Luka 22 - UPANGANO UPYA

Yuda wasumila ukufima Yesu

¹ Ngu wanda ukulu uwa mikate-isi-ninsasho, uno yakuluti iPasaka, walile iupalamila.

² Nga ikolo iyakapela na yakaandika yasitanga insila ya kumumola, kuno yopanga antu.

³ Nga Shetani awingila muli Yuda, wino yakuluti Iskaliote, nawe uwa pali yaya ikumi na yaili.

⁴ Nga apita, aya avwanga na ayikolo iyakapela na akulu ya asalifi, ivyakuti amfime kuno yali.

⁵ Yachimba, yalayana ukumpa impia.

⁶ Wasumila, asita lino angamfima kuno yali, pano kusi iumba.

Kuteya iPasaka

⁷ Ngu wanda wa mikate-isi-ninsasho ufika, ali wanda uno wazipile ukufyula infwele ya Pasaka.

⁸ Nga atuma Petlo na Yoane, ati: “Yangini mukatuteyanyishe iPasaka kuti tulye.”

⁹ Yannena, yaati: “Ulusita tuteyanye kwi?”

¹⁰ Ayanena, ati: “Lolini, pano mwingila un-nsi mwaukomengana nu monsi, asenzile ichaluzi cha mansi. Nnondelini mkingile un-ng'anda ino wingila.

¹¹ Nga munnene unkola-ng'anda, muti: ‘Kasambilisha alukunena, ati: Ichumba cha eni chilikwi, kuti ndye iPasaka mwenemo ponga na alondeshi yane?’

¹² Nawe wammulanga ichumba ichikulu cha piyulu, ichiteye; teyanyini-mo.”

¹³ Nga yapita, yaya yasana fino ayanenile; yateyanya iPasaka.

Chakulya cha Mwene

¹⁴ Nga pano chafika, awikala apa chakulya unkola ponga ni mitume.

¹⁵ Nga ayanena, ati: “Nakunda nkani ukulya iPasaka ii ponga nemwe, inkolelo ya machulo yane.

¹⁶ Kuno ndumunena fino ntalulya kaili, kufika na lino ilufikilila um-wene-wi-Leesa.”

¹⁷ Atola untonto, asamalisha, ati: “Tolini uu mulekanile mwensi.

¹⁸ Kuno ndumunena, fino ukufuma li kwene li ntalunwa mansi ya fisêke vya nzabibu, kufika na lino uwene-wi-Leesa ulwisa.”

¹⁹ Atola unkate, asamalisha, aukunyola, ayapa, wati: “Alau uli mwili wane, [uno wafimwa uku nnandu wino; muchite fi kwene uku kungisukila.”

²⁰ Nu ntonto fiyo kwene pano yamala ukulya, wati: “Untonto uu ali Upangano upya uku wasi wane, uno witika uku nnandu wino.]

²¹ “Lelo lolini, ikasa li wino alunfima, lili pa ponga nene apa meza.

²² Kuno uMwana-ntu wapita ishaakwe ndi fino waandikilwe, leelo akalanda uku ntu wino wamfima.”

²³ Yatampa ukutondoshana yonga uwini pali yeneyo, wino wanchita ichintu chiyo.

Kushi kulâsa leelo kuombela

²⁴ Ngu lupaka lukatuka pano yali, ngu wini wino aluloleka alusile anina.

²⁵ Ayanena, ati: “Aene ya akulukuwa yakuluyalâsa, na yamaka kuno yali yakulwitwa akasungula.

²⁶ Leelo kuli mwemwe chisi fiyo, leelo wino unkulu pali mwemwe, awe wa mwanche, na wino amukolelile, ndi fino wino alumuombela.

²⁷ Kuno wino amulusile uwini? Wino ali apa chakulya nanti uwino aluomba? Asi wino ali apa chakulya? Leelo nemwi pali mwemwe indi wa momfi.

²⁸ Nemwe ali yano mwali ponga nene um-masosho yane.

²⁹ Ichino nene namuwikila uwene, ndi fino Tata wambwikila nene.

³⁰ Kuti mulye nu kunwa apa meza yane um-wene wane, nu kwikala apa visumbi vya ukulu, angi muluputula imilandu ya nko ikumi na siili isha aIslaeli.”

Yesu walanda fino Petlo wammkana

³¹ Nga ati: “Simoni, Simoni, lola, Shetani wamusita mwemwe, kuti amwele ndi fino yakulwela ingano.

³² Leelo ntikupepela, kuti usumilo wako utachepa. Newe pano waseleuka, ukomye anyonko.”

³³ Nga annena, wati: “Mwene, ntisumila ukupita ponga newe nanti uku nyololo nanti uku nfwa!”

³⁴ Nga annena, wati: “Ndukunena Petlo, nkolwe asulamula ilelo fika na lino wankana amaila yatatu, ukuti utanmanyile.”

³⁵ Nga ayatondosha, wati: “Chene! pano namutumile mutakwite mbeti nanti kwende nanti nfwato, mwaulilwe chani?” Yaati: “Nanti chimwi.”

³⁶ Nga ayanena, wati: “Lelo kasalaka wino akwite imbeti, atole, na kwende kwene, na wino atakwite ulupanga, akashe umwenda wakwe, akakale.

