Luka 2 - UPANGANO UPYA

Kufyalwa kwi Yesu

¹ Nga chali um-manda yalye, ichilangaso chifuma kwi Kaisali Augusto, ukuti ayantu yoshi aya kuno ukushi yaandikwe amashina yao, nu kusoloshiwa.

² Ukusolosha kwali ukwa ntangulo ukwandikwa, pano Kilenio wali unndâsi wa Silia.

³ Antu yoshi ukuyu wandikwa, chila ntu uku nsi wakwe.

⁴ Yosefu nawe wafumile uku Galilea un-nsi wa Nazaleti, wapitu ukuya uku Yudea, wafika um-nsi wi Daudi uno yatangi Betleemu; kuno uwa ng'anda nu luko lwi Daudi.

⁵ Ukuti uwaandikwe ponga na Malia unchi, wino wimile, nawe wali ninda.

⁶ Nga chali walangi yachili yatensi kuo kwene, amanda yaakwe yafika ukuti apape.

⁷ Wafyala umwana wiyele, wamswika imyenda ya chana, yanndalika umushuwa cha kulyila ing'ombe, kuno yatawine ukwa kulala un-ng'anda ya eni.

Achemi na yamalaika

⁸ Ngu munsi iyo kwene mwali achemi yikalanga un-nchundu, yalolelanga ufyo wao usiku.

⁹ Malaika wa Mwene waya suwa nukulu wa Mwene wayayengesela koshi koshi, ingofi shiyalema nkani.

¹⁰ Malaika wayanena, waati: “Mutachopa, kuno namuletela amaswi masipe aya kuchimba nkani uku yantu yoshi.

¹¹ Kuno ilelo umunsi wi Daudi watafyalwa uku nndantu wino, Unkulushi, ali Klisto uMwene.

¹² Ni chilangilisho kuli mwemwe ali chi: mwamnsana umwana uncheche aswikiwe imyenda ya chanche, awisi un-chisandiko cha kulyila ing'ombe.”

¹³ Liyo kwene iumba ikulu lya mwiyulu lyali ponga na malaika wiyo, angi yalutesha Leesa nukuti:

¹⁴ “Utensho kuli Leesa umwiyulu, na kuno ukunsi uwelesho kuli yano yamsipila.”

¹⁵ Walangi pano yamalaika yao yapita umwiyulu, achemi yao yatondoshana, yaati: “Lelo tuye uku Betleemu, tukalole fino chichiwa, chino Mwene watumanyisha.”

¹⁶ Nga yapita suwa, yasana Malia na Yosefu nu mwana uncheche awisi un-chisandiko.

¹⁷ Pano yanndola, yayalandila ifintu fya ku mwana wiyo, fino yanenilwe.

¹⁸ Yoshi yano yapulika, yasunguka uku ifintu fiyo fino yalandilwa na achemi.

¹⁹ Leelo wene Malia wantusha fiyo kwene, angalwelengula um-mweso wakwe.

²⁰ Achemi yao yapiluka angi yalulumbanya Leesa nu kumtensha uku ifintu fyoshi, fino yapulika nu kufilola, ndi fino yanenilwe.

Yatemela Yesu ishina

²¹ Na pano yafika amanda nnane aya kumchita ichibalu, yamtemela ishina lyaakwe, yaati: i Yesu; ndi fino watemilwe na malaika, pano achili asendwe inda.

Simeoni na Ana

²² Nga pano amanda ya kuswepa kwao yafika, ndi fino iNtambi yi Mose ili, yamtwite uku Yelusalemu, kuti yamwike uku Mwene.

²³ Ndi fino chaandikwe un-Ntambi ya Mwene: umwana wensi uwiyele kuli nyina, alwitwa unswefu uku Mwene.

²⁴ Yakafime na mawila ndi fino chanenilwe un-chilangaso cha Mwene, inkunda ziili nanti imisusu yili iya nkunda.

²⁵ Nga lola uku Yelusalemu kwali untu ishina lyaakwe i Simeoni, nawe untu wa chumi, wachindika Leesa nu kulolela utekesho wa Islaeli, nu Mweso Nswefu wali ponga nawe.

