Luka 21 - UPANGANO UPYA

Ihela ya mwanachi unsimbe umpina

¹ Awinuluka, alola asafi yalutela mawila yao ummbokosi ya wila.

² Alola unsimbe wenga umpina, watela mwenemo ihela siili.

³ Nga ati: “Mwenemo ndumunena, unsimbe wi umpina watela ukuluta yoshi.

⁴ Kuno yoshi yao yafimile uku usavi wao, yatela mawila mwenemo, leelo wene wi apa upina wakwe, watela fyoshi mwenemo fino akwite.”

Ifintu fino filwisa

⁵ Nga lino yamwi yalutaka ing'anda-nkulu-iyi-Leesa, fino yaiyemfya na mafinga masipe na mawila ya antu, wati:

⁶ “Iifintu fi fino mululola, manda yalwisa yano kusi ifinga lino lilushala apa linina, lino litaluponyiwa pansi.”

⁷ Nga yatondosha, yaati: “Kasambilisha, ifintu fiyo filuwa li? Ichilangisho chi chiluwa lino ifintu fi vyapalamila?”

⁸ Ati: “Tekelini mutalowa; kuno ainji yalwisa ukwishina lyane, yaati: ‘Nene ndi wenewe,’ na kaili: ‘Amanda iyapalamila.’ Nga mutachiyalondela.

⁹ Nemwe pano mwacha mwapulika impwepwe shi sumo ni mpashela, mutachopa; kuno ifintu fiyo filutangula ukuloleka, leelo impelelekesho italwisa suwa.”

¹⁰ Apano ayanena, wati: “Antu yakumwi yalukatukilana akulwa na antu yakunji, nu wene ukulwa nu wene unji.

¹¹ Kuluwa fitentema ifikulu un-nsi, ni nsala ni tauni ni ifintu fyakofya, ni filangisho ukufuma umwiyulu.

¹² Leelo pano fichili filoleke ifintu fiyo, yalumulema nu kumusunya, yalumutwala un-ng'anda shi Leesa nu kumutwala uku minyololo; mulutwalwa apa ene na pa alâsi ukwishina lyane.

¹³ Ni ifintu fiyo filuwa ushuta kuno muli.

¹⁴ Ichino wikini um-myenso yino, mutatangula ukwelengula fino mwaufwanga.

¹⁵ Kuno nene ndumupa unnomo na mano uno amilandu ino yoshi yatalumupasha nanti kukana.

¹⁶ Nemwe mulufimwa na fyasi ino, nachino na luko lwino, na akatino, na pali mwemwe yamwi yalumolwa.

¹⁷ Nemwe mulutuwiwa nantu yoshi uku nnandu wishina lyane.

¹⁸ Leelo kusi ulunyele nanti longa ulwa pa mitwe ino, luno lululowa.

¹⁹ Nemwe uku kusisimisha mulufyusha imyenzo yino.

²⁰ Leelo pano mwacha mwalola unsi wa Yelusalemu walilwa na ii sumo, apano manyini fino ukuononeka kwakwe kwapalamila.

²¹ Apano yano yali um-Yudea, yitukile um-myamba na yano yali apakasi umunsi, yitukile ukushi, na yano yali um-fyalo yaatingila mwenemo.

²² Kuno amanda yao aya chilandusi, kuti fyoshi fino fyandikwa fiombeke.

²³ Akalanda kuli yano yanwamile na yano yalonsha amanda yao! Kuno kuluwa amalanda tupu umunsi nukali uku antu ya.

²⁴ Yalukomwa ni mpanga, yalulemwa nu kusendwa unjantu yoshi, ni Yelusalemu ilulyatwa na akulukuwa, fika na lino amanda ya akulukuwa yalufikilila.

²⁵ Kaili kuluwa vilangizyo ukwilansi nu mweshi ni ntanda, nunsi kuluwa kusamala ku antu yakulukuwa uku mumo wi yemba na maimbi yaakwe.

²⁶ Kuno antu yalukalila myenso uku ngofi nu kulolela ifintu fino vilwisa un-nsi; kuno amaka ya mwiyulu yalutelengana.

²⁷ Apano yalulola uMwana-ntu alwiza umwipufi, ponga na maka nukulu nkani.

²⁸ Ichino pano ifintu fi fyatampa ukuloleka, lingamilini nu kukatusha imitwe ino, kuno ukulusi wino wapalamila.”

Amasambilisho ya nsamfu

²⁹ Ayanena unnumbe, ati: “Lolini unsamfu ni fiti finina fyoshi.

³⁰ Pano vyalemba mukululola nu kumanya mwe akola fino chisiku ichipalamila.

³¹ Ifino nemwe kwene, pano mwalola ifintu fiyo fyatampa ukuloleka, manyini fino uwene-wi-Leesa uupalamila.

³² Mwenemo ndumunena, antu ya mpanda wa kasalaka yatalusila fika na lino fyoshi fi filuloleka.

³³ Iyulu ninsi filusila, leelo amaswi yane yatalusila nanti uche.

³⁴ “Ichino tekelini, imyenso yino itanwamilwa nu kulaka nu kolesi, nu kuchulila mikalo ya, uwanda uo utamwisila suwa fino umpanti ukulupantika.

³⁵ Kuno ifino ulwisila antu yoshi yano yatensi un-nsi yoshi.

³⁶ Ichino mwemwi mutachilala nanti limwi, angi mulupepa, ukuti mufyuke muli fiyo fyoshi, pano fyacha fyaloleka, nu kwimilila apa maaso ya Mwana-ntu.”

³⁷ Nga wasambilishanga unsanya onsi un-ng'anda-nkulu-iyi-Leesa, nusiku apita ukuyulala uku mwamba uno yakuluti Mizeituni.

³⁸ Na antu yoshi yalankanga suwa, kuti yaye un-ng'anda-nkulu-iyi-Leesa, kuti yampulikishe.