Luka 13 - UPANGANO UPYA

Mufipele

¹ Nga lili kwene yalipo antu yamwi, yano yannandile imbalu sha aGalilea, yano Pilato wumunkinye uwasi wao ni vipelo fyao.

² Ayanena, ati: “Chene! mulwelengula fino aGalilea yao yali na maifyo ukuluta a mu Galilea yoshi, ichaleka yasanwa ni ifintu fiyo?

³ Ndumunena: Awe! Leelo ngi mutafipesile, nemwe mwensi mulufwa fiyo kwene.

⁴ Nanti ayaya ikumi na nnane, yano chipanda chatamile uku Siloamu, yafwa, mulwelengula fino ayano yali ayononi ukuluta antu yoshi yano yatesi um-Yelusalemu?

⁵ Ndumunena- Awe! Chisi fiyo! Leelo ngi mutafipeshile, nemwe mwensi mulufwa fiyo kwene.”

Unnumbe wa nsamfu utasêkile

⁶ Ayanena unnumbe u, ati: “Untu umwi wali nunku upesilwa un-chalo chakwe cha mizabibu, aya ukuyusita amaku kweneko, leelo atayasana.

⁷ Wanena kalima wa chalo cha mizabibu, waati: ‘Lola, imyaka itatu i indwiza ukwisusita amaku umu nku u ntasana chimwi. Uukome, uku chani ulonona ichalo?’

⁸ Leelo wene annena, ati: ‘Mwene, ute na mwaka u mbusakwilile, mbutelele chitindi

⁹ Ndi wacha wasêka amaku, angi chashipa, angi utasêkile, apano uukome.’ ”

Yesu wapozya umwanachi umwi uwanda wa Sabato

¹⁰ Uwanda wa Sabato wali un-ng'anda imwi iyi Leesa angi alusambilisa.

¹¹ Nga lolini, kwali umwanachi umwi wino wali ni chiwa waomboka imyaka ikumi na nnane, nawe watundumala, atangi aolola nanti uche.

¹² Yesu pano wannola wamwita, wannena, waati: “Mama, wasapulwa imbombo yako.”

¹³ Amwikila makasa, nawe aololoka liyo kwene, atensya Leesa.

¹⁴ Leelo uwikolo wa ng'anda yi Leesa alakalika, kuno Yesu wapozya untu wiyo uwanda wa Sabato, afwanga anena iumba, ati: “Kuli amanda sita aya kuomba imilimo mwisae muposhiwe apa manda yao, leelo asu wanda wa Sabato.”

¹⁵ Leelo Mwene avwanga, ati: “Mwe yaufi, Chene! chila untu pali mwemwe, atakuyulila ing'ombe nanti mpunda yaakwe un-nuwa uwanda wa Sabato, kuti akanwesye?

¹⁶ Ngu mwanachi wi umpanda wi Ablahamu, wino Shetani wanyepa imyaka ikumi na nnane i, chitanjile asapulwe indema i uwanda wa Sabato?”

¹⁷ Pano wavwanga fiyo, imitwe iyakula yoshi yano yampazyaa; iumba lyonsi lyachimba uku ifintu vikulu fino vichisilwe nawe.

Aladadi ni nsasyo

¹⁸ Apano avwanga, ati: “Uwene-wi-Leesa ukoline na chani? Nga mbukolanye na chani?

¹⁹ Ukoline nu lupeche lwa Aladadi, luno untu watozile alupela un-chalo chakwe; lumela, luwi chiti, ni fyuni fya mwiyulu fimwa um-matai yaakwe,”

²⁰ Afwanga ilya uwili, ati: “Mbukolanye na chani uwene-wi-Leesa?

²¹ Ukoline ni nsaso sino umwanachi watoshile, autikanya un-ntowa shitatu isha usu, woshi wasasa.”

Unndyango ufyenkanu

²² Nawe wapitananga um-misi nu ntusi, angalusambilisha pano wayanga uku Yelusalemu.

²³ Untu umwi amtondosha, wati: “Mwene, Chene! antu yano yalufyuka yali yache?” Nga ayanena, ati:

²⁴ “Talilini ukwingila apa nnyango nfyenkanu, kuno ndumunena fino ainji yalusita ukwingila yalupotwa.

²⁵ Pano unkola ng'anda wacha wimilila nu kuyala unnyango, nenwe mutampa ukwimilila apanzi nu kukong'onsha, angi muluti: ‘Mwene, tuyulile.’ Nawe alumunena, ati: ‘Ntamumanyile kuno mufumile.’

²⁶ Apano mulutampa ukuti: ‘Twalyanga nu kunwa pali wewe, newe wasambilishanga um-misolo yitu.’

²⁷ Nawe aluti: ‘Ndumunena, ntamumanyile kuno mufumile; tinini kunondi, mwensi mwe yakachita ya fiipe.’

²⁸ Apano kuluwa ukulila nu kusha mino, pano mwacha mwalola Ablahamu na Isaka na Yakobo na malau yoshi um-wene-wi-Leesa, nemwe umusumbilwa ukunsi.

²⁹ Yalwisa antu ukufuma uku kafumandaka nu ku kawa ndaka nu kufuma ku kaeya na ku katutu, nayo yalwikala apa chakulya um-wene-wi-Leesa.

³⁰ Nga lolini, kuli ayachisila yano yaluwa aya ntangulo na ya ntangulo yaluwa aya chisila.”

Yesu walilila iYelusalemu

³¹ Liyo kwene aFaliseo yamwi yisa yannena, yaati: “Tina pa, uye ukunina, kuno Yelodi alusita ukukumola.”

³² Ayanena, ati: “Yangini mukanene nkusa wiyo, muti: Lola, ilelo ni yulu ndufumya iviwa nu kupozya alwale, nu wanda wa utatu ndumalila.

³³ Leelo kande mpite nu kulema inzila yane ilelo niyulu nu wanda unji, kuno chitangi chiwe ilau ukufwila siku uku Yelusalemu.

³⁴ Yelusalemu, we Yelusalemu, ukulumola malau nu kuyatama na mafinga, yano yatumilwe kunuli, amaila yanga yano nasita ukuyakonganika ana yako, ndi fino nyina-nkoko akulufukatila ana yaakwe um-mapa yaakwe, leelo mutakuzumila.

³⁵ Lolini, ng'anda yino yashala ichipompa. Leelo namunena, nati: Mutalusha mundola kaili siku lino muluti: Wapepelelwa wino alwisa ukwisina lya Mwene.”