Aloma 8 - UPANGANO UPYA

Upuma um-Mweso

¹ Ichino apa kasalaka, kusi uputuzi kuli yao yano yali muli Klisto Yesu.

² Kuno intambi ya Mweso wa upuma uno uli muli Klisto Yesu, yankulula uku ntambi ya maifyo ni nfwa.

³ Kuno fino Ntambi itangi ichite, kuno isi na maka uku mwili, Leesa kuno watumile Mwanakwe unkola uku mwata nu mwili wa maifyo, uku nnandu wa maifyo, waputwila maifyo um-mwili.

⁴ Ukuti ichumi cha Ntambi chifikiliziwe muli sweswe, yano tutalondile ifintu vya mwili, leelo vya Mweso.

⁵ Kuno yano yalondile ifintu vya mwili yakulwelengula ifintu vya mwili, leelo yano yalondile ifintu vya Mweso, yakulwelengula ivya Mweso.

⁶ Kuno ukwelengula ivya mwili kukuleta infwa, leelo ukwelengula ivya Mweso kukuleta upuma nutekano.

⁷ Kuno ukwelengula kwa mwili usiluembu kuli Leesa; kuno kutalu-chindika intambi yi Leesa; nanti kutangachindika.

⁸ Yano yakululondela ivya mwili, yatangi yazipile Leesa.

⁹ Leelo nemwe musi antu ya um-mwili, leelo a um-Mweso, ngu Mweso wi Leesa utenzi muno muli. Leelo untu wensi asi nu Mweso wi Klisto, wiyo asi wakwe.

¹⁰ Leelo Klisto ngali muli mwemwe, umwili wino angi wafwa uku nnandu wi ifyo, leelo imyenzo ino imipuma uku nnandu wa chumi.

¹¹ Leelo ngu Mweso wi Wiyo wino wamtutulwile Yesu Klisto uku yafwi, atenzi muno muli, wino watutulwile Klisto Yesu uku yafwi, alumpa upuma myili yino, yino yafwa, uku Mweso waakwe wino atenzi muno muli.

¹² Ichino ndi fiyo yachane, swe ya mpa, leelo tusi ya mwili, twikale nu kulondela ivya mwili.

¹³ Kuno ndi mwikala nu kulondela ivya mwili, mulufwa. Leelo ndi mwasula imilimo ya myili uku Mweso, mulwikala.

¹⁴ Kuno yoshi yano yalukolelelwa nu Mweso wi Leesa, yao ali yana yi Leesa.

¹⁵ Kuno mutapokelile umweso-wa-usha, uno uku-leta kaili ngofi; leelo mwapokelile uMweso wa kuchitwa ana, kuli weneo tulwita: Aba, kuli kuti: Tata.

¹⁶ Mweso unkola kwene akulwimikila ponga ni myeso yitu, fino swe yana yi Leesa.

¹⁷ Leelo ngi swe yana, swe yapyani: apyani yi Leesa, apyani ponga na Klisto; kuno ngi tulu-chusiwa ponga nawe, tutensiwe ponga nawe kwene.

Utailo wa antu yi Leesa

¹⁸ Kuno ndwelengula amachulo ya makati ya kasalaka, fino chisi chimwi apa ukulu ulye uno uluswelulwa kuli sweswe.

¹⁹ Kuno ifilengwa fyoshi kwene filulolela nkani ukuloleka kwa yana yi Leesa.

²⁰ Kuno ifilengwa fyoshi fiwikalile sile, asi ku kukasama kwi vyenevyo, leelo ku nnandu waakwe nkola wino waviwika; leelo um-tailo,

²¹ kuno ivilengwa navyo kwene vilukululwa nu kutisiwa um-uzya wi ozyo, vingile um-kauwele wa ukulu wa yana yi Leesa.

²² Kuno tumanyile fino ifilengwa fyoshi fika na li kwene, vilupema nu kuwaika wi mama wino alufyala mwana.

²³ Leelo asi fiyo mpela, neswe kwene, swe yano tuli ni fisêke ifya ntomolo ifya Mweso, neswe kwene tulupema um-myeso itu, tululolela ukuchitwa ana: uli ukulusi wa myili yitu.

²⁴ Kuno twafyusiwe uku utailo uo. Leelo utailo uno tululola, asi utailo; kuno ungataila uli chintu chino ululola?

²⁵ Leelo ngi twataila chintu chino tutaluchilola, tuluchipe-mbela uku nte.

²⁶ Afino na Mweso kwene nawe akutwa-swa um-utonte witu; kuno tutamanyile ukupepa fino chituile, leelo Mweso unkola akulutupepela ku kupema, nanti kufwanga.

²⁷ Nawe wino akulwesha imyeso, amanyile chino uMweso alusita, kuno akufwangila aswe-fiwa ndi fino Leesa akasi.

²⁸ Neswe tumanyile fino kuli yano yakunda Leesa, ifintu fyoshi fikuombeka kuwa fisipe, kuli yano yitwa uku kukunda kwakwe.

²⁹ Kuno yalye yano wama-nyile kufuma kali, wayasolwile ukufuma kali yakolane nu mwanakwe, ukuti awe uwiyele apa yachakwe ainji.

³⁰ Na yalye yano wasolwile ukufuma kali, ayano waita; na yalye yano waitile, wayalila ichumi kwene; na yalye yano waya-lila ichumi, wene wayakusha.

Lukundo lwi Leesa

³¹ Ichino tuvwange chani uku ifintu fiyo?

³² Ngi Leesa ali ponga neswe, uwini alutupota? Wene wino atalolile nkumbu umwanakwe unkola, leelo wamfimile uku nnandu witu sweswe swensi, angaula uli ukutupa ifintu vyonsi ponga nawe?

³³ Uwini wino aluyasongelela asololwa yi Leesa? Leesa ali wino aluyalila ichumi;

³⁴ uwini wino anga-yaputwila imilandu? Klisto Yesu ali wino wafwile, endita, nu kuluta pali fiyo, watutuluka ku yafwi, nawe ali kwikasa lilunji ilyi Leesa na kaili uwino alutulombela.

³⁵ Uwini wino alutupalula undukundo lwi Klisto? Chene! Amalanda nanti ukuulilwa, nanti amachulo nanti insala, nanti ukuswalupa, nanti kusanswa, nanti lungawa lupanga.

³⁶ Ndi fino chaandikwe, ukuti: “Uku nnandu wako tulumolwa unsanya ilîla. Twasolosiwa ukuwa nfwele zya kufyulwa.”

³⁷ Leelo ifintu fyoshi fiyo tulufipota nu kuluta uku nkola wino watukunda.

³⁸ Kuno namanyikisha ningo fino kungawa ulufu, nanti upuma, nanti yamalaika, nanti yano yalâsa, nanti fino viliko, nanti fino filuwapo, nanti ayamaka,

³⁹ nanti fino fili umwiyulu, nanti fino vili apansi, nanti chi-lengwa chimwi chonsi, chitangi chitupalushe nu lukundo lwi Leesa, luno luli muli Klisto Yesu Mwene witu.