Luka 23 - UPANGANO UPYA

Yesu pali Pilato

¹ Ngalikatuka iumba lyonsi, limtwala kwi Pilato.

² Yatampa ukumsongelela, yaati: “Tumwine untu wi alupelusha antu yitu nu kulesha antu yatachifima ikodi kuli Kaisali, wati: Unkola kwene ali Klisto Mwene.”

³ Pilato antondosha, wati: “Wewe uli mwene wa Yudea?” Afwanga, wati: “Ndi fino walanda.”

⁴ Pilato anena ayikolo iyakapela na maumba, wati: “Ntawine iswi yiipe ukuntu wi.”

⁵ Leelo wene yachikomya nkani, ukuti: “Akulusongelekanya antu, angalusambilisha um-Yudea unsi, watangwile uku Galilea, watafika na ku.”

⁶ Pano Pilato wapulika ifintu fi, atondosha ngi untu wa ku Galilea.

⁷ Nga lino wamanya fino ali um-ulâsi wi Yelodi, wamtwala kuli Yelodi, kuno nawe kwene amanda yao walipo uku Yelusalemu.

Yesu watwalwa kuli Yelodi

⁸ Pano Yelodi walola Yesu, achimba nkani; kuno amanda minji wasitanga ukunnola, kuno wapulika amaswi yaakwe; asita ukulola ichipesha-mano chino chachitwa nawe.

⁹ Nga wamtondosha amaswi aminji, leelo wene atamfwasha chimwi:

¹⁰ Ayikolo iyakapela na yakaandika yakatuka yamsongelela uku maka nkani.

¹¹ Nga Yelodi nasalifi yaakwe yamsula, yamsoweka nu kumswika umwenda uno wasipa, nga amwesha kuli Pilato.

¹² Ngu wanda uo kwene Yelodi na Pilato yalemine inkula, kuno uku ntangula yatapulikine.

Yesu waputwilwa unndandu wa kufwa

¹³ Nga Pilato akonganika ayikolo iyakapela na akulu na antu.

¹⁴ Ayanena, ati: “Untu wi mnesile kuli nene ungati alupelusha antu, nene lolini, ntiputula amaswi yaakwe apa maaso yino, leelo ntawine chino wonona, uku ifintu fino mulumtakila.

¹⁵ Nanti Yelodi; kuno watampilusha kuno tuli; ichino lolini, kusi unndandu umwi uno wachisile, uno angafwila.

¹⁶ Ichino nammuma nga msapule.”

¹⁷ [Kuno intambi yaakwe ukuyasapwila unnyepwa umwi apa wanda ukulu.]

¹⁸ Leelo yuma ichongo yoshi ichaponga, yaati: “Tisha untu wi, utusapwile Balaba!”

¹⁹ Nawe untu wino wanyefilwe uku nyololo uku nnandu wa kutanduka kuno kwalolike umunzi nu kuumozi.

²⁰ Nga Pilato avwanga nayo ilya uwili, kuno wakasime ukusapula Yesu.

²¹ Leelo yuma yangula, yaati: “Akonkomelwe! Akonkomelwe!”

²² Ayanena ilya utatu, ati: “Uku nndandu chi? Wataifya chani untu wi? Ntawine chimwi kunali chino angafwila. Ichino ngi nammuma nammsapula!”

²³ Leelo yafumya amaswi yao uku maka nkani, yasita akonkomelwe. Apalinji amaswi yao yamtonsha.

²⁴ Nga Pilato aputula ukuti fino yalusita fiombeke.

²⁵ Wasapula wiwi wino wanyefilwe uku nyololo uku nnandu wa kutanduka nu umoshi, wino yakasi; wafima Yesu yammbombe fino yakasime.

Simoni wa ku Kilene wasenda nsalaba

²⁶ Nga pano yamtwala, yalema untu umwi, Simoni wa ku Kilene, nawe wafumile uku fyalo, yamtwika unsalaba kuti asende alondela Yesu nao.

²⁷ Ngiumba ikulu ilya antu yalinndondela na anachi yano yauumanga apa fifuwa nu kunnilila.

²⁸ Nga Yesu aseleuka uku chisila, afwanga, wati: “Mwe yanachi ya mu Yelusalemu, mutachi ndilila nene, leelo muulililange apa lwino na ana yino.

²⁹ Kuno lolini, amanda yalwisa yano yaluti: Inkatao ayumba, na nda sino sisufyala, na mayele yano atakonkwa.

