Luka 16 - UPANGANO UPYA

Kakosha njipe uwa fyuma

¹ Wanena alondeshi yaakwe kaili, wati: “Pali untu wenga unsafi, wino wali nu ntu wa kuisunga; yaya yalanda fino alusewanya ifyuma fyaakwe.

² Nga amwita, annena, ati: ‘Amaswi uli ya yano napulika kunuli? Landa fino fili ifintu fyane fino ukulusunga, kuno ususha unjisunga kaili.’

³ Kasunga wiyo um-mweso wakwe, wati: ‘Nchite uli? Kuno umwene wane wantisha un-kusunga ifintu. Nsina maka ya kulima; kulomba ndulola insoni.

⁴ Manyile chino nanchita, ukuti pano nacha nawingwa ukusunga ifintu, yangampokelela uku mang'anda yao.’

⁵ Nga awita yano yali nimpa uku mwene wakwe, anena chila wenga, akutangwila uwa ntangulo, ati: ‘Wakofile uli uku mwene wane?’

⁶ Nawe wati: ‘Nteko sha mafuta umwanda onga.’ wannena, wati: ‘Tola icheti chako, wikala suwa, uwaandike amakumi yasano.’

⁷ Anena unji kaili, ati: ‘Newe wakofile uli?’ Nawe wati: ‘Maloboto ya ngano umwanda.’ Annena, wati: ‘Tola icheti chako, waandike amakumi nnane.’

⁸ Umwene wiyo atensha kasunga wiyo njipe, kuno waomba uku mano, kuno antu ya kuno ukushi yaluomba ningo na mano um-ifintu vyao um-mpanda wao, kuluta na ana ya mwengelela.

⁹ “Nene namunena, uchitilini yakatinu uku fyuma fiipe ifya kuno ukushi, ukuti pano ifyuma fyacha fyaula, yamupokelela um-wikalo wa manda yoshi.

Kulela ningo ifyuma

¹⁰ “Uwa chumi uku finono, ali ni chumi uku chikulu kwene, nu njipe uku chinono waipa, nu kuchikulu kwene.

¹¹ Ngi musi ya chumi uku Fyuma fiipe, uwini wino alumpa chimwi uku fyuma fya chumi?

¹² Nga ngi mutalusunga ningo ifyuma fya ntu unji, uwini wino alumpa ifili fitu?

¹³ “Kusi umuofi angaombela aene yaili, kuno angatuwa wenga nu kukunda wenga; nanti angawila kuli wenga, nu kusula wenga. Mutangi mombele Leesa ni Fyuma.”

¹⁴ Nga aFaliseo yano yakunda impia, pano yapulika ifintu fiyo, yamsoweka.

¹⁵ Ayanena, wati: “Mwemwe muli yano mukuluushisha apa maaso ya antu, leelo Leesa amanyile imyenso yino. Kuno chino chachindikwa uku antu, apa maaso yi Leesa chaipa.

¹⁶ “Intambi na malau fyalipo fika na pali Yoane; ukufuma liyo Iswi-sipe ilya wene-wi-Leesa lilusundwa, na chila ntu aluwingisha uku maka.

¹⁷ Leelo changupala nkani iyulu ninsi fisile, apa kuti itonontwa lyonga ilya Ntambi litine.

¹⁸ “Weshi wino wata unchi nu kutola unji aluchita ifya upundu; na wino watola wino iya wata, aluchita ifya upundu.”

Unsafi na Lazalo

¹⁹ Nga wati: “Pali untu wenga unsafi waswalanga imyenda ya mala ya zambalau nayo imitele, walyanga ifinone manda yoshi.

²⁰ Nu mpina wenga ishina lyaakwe i Lazalo; wikalanga apa nnyango wakwe, nawe wali ni filonda tupu.

²¹ Wakumbukanga ukulya ifishalila fino fyapona apa meza ya nsafi wiyo; ni mbwa sisanga silumyanta ifilonda fyaakwe.

²² “Ngu mpina wiyo wafwile, yamalaika yamsenda yamtwala apa chifuwa chi Ablahamu. Nu unsafi wiyo nawe afwa, ashikwa.

²³ Nga uku yasimu pano wali um-machulo, akatusha amaso yaakwe, alola Ablahamu lwa patali, na Lazalo ali apa chifuwa chakwe.

²⁴ Alila wafwanga, ati: ‘We tata Ablaamu, ndolele inkumbu, utume Lazalo ativye insongo ya nwe waakwe um-manzi, asusha ululumi lwane, kuno nduchula um-moto uu.’

²⁵ Leelo Ablahamu afwanga, wati: ‘Mwanane, umanye fino uwewe wapokelile ifintu fyako ifisipe uku mikalo yako, ifino na Lazalo wapokelile ifiipe; na kasalaka wene uwi ali pa alupusa, newe chiluwaya.

²⁶ Na kaili, apakasi itu, sweswe nemwe, kuli ichilina ichikulu, ukuti yano yalusita ukufuma kuno tuli ukwisa kuno muli, yaatisa, nanti antu ya kuno muli ukulamba kuno tuli.’

²⁷ Nga wati: ‘Lelo tata, ndukulomba, untume uku ng'anda yi tata.

²⁸ Kuno ndi na chane yasano, akuti ayasokeshe, yatachi yise apantu pa apa machulo.’

²⁹ Leelo Ablahamu wati: ‘Kuli Mose na malau, yayapulike yao.’

³⁰ Leelo nawe wati: ‘Mwiko ta, tata Ablahamu, leelo ngi waya untu ukufuma uku yafwi, yalufipela.’

³¹ Leelo annena, wati: ‘Ngi yatapulike Mose na malau, yatalupulika nanti untu angatutuluka uku yafwi.’ ”