Luka 19 - UPANGANO UPYA

Yesu na Zakayo

¹ Nawe pano wingile um-Yeliko wapisile unzi apakasi.

² Nga lolini, kwali umwi ishina lyaakwe i Zakayo; wali unkulu wenga pali yakalifya yikodi, walu nsafi.

³ Wene wasitanga ukulola Yesu untu wa uli, leelo atachili annole uku winji wa antu, kuno wali umwimpi.

⁴ Nga akolela ulwilo uku nkolelo, akwela unku kuti annole, kuno wamwisa apite un-nsila iyo.

⁵ Nga pano Yesu wafika penepo, alingamila kweneko umwiyulu, annena, ati: “Zakayo, wika suwa, kuno ilelo chindungime kwiza uku ng'anda ukwako.”

⁶ Nga akalauka ukwika suwa, ampokelela uku kuchimba.

⁷ Nga pano antu yalola, yang'wing'wintika yoshi, yaati: “Wayuwikala kwa untu wa maifyo.”

⁸ Leelo Zakayo awimilila, anena uMwene, wati: “Lola, Mwene, namwankanya apakasi usafi wane, mpe apina, na ngi napoka untu chimwi uku uchenjesu, imweseshe amaila yani.”

⁹ Nga Yesu wannena, waati: “Lelo ufyusi wisa un-nganda ii, kuno na wi kwene umwana wi Ablahamu.

¹⁰ Kuno uMwana-ntu wisilu shita nu kufyusha chino chalowa.”

Asha ni mpia sha mwene wao

¹¹ Nga pano yapulika ifintu vi, aungilisha kufwanga unnumbe, pano watapalamila uku Yelusalemu, nayo wene yatangi palumwi uwene-wi-Leesa ukuloleka suwa.

¹² Nga wati: “Untu umwi unkulu wapisile um-masi, kuti akapokelele uwene nu kuwela.

¹³ Nga awita antu ikumi apa aomfi yaakwe, ayapa chila wenga impia simwi, ayanena, ati: ‘Chulushangi fika na lino nduwela.’

¹⁴ Leelo antu ya un-nsi waakwe yamtuwa, yatuma antu ukunnondela, yaati: ‘Tutamkasime wi ukutulâsa.’

¹⁵ “Walangi lino wawela, watapokelela uwene wakwe, asita kuti aomvi yano wapile mpia shaakwe, yitwe kunali, ukuti amanye chino yafyasha uku uchulusi wao.

¹⁶ Nga awisa uwa ntangulo, wati: ‘Mwene, impia shako nafyasha maila ikumi kuluta.’

¹⁷ Nga annena, wati: ‘Wasifya, we umuofi wino wasipa; kuno wawa wa kutailwa uku ifintu finono, newe ulâse imisi ikumi.’

¹⁸ Awisa nu wa uwili, ati: ‘Mwene, impia shako nafyasha maila yasano kuluta.’

¹⁹ Nga anena na wiyo kwene, wati: ‘Ulâse newe imisi isano.’

²⁰ “Nga awisa nunji, ati: ‘Mwene, impia shako sino nawisile un-chitambala isi.

²¹ Nofile kuno we ntu wino watala; ukutola chino utawisile, ukusakata chino utapesile.’

²² Nga wene annena, wati: ‘Uku nnomo wako nakuputwila unnandu, umuofi unjipe we. Ummanyile fino nene ntu natala, nkutola chino ntawisile, nkukumbula chino ntapesile.

²³ Ali, nga uku chani utatwasile mpia zyane uku yachulusi, ukuti pano nisa yampe ponga na chino yafyasha?’

²⁴ Anena yano yimilile lwa pipi, ati: ‘Mpokini impia siyo, mpe wino ali nasho ikumi.’

²⁵ Nayo yaati: ‘Mwene, ali nasho ikumi!’

²⁶ ‘Ndumunena, wensi wino ali na chimwi, alupiwa, leelo wino atakwite chimwi, na chino ali nacho kwene alupokwa.

²⁷ Na kaili asiluembu yane yano yatakasime kuti njalâse, yaletini pa, myafyule apa maaso yane.’ ”

Yesu wingila um-Yelusalemu

²⁸ Nga pano wafwanga fiyo, ayakolelela ukupita ukuya uku Yelusalemu.

²⁹ Walangi pano wapalamila uku Betfage ni Betania, ukuya uku mwamba uno yakuluti Mizeituni, atuma yaili apa alondeshi yaakwe,

³⁰ wati: “Yangini uku nsi uu uno upalamile, na pano mwaya mwenemo, mwansana umwana-mpunda unyepe, wino umwi atachili ankwele, nsapulini, mndete pa.

³¹ Ngi umwi wamutondosha, waati: ‘Uku chani mulunsapula,’ muti: ‘Umwene alunsita.’ ”

³² Na yano yatumilwe yaya yalola ndi fino ayanenile.

³³ Nga pano yalusapula umwana-mpunda, akola yayanena, yaati: “Uku chani mulusapula umwana-mpunda?”

³⁴ Yaati: “Umwene alunshita.”

³⁵ Nga yantwala kuli Yesu, yala ni myenda yao apiyulu apa mwana-mpunda, nga yaakwesha Yesu.

³⁶ Nga lino yalupita, yala imyenda yao un-nsila.

³⁷ Nga lino wapalamila uku tentenka um-mwamba wa Mizeituni, iumba lyonsi ilya alondeshi yatampa ukuchimba nu kutensha Leesa uku maswi makulu, uku milimo yoshi iya maka ino yawine.

³⁸ Yaati: “Wapepelelwa uMwene wino alwisa ukwisina lya Mwene: ukuweleshana umwiyulu nu tensho ukwiyulu!”

³⁹ aFaliseo yamwi umwi umba yannena, yaati: “Kasambilisha, lesha alondeshi yako.”

⁴⁰ Ayanena ati: “Namunena, ndi ya yatusha, amafinga yamwangula.”

⁴¹ Nga lino wapalamila apipi, alola unsi, aulilila.

⁴² Ati: “Nga ngi umanyile apa wanda u, newe kwene, ivyakuweleshanya; leelo fifisime apa kasalaka uku maaso yako.

⁴³ Kuno amanda yalwisa, pano yasileumbu yako yalukukulila ilinga likulishe nu kuku yalikisha konsi.

⁴⁴ Yalukuponya pansi wewe na anako munuli, yatalusha ifinga nanti limwi apa linina, kuno utamanyile ngi li, lino Leesa wisile akutule.”

Yesu waswefya ng'anda-nkulu-iyi-Leesa

⁴⁵ Nga awingila un-ng'anda-nkulu-iyi-Leesa, atampa ukuwinga yaya yano yachulushanga mwenemo.

⁴⁶ Wayanena, ati: “Chaandikwe: ‘Ing'anda yane yamwa iya kupepela!’ Leelo mwemwi umuichita ichele lyi yakapoka-fya-antu.”

⁴⁷ Nga wasambilishanga manda yoshi un-ng'anda yi Leesa. Leelo ayikolo iyakapela na yakaandika, ponga na ikolo ya antu yasitanga insila yakuti yamumole.

⁴⁸ Leelo yatawine ichakuchita, kuno antu yoshi yawanga ponga nawe, angi yalumpulikisha.