Aloma 9 - UPANGANO UPYA

Leesa na antu yaakwe yasolole

¹ Ndufwanga ichumi muli Klisto, ntaluvwanga ufi, umweso wane ulungimikila um-Mweso Nswefu.

² Fino ndi na malanda minji nu kuwaika, kuno kutalu tusha um-mweso wane.

³ Kuno ningasita nenkola kupalulwa na Klisto pa nnandu wa achane, aluko lwane uku kufyalwa.

⁴ Kuno nayo aIslaeli yano yachisilwe ukuwa yana, yapiwa ukulu na mapangano ni Ntambi nu kuombela kuli Leesa na malanyo yaakwe.

⁵ Ali yatatakulu ayao, na muli yeneyo wafumile Klisto afyalwa uku mwili, ali wino ali piyulu ya ifintu fyoshi, Leesa, watensiwa manda yoshi; chiwe fiyo kwene!

⁶ Leelo kusi ukuti iswi li Leesa litaomfile chimwi. Kuno yasi aIslaeli yoshi aya mipanda ya Islaeli.

⁷ Nanti yatangi yawe yoshi ana, kuno yali um-mpanda wi Ablahamu, leelo: Muli Isaka umpanda wako ulwitwa.

⁸ Ali kuti: asi yana ya mwili yano ana yi Leesa, leelo ana ya ulanyo ulye yasolo-siwe fino aya mpanda.

⁹ Kuno iswi lya ulanyo ili: Apa makati ya kwene ndwisa, na Sala aluwa nu mwana.

¹⁰ Nga chisi fiyo sile, leelo Labeka nawe kwene, pano wacha wasenda inda kuli wenga, uli Isaka, tata witu.

¹¹ Kuno pano yachili yafyalwe ana yao, pano yachili yachite chimwi chisipe nanti chiipe, -kuti liloleke lino Leesa akasime nu kusolola asi ku milimo, leelo kuno wino witwa-

¹² wanenilwe fi: Unkulu aluombela unnono.

¹³ Ndi fino chaandikwe: “Nankunda Yakobo, leelo Esau nantuwa.”

¹⁴ Ali tungatuli? Kuli Leesa kusi chumi? Mwiko ta!

¹⁵ Kuno anenile Mose, ati: “Nankumbukila wino nakumbukila; nannolela nkumbu wensi wino nalolela inkumbu.”

¹⁶ Ichino ngi fiyo, asi ku maka yi wino alusita, nanti wino alwituka, leelo yi wino alukumbukila, ali Leesa.

¹⁷ Kuno Maandiko yavwa-nsile kuli Falao: “Nakwimike kuti ndange amaka yane muli wewe, ishina lyane lilumbuke insi yoshi.”

¹⁸ Ichino, alu-mkumbukila wino alushita, na wino alusita kukomya, alu-nkomya.

¹⁹ Ichino, wannena: “Nga fino achili alusumbikila? Kuno uwini angakana chino alusita?”

²⁰ Leelo, we ntu we wini wino ungapazyana na Leesa? Chene! chintu chino chawaswa, chinganena uwa chiwasile: uku chani wambwasa fi?

²¹ Nanti nakamata, Chene! asi na maka ukwifu kama-ntwa lyonga ichivya chonga icha nchinsi ni chinji chino chisi nu nchinsi?

²² Ichino ichani leelo ngi Leesa alusita ukulanga ukali waakwe nu kumanyisya amaka yaakwe, uku chelelesi nkani walekelile ififya fya ukali fino fyachisilwe uononi.

²³ Na kaili aumanyisya uwinji wa utensyo waakwe muli fiyo ififya fya kukumbukilwa, fino wateinye fuma kali viwe nukulu.

²⁴ Ali sweswe yano watwisile, asi kufuma ku aYudea mpela, leelo kufuma nu ku yakulukuwa kwene.

²⁵ Ndi fino wafwansile muli Osea: “Ndwita yano yasi-antu-yane, kuwa antu-yane; na wino asi-unkundikwa-wane, kuwa nkundikwa-wane.

²⁶ Na kaili chiluwa palye pano yanenilwe: Mwemwi musi yantu yane, apano yalwitwa ana yi Leesa wa upuma.”

²⁷ Isaya nawe afwansile pali Islaeli: “Nanti ndi usolosi wa antu ya Islaeli uli wa misenga ya kuli yemba, asyalile yalufyusiwa.

²⁸ Kuno chino wavwansile, Mwene alufikilisha ukunsi nu kumalila suwa.”

²⁹ Na kaili ndi fino Isaya watangwile ukufwanga: “Ngu Mwene-wa-Maumba atali atusyile ana, twali tuwe wa Sodoma, twali tukolenkana ni Gomola.”

aIslaeli ni Iswi-sipe

³⁰ Ali tufwange chani? Ukuti: antu yakulukuwa, yano yatalondile chumi, yalilwe ichumi, kuli kuti ichumi chino chifumile um-usumilo.

³¹ Leelo aIslaeli nanti yalondela intambi ya chumi, yatachili yafikilile uku ntambi iyo.

³² Kuno ichani? Kuno yatailondile uku usumilo, leelo yaichita uku nsila ya milimo. Yakumika ukwifinga lya kukumika.

³³ Ndi fino chaandikwe: “Lolini, nawika um-Sioni ifinga lya kukumika, ni pampa lya kuponya. Na wensi wino asumile munali atalukulwa ntwe.”