³⁰ Apano yalutampa ukunena imyamba, yaati: ‘Tuponelini!’ Ni milundu: ‘Tukupikishini!’

³¹ Kuno ndi yachita ifintu fi uku chiti ichisi, nu ku chikasu chiluwa uli?”

³² Nga nanji kwene yaili ayononi yasendwa apaliponga nawe, kuti yumolwe.

Yesu wakomkonelwa apa nsalaba

³³ Nga pano yafika pano yatangi ipanga-lya-ntwe, apano yamkonkomile na yalye ayononi, wenga ikasa lya kwilunji, nunji ukwikasa lya kuli kamani.

³⁴ Nga Yesu avwanga, ati: “Tata, uyelele, kuno yatamanyile chino yaluchita.” Nga yachita ichimala mpaka, yankana ifiswalo fyaakwe.

³⁵ Na antu yimilila na kulola. Na ikolo kwene yamsowekanga, yaati: “Wafyushanga anji, aufyushe unkola, ngali Klisto, mwana wi Leesa wino wasololwa!”

³⁶ Na asalifi kwene yamsoweka, yisa kunali yannetela manzi masasalume, yaati:

³⁷ “Ndi wewe uli mwene wa aYudea, uufyushe wenkola!”

³⁸ Na piyulu ya ntwe waakwe pali amaandiko: “Alawi uli MWENE WA AYUDEA.”

³⁹ Nga wenga apa yononi yano yasamikwe, amtuka, ati: “Chene! asi we Klisto? Ufyushe apa lwako, neswe!”

⁴⁰ Leelo wiwi uwa uwili avwanga amkalipila, wati: “Wemwi utalopa nanti Leesa, newe uli um-uputushi wa milandu uli onga?

⁴¹ Swemwi chitusipile, kuno tulupokelela amalipilo ya milimo yitu, leelo wi atachisile nanti chimwi, chino chaipa.”

⁴² Nga afwanga, wati: “Yesu, ungisukile lino ulwingila um-wene wako.”

⁴³ Yesu annena, ati: “Umwenemo ndukunena, ilelo kwene wamwa ponga nene um-Paladiso.”

Yesu wafwa

⁴⁴ Nga pano ilasi lyafika imitwe apakasi, chanda chanyepa insi yoshi kufika na pano lyatemba,

⁴⁵ kuno ilansi lyatondowela. Ni pasia lya ng'anda-nkulu-iyi-Leesa lyalepuka apakasi.

⁴⁶ Apano Yesu ukwiswi kulu wati: “Tata, nawika umweso wane um-makasa yako.” Pano wamala kuvwanga ifintu fi, mweso umputuka.

⁴⁷ Wiwi unkulu wa asalifi, pano walola chino chaombeka, atensha Leesa, ati: “Chumi, untu wi unfumi wa chumi!”

⁴⁸ Na maumba yoshi yano yalile iyakongana apaliponga, kuti yalole ifintu fiyo, pano yalola chino chaombeka, yapiluka uku mwao, yaluuma apa fifuwa.

⁴⁹ Na yoshi yano yamanyine nawe, na anachi yano yanndondile ukufuma uku Galilea, yimilila lwa patali angi yalulola ifintu fi.

Yesu wasikwa mwilindi

⁵⁰ Nga lolini, awisa untu wenga, ishina lyaakwe Yosefu, untu wa mwitengo, untu unsipe, unfumi wa chumi

⁵¹ —Wene atazumila amaswi yao nanti unnimo wao—ukumwao uku Alimatea, unsi wa aYudea, na kaili walolelanga uwene-wi-Leesa.

⁵² Untu wi waile kuli Pilato, alomba ichala chi Yesu.

⁵³ Nga achisha uku nsalaba, achinyepa nu mwenda untiswe, achiwika umwilindi lino limfilwe umwi lilinsi lya mwamba, lino umwi atatana awikwe mwenemo.

⁵⁴ Ngu wanda uo yalalilile, uwanda wa sabato utampa ukwingila.

⁵⁵ Anachi yano yisile nawe ukufuma uku Galilea, yalondile yalilola ilindi na fino yawika ichala chakwe.

⁵⁶ Nga yawela, yaya yateya ifinunkilile na mafuta ya kupakala. Nu wanda wa Sabato yapusa fino chiine nisunde.