Luka 24 - UPANGANO UPYA

Yesu watutuluka

¹ Uwanda wa ntangulo uwa juma, usiku-siku, yaile ukwilindi, yaleta ifinunkilile fino yateyinye.

² Yasana ifinga lili ikunkulushe apatali nilindi.

³ Yingila nanti kulola umwili wa Mwene Yesu.

⁴ Walangi pano yalusamalila ichintu chi, lolini, antu yaili yimilile pipi nayo, yaswite imyenda ilumesa-mesa.

⁵ Apano ingofi shayalema, yapona yafukime apasi. Apano yao yayanena, yaati: “Uku chani mulusita umpuma uku yafwi?

⁶ Asiko ku, watatutuluka. Mwiushe fino wafwansile nemwe, pano achili ali uku Galilea.

⁷ Ati: ‘Chinnungime uMwana-ntu ukupiwa um-makasa ya antu ya maifyo, nu kukonkomelwa apa nsalaba, nu kututuluka uwanda wa utatu.’ ”

⁸ Nayo yiyusha amaswi yaakwe.

⁹ Nga yaatina ukwilindi yawela, yalandila yaya ikumi na wenga nanji yoshi amaswi ya ifintu fi fyoshi.

¹⁰ Nayo yali Malia wa ku Magdala na Yoana, na Malia nyina wi Yakobo. Na anachi anji yano yali ponga nayo, yanenile imitume amaswi ya ifintu fi.

¹¹ Amaswi yao yaloleka fino aya uwelewele sile kuli yeneyo, nga yatachili yasumile.

¹² Leelo Petlo wakatwike awituka ulwilo afika ukwilindi. Awinama, asungamila mwenemo, alola ifitambala ifitiswe sile. Nga awela alusunguka ichintu chino ichiombeka.

Yesu waloleka uku yantu ya ku Emau

¹³ Nga lolini, uwanda uo kwene antu yaili aya muli yeneyo, yayanga uku nsi umwi ishina lyaakwe Emau, uno wali lwa patali ni Yelusalemu, apa kupita insaa siili.

¹⁴ Nayo yavwangaa akola uku ifintu fyoshi fino fyaombike.

¹⁵ Nga pano yalufwanga yonga nu kutondoshana, Yesu unkola kwene apalamila alondekana nayo.

¹⁶ Leelo amaso yao yakola uti yashita, yaula ukummanya.

¹⁷ Wayanena, waati: “Amaswi uli ya yano mulufwanga fi pano mulupita?” Yimilila iyakonsa ni fikole apa maaso

¹⁸ Nga wenga pali yeneyo, ishina lyaakwe Kleopa, annena, wati: “Chene! wewe mweni wenga um-Yelusalemu, utamanyila ifintu fino fyaombike um-manda ya?”

¹⁹ Ayatondosha, wati: “Iifintu chi?” Yannena, yaati: “Iifintu fya pali Yesu wa ku Nazaleti, wino wali untu kalausha wa maka um-milimo na maswi kuli Leesa na pa antu yoshi.

²⁰ Kaili fino ayikolo iyakapela na ikolo yitu, fino yamtwite ummilandu ya kufwa, yamkonkomela apa nsalaba.

²¹ Neswe twataila fino uwino alukulula aIslaeli. Nu kuluta vyonsi vi, ilelo uwanda wa utatu ukufuma pano ifintu fiyo vyaombeka.

²² Na kaili anachi yamwi aya kuno tuli, yatusungwishe, yano yaile ukwilindi untondo-tondo.

²³ Yatasanile umwili wakwe, yisa yatunena fino yalola ichilolwa chi yamalaika, yano yatasile fino umpuma.

²⁴ Na yamwi yano yali ponga neswe yaile ukwilindi, yasana ndi fino anachi yaya yatasile, leelo wene yatamwine.”