²⁶ Nawe walile wanenwa nu Mweso Nswefu, fino atalulola infwa, lino achili alole Klisto wa Mwene.

²⁷ Nga awiza un-ng'anda-nkulu-iyi-Leesa akolelilwe nu Mweso Nswefu. Nga afyasi yatwala umwana Yesu mwenemo, kuti yamchitile fiiyane ni Ntambi.

²⁸ Unkola kwene wampokelile um-makasa yaakwe, watesha Leesa, wati:

²⁹ “Apa kasalaka Mwene, aleke umuofi wako apite lumi, ukuyana niswi lyako.

³⁰ Kuno amaso yane iyalola ufyusi wako,

³¹ uno wawika apa maaso ya antu yoshi.

³² Mwengelela wa kuswefesha akulukuwa, nu ukulu kuuantu yako, Islaeli.”

³³ Nga isi na nyina yasunguka apa ifintu fino fyafwangwa apa mwana wiyo.

³⁴ Simeoni ayapepelela, anena Malia nyina, ati: “Lola, wi wawikilwa kupona nu kukatusha ainji umwi Islaeli, nu kuwa chilangisho chino chilupashanyiwa.

³⁵ Newe wenkola impanga ilwingila um-mweso wako — ukuti yaloleke amelenguzi ya myenso tupu.”

³⁶ Nga pali ilau umwanachi, ishina lyaakwe i Ana, mwana wi Fanueli, uwa luko lwi Aseli. Wali uwa myaka iminji, wikashile niya imyaka saba fuma usungu wakwe.

³⁷ Nawe unshimbe wa myaka amakumi nnane na ini, nawe atatinanga un-ng'anda-nkulu-iyi-Leesa, wapepanga usiku nu nsanya, nu kuishilisha ichakulya angi alupepa.

³⁸ Nawe wingile liyo kwene wasamalisha Leesa ponga, wataka pali yoshi yano yalolelanga ukulushi wa Yelusalemu.

³⁹ Nga pano yamala fyoshi fino fiine ni Ntambi ya Mwene, yawela ukumwao uku Galilea, uku nsi wa Nazaleti.

Yesu un-ng'anda-nkulu-iyi-Leesa

⁴⁰ Umwana wiyo akula wawa na maka, washula amano, ni nkumbo shi Leesa shyali kunali.

⁴¹ Nga afyazi yaakwe yayanga imyaka yoshi uku Yelusalemu uku wanda ukulu uwa Pasaka.

⁴² Nga pano wawa uwa myaka ikumi na ili, yapitile-ko ukuyana ni ntambi ya wanda ukulu.

⁴³ Nga pano amanda yasila apa kuwela, mwana wiyo Yesu ashala ichishila uku Yelusalemu, leelo afyazi yatamanyile.

⁴⁴ Nayo yatangi ali ponga naanji undwendo, yapita lîla, nayo yanshitanga unjanina na yano yamanyine nayo.

⁴⁵ Nga pano yaula ukunndola, yawela uku Yelusalemu, na kuno yalunshita.

⁴⁶ Walanga pano amanda yatatu yasila, yanndola un-ng'anda-nkulu-iyi-Leesa, atensi apakasi iyaKasambilisha, aluyapulikisha nu kuyatondosha.

⁴⁷ Na yoshi yano yampulika, yasunguka uku mano yaakwe nu ku ufwange wakwe.

⁴⁸ Yasungwike pano yanndola, na nyina wannena ukuti: “Mwanane, uku nichani watuchita fi? Lola, so nene twali tulukushita ni myenso itinwama!”

⁴⁹ Nawe wayanena, waati: “Kuni chani mulushita? Chene! mutamanyile fino ichintu chiyo ichakuti mbwe un-ng'anda yi Tata?”

⁵⁰ Nayo yatamanyile iswi liyo lino wayanenile.

⁵¹ Nga awela ponga nayo fika nu ku Nazaleti; nawe wayachindike. Na nyina watuzishe angi amanyile fyonsi um-mweso wakwe.

⁵² Nga Yesu wakula um-mano ni lingo, angi asipile Leesa na antu.