Luka 20 - UPANGANO UPYA

Kutondosha Yesu apa maka yaakwe

¹ Walangi uwanda umwi pano wasambilishanga antu un-ng'anda-nkulu-iyi-Leesa, nu kusundi Iswi-sipe, ayikolo iyakapela na yakaandika yaile ponga nakombe.

² Yannena, yaati: “Utunene, aluomba ifintu vi uku maka chi? Kaili uwini wino wakupa amaka ya?”

³ Ayanena, ati: “Nene namutondosha iswi lyonga, mnene.

⁴ Ulubatisho lyi Yoane, Chene! lwafumile ukwiyulu nanti uku antu?”

⁵ Yatondosyana akola na akola, yaati: “Ngi twati: lwafumile umwiyulu, akuti: ‘Nga uku chani mutansumile?’

⁶ Na ngi twati: ‘Lwafumile uku antu,’ antu yoshi yakututama na mafinga, kuno yasumile Yoane fino ilau.”

⁷ Nga yaati: “Tutamanyile kuno lwafumile.”

⁸ Yesu ayanena, wati: “Nene kwene nsumunena uku maka chi yano nduchita ifintu fi.”

Alimi ni chalo cha mizabibu

⁹ Nga atampa ukunena antu unnumbe u wati: “Untu wenga wapesile ichalo cha mizabibu; awika alimi, nga apita um-masi; ayawikala manda tupu kweneko.

¹⁰ Ngu um-macha atuma umuofi uku alimi yao, ukuti yampe ifisêke fimwi ifya mizabibu; leelo alimi yamuma, yamwinga minwe.

¹¹ Atuma umuofi unji; yamuma nawe kwene yamsekelisha, yamwinga minwe.

¹² Kaili atuma uwa utatu; nawe kwene yamuma uluma, yamkwesela ukushi ya chalo.

¹³ “Ngu nkola chalo cha mizabibu wati: ‘Nanchita uli? Nantuma uMwanane wino nakunda; palumwi wene yalumchindika.’

¹⁴ Leelo walangi pano alimi yannola, yamba uku mbali yonga, yaati: ‘Alawi uli mpyani; Ali! tumumole; ukuti tupyane.’

¹⁵ Nga yamsumba ukushi ya chalo cha mizabibu, yamumola. Ali unkola-chalo cha mizabibu aluyachita uli?

¹⁶ Alwisa nu kuumola alimi yao, ni chalo icha mizabibu alupa anji.” Walangi pano yapulika fiyo, yaati: “Awe, chipelele ukutali.”

¹⁷ Ayakundwila amanso, wati: “Nga fwandi, ukulikuti chani iswi li, lino lyandikwa: ‘Ifinga lino yakakula yasula ilino lyawa ifinga ikulu ilya kumbali?’

¹⁸ Untu wensi wino waponela apifinga liyo, alufunekafuneka, na wensi wino lyaponela, alushika swe.”

¹⁹ Nga yakaandika na ikolo iyakapela yakasime ukunnema liyo kwene, leelo yopa antu. Kuno yamanyile fino unnumbe uo ayumile akola.

Kulipa Kaisali ikodi

²⁰ Nga yantya, yatuma antu kuyunengula, yano yauchisile fino antu ya kapanga, ukuti yapulike chino walanda, nga yamtwale kuno kuli amaka nu ukulu wa nnâsi.

²¹ Nga yamtondosha, yaati: “Kasambilisha, tumanyile fino ululanda nu kusambilisha ningo, utalondile ukulu wa antu, leelo ulusambilisha insila yi Leesa, iya kapanga.

²² Chili ningo ukupa Kaisali ikodi nanti awe?”

²³ Leelo wene wamanyile uchenjesu wao, ayanena, wati:

²⁴ “Ndangini ulupia. Luli ni chata na maandiko yini?” Yannena, yaati: “Ayi Kaisali.”

²⁵ Nga ayanena, wati: “Ifyi Kaisali, mpini Kaisali, ni fyi Leesa, mpini Leesa.”

²⁶ Nga yatachili yanneme uku maswi yaakwe apa antu. Yasunguka uku mifwangile yaakwe, yantusha.

Apa ututuluko

²⁷ Nga aSadukeo yamwi yaya kunali, yano yakuluti kusi ukututuluka kwa antu, nga yamtondosha.

²⁸ Yaati: “Kasambilisha, Mose watwandikile fino untu ndi wafwilwa unnina nawe ali nu nchi, leelo asi nu mwana, atole umwanachi wiyo, kuti afyale nawe.

²⁹ Nga kwali antu saba, anda yonga; uwa ntangulo wapindwile, afwa nanti mwana.

³⁰ Nu wa uwili atola unchi wiyo, afwa nanti mwana.

³¹ Fika nu wa utatu wamtola, apalinji yoshi saba yafwa nanti kusha ana.

³² Ichisila nu mwanachi kwene afwa.

³³ Nga apa kututuluka aluwa inka wini? Kuno wasasilwe na yoshi saba.”

³⁴ Nga Yesu ayanena, ati: “Ana ya nsi yi yakulupindula nu kupindukwa.

³⁵ Leelo yano yasanwa yasipila ukufika uku nsi ilye, nu ku kututuluka kwa afwi, yatalupindula nanti ukupindukwa.

³⁶ Kuno yatalufwa kaili, kuno yaluwa wi yamalaika, nayo ana yi Leesa kuno ana ya kututuluka.

³⁷ Leelo uku nnandu wa afwi fino yalututuluka, na Mose kwene walansile apa katûtu, pano watasile uMwene, ati: ‘Leesa wi Ablahamu na Leesa wi Isaka na Leesa wi Yakobo.’

³⁸ Wene asi Leesa wa afwi, leelo uwa apuma, kuno yoshi yatensi kunali.”

³⁹ Yakaandika yamwi yannena, yaati: “Kasambilisha, walanda ningo.”

⁴⁰ Nga yatesishe kumtondosha chimwi ichisila cha ifintu fi.

Mwana nu Mwene wi Daudi

⁴¹ Ayanena, wati: “Yakulutuli antu, fino Klisto umwana wi Daudi?

⁴² Kuno Daudi unkola kwene un-chitabu cha Sabuli afwansile, wati: ‘Mwene wanenile uMwene wane: Uwikale ikasa lyane ilya kwilunji.

⁴³ Fika na lino nduwika asiluembu yako, yawe ichisumbi apa kuwikila amulu yako.”

⁴⁴ Ali ngi Daudi alumwita uMwene, wawa umwanakwe uli?”

Yesu wasokesha antu kuli yakaandika

⁴⁵ Na pano antu yoshi yampulikisyanga, anena alondeshi yaakwe, wati:

⁴⁶ “Chenjelelini yakaandika, yano yakunda ukupitana yaswite nkanjo intali, nu kulaulwa um-masokoni, nu kwikala uku nkolelo un-ng'anda shi Leesa, na pa fisumbi fya nkolelo apa fyakulya.

⁴⁷ Yalulya inganda sha asimbe, nu mu ufi wao yauchita fino aya chumi, yalumbulula apa kupepa; wene yao yalunwamilwa nuputusi.”