²⁵ Nga ayanena, ati: “Fiwila mwe ivya myenzo minwamu iya kuntasumila fyoshi fino amalau yatasile.

²⁶ Chene! Chitalungime Klisto kusanwa na machulo ya ifintu fi, nu kwingila um-ukulu wakwe?”

²⁷ Ayalandila um-Maandiko ifintu fyoshi fino fyannungime unkola, ukufuma Mose na malau yoshi.

²⁸ Nga yapalamila unsi uno yayanga, nawe wachita kanti alusita aye apa nkolelo.

²⁹ Leelo yamkopa, yaati: “Uwikale ponga neswe. Kuno lîla, kwafita.” Nga awingila ukwikala nayo.

³⁰ Nga chali pano watensi nayo apa chakulya, watoshile unkate aupepelela, aukunyola nga ayapa.

³¹ Amanso yao yayulika, yammanya; nga atina apa maaso yao.

³² Yafwanshanya, yaati: “Chene! imyenso itu italilwaka unkasi muno tuli, pano wali alufwanga neswe un-nsila nu kutumanyisha aMaandiko?”

³³ Nga yakatuka liyo kwene, yawela uku Yelusalemu; yasana yalye ikumi na wenga iyakongana apali ponga na yano yali nayo.

³⁴ Yaati: “Umwenemo, uMwene watatutuluka, wataloleka kuli Simoni.”

³⁵ Wene yalanda ifintu fino chali un-nsila, na fino wamanyike kuno yali apa kukunyola unkate.

Yesu waloleka uku yalondeshi yaakwe

³⁶ Nga lino yachilufwanga ifintu fiyo, unkola kwene awimilila apakasi yao, ayanena, ayanena, wati: “Kuwe chele kuno muli.”

³⁷ Yachintukila nu kopa nkani, yatangi palumwi imikosi.

³⁸ Wayanena, waati: “Mulusima chani? Uku chani mulwelengula fiyo um-myenso ino?

³⁹ Lolini amakasa na mulu yane, fino inene kwene. Mpalakashini mulole, kuno umweso usi nu mwili na mafupa, ndi fino mulundola nene ndi nafyo.”

⁴⁰ Nga pano wafwanga fiyo, ayalanga amakasa na mulu yaakwe.

⁴¹ Nga pano yachili yasumile uku kuchimba, na kuno yalusunguka, wayanena, waati: “Mukwite ichakulya chimwi pa?”

⁴² Yampa ichilepu cha nswi impanike.

⁴³ Watola, walya pano yali.

⁴⁴ Apano ayanena, wati: “Ya ali maswi yane yano namunenile pano nalile ndi ponga nemwe, ukuti ifintu fyoshi fino naandikilwe un-Ntambi yi Mose na malau ni Sabuli, filusosya filoleke.”

⁴⁵ Apano wayayulila amano yao, kuti yamanye aMaandiko.

⁴⁶ Ayanena, wati: “Ifino chaandikwe, ukuti chilungime Klisto aluchula nu kututuluka uwanda wa utatu.

⁴⁷ Na fino antu yoshi ukwishina lyaakwe yalusundwa ukufipela nu kwelelwa amaifyo, ukutangula um-Yelusalemu.

⁴⁸ Nemwe muli yashuta ya ifintu fi.

⁴⁹ Nga lolini namuletela ulanyo wi Tata. Leelo mwikale um-nsi mu, kufika na lino mulupiwa amaka ukufuma mwiyulu.”

Yesu wakwela mwiyulu

⁵⁰ Apano ayatwala uku Betania, akatusha amakasa yaakwe mwiyulu, ayapepelela.

⁵¹ Nga pano aluyapepelela, ayasha, wasendwa umwiyulu.

⁵² Nga yamfukamila, yawela uku Yelusalemu yaluchimba nkani.

⁵³ Nga yali un-ng'anda-nkulu-iyi-Leesa manda yoshi, angi yalutensha Leesa.