Luka 12 - UPANGANO UPYA

Amaswi uku yalondeshi

¹ Liyo kwene pano amaumba yakonganike ielfu na elfu, chaleka yalyatana nu kulyatana, watampa ukunena alondeshi yaakwe intangulo, ati: “Chenjelini apa nsasho zya aFaliseo, ali ufi.

² Leelo kusi iswi lino lyafisama, lino litalusweluka, nanti ifise lino litalumanyika.

³ Ichino fyoshi fino mwafwanga apaluku vilupulikwa apatiswe, na fino mwapwepweza um-makutwi ya antu um-mang'anda unkasi, filulandwa apa ng'anda apiyulu.

⁴ “Nene namunena mwemwe yakatane, mutachiyopa yao yano yalumola umwili, ni chisila yatakwite chino yangachita ukuluta pao.

⁵ Leelo nammulanga wino mungopa; opini wiyo wino ngi wumola untu, ali na maka aya kumsumbila un-chilinkwe cha moto; ali namunena, wiyo uwino mopini.

⁶ Chene! tuni tusano tutakukalwa uku hela shiili? Leelo katangi kalatilwe nanti konga apa maaso yi Leesa.

⁷ Leelo, ni nyele zya ku mitwe yino kwene shasolosiwa shoshi. Ichino mutachopa: mwemwe mulusile tuni utwinji.

⁸ “Nene namunena, nati: Wensi wino wacha wansumila apa antu, Mwana-ntu nawe alumsumila wiyo apa maaso yi yamalaika yi Leesa.

⁹ Na wino wankana apa maaso ya antu, nawe alukanwa apa maaso yi yamalaika yi Leesa.

¹⁰ Na wensi uwacha wafwanga iswi uku Mwana-ntu, alwelelwa; leelo wino wasula uMweso Nswefu atalwelelwa.

¹¹ Na pano yacha yamutwala apa maaso yi ya ng'anda shi Leesa, na pa akulu na yakalâsa, mutachamâla ukwelengula amaswi yino, fino mwauvwanga.

¹² Kuno uMweso Nswefu alumusambilisha liyo kwene, ichakuti muvwange chino chisifile.”

Unndimi nsofu

¹³ Untu wenga umwiumba wannena, waati: “Kasambilisha nena uwachane angankanye ifyuma fya upyani witu.”

¹⁴ Leelo wene annena, ati: “Untu we, uwini wino wambwika nene imbwe mputusi wa milandu ino, nanti kaankanya kuli mwemwe.”

¹⁵ Ayanena, ati: “Chenjelini mutawa nusuwa, kuno upuma wa ntu usi um-ifintu tupu fino ali nafyo.”

¹⁶ Nga ayanena unnumbe, ati: “Ichalo cha untu umwi unsafi chalile chasipa nkani.

¹⁷ Atampa ukwelengula um-mweso wakwe, ati: ‘Nanchita uli, kuno ntakwite apa kuwika ifyakulya fyane.’

¹⁸ Ati: ‘Nanchita fi: nansambulula intanta shane, nga nkule inina inkulu nkani, umuno mbwike ifyulya fyane fyoshi ni ifintu fyane.

¹⁹ Apano mbunena nti: Mweso, uli ni ifintu tupu ifisipe, fino wauwikila uku myaka tupu, pusanga nu kulya nu kunwa nu kuchimba.’

²⁰ Leelo Leesa wannena, waati: ‘Chiyungani we, usiku wilelo yalusita umweso wako, ni ifintu fyoshi fino wauwikila vikuwa i vyini?’

²¹ Ifino ali untu wino aluuwikila apa lwakwe, atausafya kuli Leesa.”

Mutachi chulila ifintu fya mwili

²² Nga anena alondeshi yaakwe, ati: “Chaleka namunena fi: mutachichulila uwikalo wino, muti: twandya chani, nanti imyili yino mwanswala chani.

²³ Kuno amikalo yalusile ichakulya nu mwili ulusile chakuswala.

²⁴ Welengulini pali yakungwa fino yatakupela nanti kukumbula; yatakwite intanta nanti umwakuwikila, na Leesa aluyalyisha. Mwemwi mulusile ifyuni nkani!

²⁵ Uwini pali mwemwe ndi wauchuzya unkola, angaongelezya utali waakwe nanti ikasa lyonga?

²⁶ Ali ngi mutangi muchite chimwi nanti kache, uku chani ukuuchuzya uku ifintu vinina?

²⁷ Welengulini amaluwa fino yakulumela, yatakuomba, yasupilinga; nene namunena fino nanti Salomoni kwene um-ukulu waakwe onsi, atazwite ningo wi limwi pali yeneyo.

²⁸ Ali ngi Leesa aluswika isote ilya nchundu fiyo, lino lilipo ilelo niyulu lisumbwa umwilungu, Chene! atalumuchitila ifisipe nkani mwemwe, mwe ya utailo uche?

²⁹ Mwemwi mutachisita chino mwandya nanti chino mwanwa, nanti ukusamâla, awe.

³⁰ Kuno ifintu fi fyoshi ifino yakulusita antu yoshi aya kuno ukunsi; leelo So wino amanyile fino mulusita ifintu fi fyoshi.

