Luka 14 - UPANGANO UPYA

Uwa safula waposhiwa uwanda wa Sabato

¹ Nga pano wingila un-ng'anda ya wikolo umwi apa aFaliseo uwanda wa Sabato, kuti alye ichakulya, yannolekeshaa.

² Nga lolini, untu umwi wali panali wino wali unwale wa safula.

³ Yesu afwanga, anena yakamanya-ya-ntambi na aFaliseo, ati: “Chene! umwiko ukupozya untu uwanda wa Sabato nanti awe?”

⁴ Wene yatusha. Nga annema, wamposha, anneka ampita.

⁵ Ayanena, ati: “Uwini pali mwemwe ngu mwana waakwe nanti ng'ombe yaakwe itiponela un-chifula, atangaifumye liyo kwene uwanda wa Sabato?”

⁶ Nga yatachili yalande chimwi apa ifintu fi.

Kuchefya

⁷ Yano yalalikwe, pano wawine yalusolola ifisumbi fya ku nkolelo, ayanena unnumbe, wati:

⁸ “Ngulalikwe na umwi uku winga, utachikala uku chisumbi cha nkolelo, kuno palimwi atalalikwa untu wino akulusile.

⁹ Nga awisa wino amulalike mwaili nu kukunena, ati: Silu untu wi, pa awikale.’ Apano ululola insoni ukutampa ukusita ichisumbi uku chisila.

¹⁰ Leelo ngi walalikwa, yanga ukikale apa chisumbi uku chisila, ukuti ndi pano wisa wino akulalike akunena, wati: ‘Katane, nguna ku, uku nkolelo nkani.’ Apano ululola ukulu pali yoshi yano yateshi ponga newe.

¹¹ Kuno weshi wino waikuzya, yalumchefya, na wino wauchefya, yalumkusha.”

¹² Nga wanena wino wannalike, waati: “Pano wachita ichakulya cha nsanya nanti icha mangusi, utita yakatako na anyonko nanti aluko lwako nanti antu yanji aya safi, kuti yatachi yakulalike newe angi yakulipa.

¹³ Leelo pano wachita ichakulya, uwite apina, alemala, aya matenda, napofula.

¹⁴ Newe uluwa ni nkata, kuno yatakwite ichakukupa; kuno ululipwa apa kututuluka kwa antu ya chumi.

Uwalalike antu uku chakulya

¹⁵ Nga wenga pali yano yatesi apa chakulya, pano wapulika ifintu fi, annena, wati: “Ali ni nkata wino alulya unkate um-wene-wi-Leesa.”

¹⁶ Leelo wene annena, wati: “Untu umwi wachisile ivyakulya tupu, alalika ainji.

¹⁷ Atuma umuofi waakwe pano chafika ukulya ichakulya, ayanena yano yalalikwe, wati: ‘Nguni, kuno ifintu fyoshi ifipya.’

¹⁸ Yatampa yoshi uku mweso onga ukuleoka-leoka. Uwantangulo wannenile, waati: ‘Nemwi ntikala ichalo; ndusita nkachilole. Ndukulomba ungelele.’

¹⁹ Nunji waati: ‘Ntikala ing'ombe pea shisano; napita nkasheshe. Ndukulomba ungelele.’

²⁰ Nunji waati: ‘Ntifumalila, ichino fiyo ntangi ngise.’

²¹ Ngu momfi wiyo wampita, waya wanena umwene waakwe amaswi yao. Nga unkola-ng'anda wiyo alakalika, annena umuofi wakwe, ati: ‘Pita suwa, uye un-nsila inkulu nu tuzila twa m-misi, ulete apina pa, na yano yalemala, napofula na ya matenda.’

²² Umuofi wati: ‘Mwene, chino wanena ichiombeka, leelo umweko uli kweneko na li kwene.’

²³ Umwene wannena, waati: ‘Yanga apashi um-mbalawala nu mbali mbali, uyachitile amaka, yingile unkasi, ing'anda yane ishule.

²⁴ Kuno namunena, nati: Pali yano nalalike, pasi nanti wenga wino alulya uche apa chakulya chane.’ ”

Ukuwa unndondeshi

²⁵ Nga maumba tupu pano yalondekine nawe, waselewike, ayanena, ati:

²⁶ “Nguntu wiza kuli nene, nawe atatuwile isi na nyina, nunchi na anakwe, nanina ayonsi nanachi, endita, nupuma waakwe unkola kwene, atangi awe unndondeshi wane.

²⁷ Untu wensi wino atalusenda unsalaba waakwe nu kundondela, atangi awe unndondeshi wane.

²⁸ “Kuno uwini pali mwemwe, ndakasi ukukula ichipanda, atatana wikale nu kusolosha, alole ngali ni vya ku umalila?

²⁹ Atiza apotwe pano waukatusha undufula, na antu yoshi yano yalulola, yatampa ukumsoweka.

³⁰ Yaati: ‘Untu wi watangwile ukukula, leelo asi na maka ya kumalila.’

³¹ “Nanti umwene chi, ndalusita ukutwala isumo ukulwa nu mwene unji, atatangula awikale nu kwelengula, fino unkola ponga na antu yaakwe elfu ikumi, angawesha ukukomana na wiwi alwisa kunali na antu ielfu amakumi yaili?

³² Na ngi walola ataweshishe, atuma antu asita ukupulikana, pano untu wilye achili ukutali.

³³ Ifino na chila ntu pali mwemwe, nga tasile fyoshi fino ali navyo, atangi awe unndondeshi wane.

³⁴ “Unsilya wazipa, leelo unsilya ngi utakalipe ungatelwa chani ukalipe?

³⁵ Utasipile apa fyalo nanti apitumba; antu yausumba apashi. Uwa makutwi ya kupulika, apulike.”