kwi Kaisali Tibelio, Ponsio Pilato wali unndâsi wa Yudea, na Yelodi wali umwene wa Galilea, na Filipo unnina wali umwene wa Itulea niisi ya Tulakonite, na Lisania wali mwene wa Abilene.

² Lino Anasi na Kayafa yali Yakapelaakulu, iswi lyi Leesa lyamwisile Yoane, umwana wi Zakalia, pano wali uku lusanga.

³ Aya insi yoshi yino yapalamine ni Yodani, wasunda ulubatisho lwa kwelelwa amaifyo.

⁴ Ndi fino chaandikwe un-chitabu icha maswi yi lau Isaya: “Iswi lya ntu lilulaisha un-nyika: Teyanyini insila ya Mwene. Ololini muno alupita.

⁵ Vifolomo fyonsi filushula. Ni myamba yoshi ni milundu vilulinganila. Na pa nyonganu palololoka. Ni vilina vilutwilwa.

⁶ Na antu yoshi yalulola ufyushi wi Leesa.”

⁷ Wanenile amaumba yaantu yano yailu batishiwa nawe, waati: “Mwe yana ya nsoka, uwini wino wamusokesha, ukuti mwituke ukali uno ulwisa?

⁸ Ali sêkini ifisêke fino fiine nu ku fipela. Mutachi vwanga um-myenso yino, fino tuli na tata, nawe i Ablaamu; kuno ndumunena, Leesa angakatusisha Ablahamu ana kufuma um-mafinga ya.

⁹ Na li kwene impasa itikwikwa apa mashinda ya fiti; ichino ichiti choshi chino chitalusêka ifisêke ifisipe, chilukomwa nu kusumbilwa um-moto.”

¹⁰ Amaumba yanntondosha, yaati: “Nga tuchite uli, fwandi?”

¹¹ Wayanena, waati: “Uwa nkanjo shiili ape wino ashi ni nkanjo, nu wa fyulya, achite fiyo kwene.”

¹² Yakalifya yikodi nayo kwene yiza uku lubatizyo, yanntondosha, yaati: “Kasambilisha, tuchite uli neswe?”

¹³ Wayanena, waati: “Mutachilifya chimwi ukuluta fino munenilwe.”

¹⁴ Asalifi nayo kwene yanntondosha, yaati: “Nga neswe, tuchite uli?” Wayanena, waati: “Mutachifyengelesha untu, nanti ukutumpwila uku ufi, kaili musumile ichiombelo chino.”

¹⁵ Nga pano antu yalolelanga chino channoleka, yoshi yelengulaa um-myenso yao pali Yoane, ndi ali Klisto.

¹⁶ Yoane wafwangile, ayanena yoshi, wati: “Umwenemo, nemwi ndubatisha uku mansi, leelo alwisa wino ali na maka ukunduta nene, wino ntalingine ukumtolompwela imikowa ya nfwato shaakwe. Wene alumubatisha uku Mweso Nswefu nu moto.

¹⁷ Wino ulupe luli umwikasa lyaakwe, aluswefya nkani ulwano lwakwe, alukonganika ingano unntanta yaakwe, leelo chileshe alumocha nu moto untashima.

¹⁸ Nu ku masunde manina tupu wasundile antu Iswi-sipe.

¹⁹ Leelo umwene Yelodi pano wachenselwa nawe kuli Yelodia, nka nnina wakwe, ni fiipe fyonsi fino Yelodi wachita,

²⁰ wungilisha liyo apa finina fyonsi, watwala Yoane uku nyololo.

Yesu wabatishiwa

²¹ Walangi pano antu yoshi yabatishiwa, na Yesu kwene wabatishiwa, angi alupepa, iyulu lyayulika,

²² nu Mweso Nswefu umwikila un-chata cha nkunda, niswi lyafuma umwiyulu, lyaati: “Wewe Mwanane nkundikwa, nduchimba newe.”

Mpanda wi Yesu

²³ Pano Yesu watangwile ukusambilisha, wali ni myaka amakumi yatatu, angi yaluti umwana wi Yosefu, umwana wi Eli,

²⁴ mwana wi Matati, mwana wi Levi, mwana wi Melki, mwana wi Yanai, mwana wi Yosefu,

²⁵ mwana wi Matatia, mwana wi Amosi, mwana wi Naumu, mwana wi Esli, mwana wi Nagai,

²⁶ mwana wi Maati, mwana wi Matatia, mwana wi Semei, mwana wi Yoseki, mwana wi Yoda,

²⁷ mwana wi Yoanani, mwana wi Leesa, mwana wi Zelubabeli, mwana wi Sealtieli,

²⁸ mwana wi Neli, mwana wi Melki, mwana wi Adi, mwana wi Kosamu, mwana wi Elmadamu,

²⁹ mwana wi Eri, mwana wi Yoswa, mwana wi Eliezeli, mwana wi Yolimu, mwana wi Matati, mwana wi Levi,

³⁰ mwana wi Simeoni, mwana wi Yuda, mwana wi Yosefu, mwana wi Yonani, mwana wi Eliakimu,

³¹ mwana wi Melea, mwana wi Mena, mwana wi Matata, mwana wi Natani, mwana wi Daudi,

³² mwana wi Yese, mwana wi Obedi, mwana wi Boazi, mwana wi Salmoni, mwana wi Nasyoni,

³³ mwana wi Aminadabu, mwana wi Adimini, mwana wi Alini, mwana wi Esloni, mwana wi Pelesi, mwana wi Yuda,

³⁴ mwana wi Yakobo, mwana wi Isaka, mwana wi Ablahamu, mwana wi Tela, mwana wi Naholi,

³⁵ mwana wi Seluki, mwana wi Legu, mwana wi Pelegi, mwana wi Ebeli, mwana wi Sala,

³⁶ mwana wi Kainani, mwana wi Alfasadi, mwana wi Syemu, mwana wi Noa, mwana wi Lameki,

³⁷ Mwana wi Matusalemu, mwana wi Enoki, mwana wi Yeledi, mwana wi Malaleli, mwana wi Kenani,

³⁸ mwana wi Enosi, mwana wi Seti, mwana wi Adamu, mwana wi Leesa.