³¹ Leelo sitini uwene-wi-Leesa, ni ifintu vi fyoshi mulongesiwa.

³² “Mutachopa mwe kaufyo kanono; kuno So wino awine fino chasipa ukumupa uwene uo.

³³ Kazyini fino muli nafyo, mufime uwila. Muuchitile mbeti sino sisusila; chino mwawika chitalupunguluka umwiyulu, apantu pano patakupalamilwa nu mwifi, nanti mpese ukupeka.

³⁴ Kuno pano mwawika ifyuma fino, apano ni myenso yino iluwa.

Aomfi ya kutailwa na asi ya kutailwa

³⁵ “Muswale zileme, ni fyaka fino angi filwaka.

³⁶ Nemwe muwe wa antu yano yalulolela umwene wao, pano wawela ukufuma uku winga, ukuti pano wisa nu kukong'onsha, yanjulile suwa.

³⁷ Inkata yao aomfi yao, yano pano umwene wao wacha wisa, aluyasana yalamwike; umwenemo ndumunena, aluunyepa un-nsana nu kuyawika apa chakulya, alwisa nu kuyapa.

³⁸ Ngi wisa usiku apakasi, nanti apano usiku wakula, nu kuyasana yalamwike, yali ni nkata aomfi yao.

³⁹ Leelo mumanye iswi li: fino unkola ng'anda ngamanyile lino umwivi wamwisa, atangi alale, atangi ashe ing'anda yaakwe ukutululwa.

⁴⁰ Nemwe kwene mwikala ningo, kuno lino mutalwelengula, apano uMwana-ntu alwisa.”

⁴¹ Nga Petlo wannena, waati: “Mwene, unnumbe u ulutumila sweswe sile nanti antu yoshi kwene?”

⁴² UMwene afwanga, ati: “Nga uwini leelo wino umuofi wa kutailwa, wa mano, wino mwene waakwe wamwika apa aomvi yaakwe yoshi, ayape ifyakulya fyao lino fyasitwa?

⁴³ Inkata yaakwe umuofi wiyo, wino pano mwene waakwe wiza, alumsana aluomba fiyo.

⁴⁴ uMwenemo ndumunena, alumwika apa ifintu fyaakwe.

⁴⁵ Leelo umuofi wiyo ngi um-mweso waakwe waati: ‘Umwene wane washimba ukwisa,’ watampa ukuma aomfi nachakwe ayonsi na anachi, angalulya nu kunwa nu kukoleka.

⁴⁶ Umwene wa momfi wiyo alwisa uwanda uno nanti ukwelengula awe, na lino atamanyile, alumuma nkani, nu kumwika ponga na yano yatatailwe.

⁴⁷ Ngu muomfi wino wamanyile chino mwene waakwe akasi, atauteya nanti ukuchita fino akasi, alumwa nkani nkani.

⁴⁸ Leelo wino atamanyile, nawe wachita fino vilingine nu kuumwa, alumwa uche. Na weshi wino wapiwilwe ifyafula, filusitiwa ifyafula kunali, na wino wasêkelwa ivinji kunali, yalusita ifinji kunali.

Ivilangisho fya m-manda

⁴⁹ “Ngishilusumba umoto kuno ukushi, ngi ulwaka, ichani chino ndusita kaili?

⁵⁰ Leelo ndi nulubatisho luno lundungime ukubatisiwa, nene nalwilikilwa ukufika lino ulufika.

⁵¹ Chene! mulwelengula fino nishilu uleta ukuweleshanya kuno ukushi? Ndumunena, awe chisi fiyo, leelo ukulandaukana.

⁵² Kuno ukufuma li kwene li ng'anda yonga mwamwa antu yasano yalandaukana, yatatu kuli yaili, na yaili kuli yatatu.

⁵³ Yalulandaukana isi nu mwana, nu mwana ni isi, nyina nu mwanakwe kachi, nu mwana na nyina; nyinafyala nanka mwana, na nka mwana na nyinafyala.”

⁵⁴ Wanena amaumba, ati: “Pano mwalola ipufi lino lilufuma uku kawandaka, muti: ‘Semba yamwisa.’ Na fiyo kwene ifino chiwa.

⁵⁵ Na lino mwapulika unsa wafuma uku katutu, muti: ‘Kwamwa unsanya,’ na fiyo kwene ifino kuwa.

⁵⁶ Mwe yaufi mwe! Mwamanya ukulola ifyakushi ni fya mwiyulu, leelo kuno ichani mutamanyile kumanya ifya manda ya apa kasalaka?

⁵⁷ “Nga fino mwemwe mwenga apalwino mutakusolola chino chasipa?

⁵⁸ Kuno pano muchili mulupita nu wa milandu wako ukuya uku yakombe, un-nsila chita unte ukupulikana nawe; kuti atize akutwale nu kukufisha kuli kaputula wa milandu, na kaputula wiyo akutwale uku nsalifi; nu nsalifi wiyo akutwale uku nyololo.

⁵⁹ Ndukunena, utalufuma mwenemo nanti uche, siku lino wacha wamalila ukulipa ihela ya kumalila.”