³⁷ Kuno ndumunena, lino lyandikwe, litaula ukufikilila kuli nene, fino: wuminkanyiwe ponga na yasulamasunde. Kuno ifintu fino findungime, vyafikilila.”

³⁸ Nayo yaati: “Mwene, lola pa pali impanga siili.” Ayanena, ati: “Sashini!”

Yesu um-Getsemane

³⁹ Nga afuma, apita uku mwamba wa Mizeituni ndi fino wachitanga, alondeshi yaakwe yalondekana nawe.

⁴⁰ Walangi lino wafika penepo, ayanena, wati: “Pepini kuti mutingila um-masosho.”

⁴¹ Wene unkola afuntuka uche, utali waakwe ndi fino apa kusugusa ifinga, afukama, apepa, wati:

⁴² “Tata, ndukasime ntisisha untonto uu, leelo asi kukunda kwane, leelo ndi fino ukasi fiombeke.”

⁴³ [Malaika ukufuma umwiyulu aya ampa maka.

⁴⁴ Nawe fino walile aluwaika nkani nga lusha nkani ukupepa. Ngafuma ni minosi lya wazi, lilupona pansi.]

⁴⁵ Nga pano wakatuka pano alupepa, awiza uku alondeshi yaakwe, ayasana yawisi utulo uku chikonko.

⁴⁶ Nga ayanena, wati: “Nga fino umulala? Katukini mupepe, mutachimwingile um-masosho.

Yalema Yesu

⁴⁷ Nga pano achili alufwanga, lolini, iumba lya antu na wino yatangi Yuda, nawe uwa pali yaya ikumi na yaili, atayakolelela, apalamila pali Yesu, kuti amtonswele.

⁴⁸ Yesu annena, wati: “Yuda, wafima uMwana-ntu uku kumtonswela?”

⁴⁹ Na yano yali pipi nawe, pano yalola chino chamwa, yaati: “Mwene, tuyakome ni mpanga?”

⁵⁰ Wenga pali yeneyo akoma unsha wi Kapela nkulu, wamsesula ikutwi lya kwi lunji.

⁵¹ Yesu wanena, waati: “Mutachichita chimwi uku chintu chi.” Annemekela ikutwi, amposha.

⁵² Nga Yesu anena ayikolo iyakapela na ikolo ya ng'anda-nkulu-iyi-Leesa nakombe yano yamwisile, ati: “Chene! mwisile muli ni mpanga ni nonga, kuti mululema ukulupokafya-antu?

⁵³ Manda yoshi nali ponga nemwe un-ng'anda-nkulu-iyi-Leesa, mutakatwishe amakasa mundeme. Leelo kasalaka insaa ino na amaka ya chanda yamufikila.”

Petlo wakana Yesu

⁵⁴ Nga yannema yamsenda, yapita nawe uku ng'anda yi Kapela-nkulu. Na Petlo wannondile lwa patali.

⁵⁵ Nga pano yapemba umoto apa nsolo apakasi, yikala ponga, na Petlo kwene watensi ponga nayo.

⁵⁶ Ngu nsungu umwi annola atensi apa mwengelela, amkundwila amanso, wati: “Nawi kwene wali ponga nawe.”

⁵⁷ Nga akana, wati: “We, mwanachi, ntammanyile!”

⁵⁸ Akasimbo untu unji anndola, wati: “Newe kwene we wa pali yao.” Leelo Petlo wati: “Untu we, asi nene!”

⁵⁹ Kaili insaa yonga untu unji alemasha, wati: “Umwenemo, na wi kwene wali ponga nawe, kuno nawe kwene untu wa ku Galilea!”

⁶⁰ Nga Petlo ati: “Ntu we, ntamanyile chino uluvwanga!” Na liyo kwene pano achili aluvwanga, unkolwe alamula.

⁶¹ Umwene aseleuka, alolekesha Petlo. Petlo awisukila iswi lili ilya Mwene, lino wannenile, waati: “Ilelo pano nkolwe achili alamula, wankana amaila yatatu.”

⁶² Nga afumila apashi, alila monsosi.

Yasoweka Yesu nu kumuma

⁶³ Nga antu yano yalemile Yesu yamsoweka, yamuma.

⁶⁴ Yamkuwa uku maaso, nga yamtondosha, yaati: “Lausha, uwini wino wakuma?”

⁶⁵ Yamfwansha amaswi amanina tupu aya kuntuka.

⁶⁶ Nga pano kwacha, iumba lya akombe nayikolo yakapela, na yakaandika, yanndeta apitengo lyao, yaati:

⁶⁷ “Utunene ndi wewe uli Klisto.” Wayanena, wati: “Nanti namunena, mususumila awe.

⁶⁸ Kaili nanti namutondosha, musunena chimwi.

⁶⁹ Leelo ukufuma li kwene, uMwana-ntu aluwa tensi ulusansa lwikasa lilunji li Leesa uwa maka.”

⁷⁰ Nga yoshi yafwanga, yaati: “Fwandi, wewe uli mwana wi Leesa?” Nga ayanena, ati: “Mwemwe mulutaka fino inene kwene.”

⁷¹ Nga yaati: “Tulusitila chani kaili ushutila? Kuno swe yakola twapulika amaswi ukufuma un-nndomo wakwe.