Aloma 4 - UPANGANO UPYA

Ablaamu wazana chumi uku usumilo

¹ Nga tuvwange chani pali Ablaamu tatakulu witu uku mwili?

² Kuno ndi Ablaamu walilwe ichumi uku milimo yaakwe ali ni cha kuitensya, leelo asi apa maaso yi Leesa.

³ Kuno aMaandiko yalutuli? Ablaamu wazumile Leesa, nu ku chintu chiyo unkola walilwa ichumi.

⁴ Leelo uku ntu wino aluomba imilimo, ukulipwa kwakwe kuta-soloziwe fino amawila, leelo ukuwa kai kakwe.

⁵ Leelo uku ntu wino ataluomba unnimo, leelo ataile wiwi wino alumwalila ichumi, untu wiyo walilwa ichumi pa kuzumila kwakwe.

⁶ Ndi fino Daudi kwene atakile inkata yaakwe untu wilye wino Leesa alumwalila ichumi kwaula imilimo:

⁷ “Inkata yao yano yelelwa ukuifya kwao, na yano maifyo yao yakuwiwa.

⁸ Inkata ya ntu wino Mwene atalunnolela amaifyo.”

⁹ Nga Chene! inkata iyo ukuli yano yachitwa ichibalu nantu ukuli yao kwene yano yatachisilwe ichibalu? Kuno tulutaka, ukuti kuli Ablaamu usumilo waakwe walilwe ukuwa ichumi.

¹⁰ Walilwe uli leelo? Pano wachisilwe ichibalu nanti pano achili achitwe ichibalu? Asi pano wachisilwe ichibalu, leelo pano achili achitwe ichibalu.

¹¹ Nawe wapokelile ichilangizyo chi ichakuchitwa ichibalu, ukuwa chima-nyililo cha chumi ku nzila ya usumilo, uno wali nao pano achili achitwe ichibalu; kuti awe isi wao yoshi yano yazumila nanti yatachisilwe ichibalu, ukuti nayo kwene yalilwe ichumi.

¹² Na kaili awe isi wi yano yachitwa ichibalu, asi yano yachisilwe ichibalu sile, leelo yano yalondile um-makando ya usumilo waakwe tata witu Ablaamu, uno wali nao pano achili achitwe ichibalu.

Ulanyo wi Leesa ukuzunwa uku usumilo

¹³ Kuno ulanyo ulye uwa kuti aluwa upyani wa nsi, wapilwe Ablaamu ponga nu mpanda wakwe, kusi ku Ntambi leelo ku chumi chino walilwe uku usumilo.

¹⁴ Kuno ngi yalye aya Ntambi ali yapyani, usumilo ungawa uwa chaka, nu lanyo ungavulungana.

¹⁵ Kuno iNtambi iyino ikuleta ichilakali; kuno ndi pasi Ntambi kutali kuwe iviipe.

¹⁶ Ichino vyafumile um-usumilo, kuti viwe uku nkumbu, kuti ulanyo uwe na maka uku mipanda yoshi, kusi kuli yaya aNtambi sile, leelo kuli yao ausumilo wi Ablaamu kwene, wino itata witu swensi kwene.

¹⁷ Ndi fino chaandikwe: “Nakuwika kuti uwe isi wa antu ingi a nsi,” apa maaso yi Leesa wiyo, wino wazumila, wino akulututulula afwi, akulwita fino visiko navyo viwako.

¹⁸ Nawe wazumile nu kutaila, nanti fino miele yaakwe yali yakuntataila; kuti awe isi wa antu ingi ansi. Ndi fino chavwanzilwe: “Ifino ikwata lyako liluwa.”

¹⁹ Wino atatolompwike um-usumilo, pano welengwile umwili waakwe fino walile wafwa—pano walile wafika imyaka umwanda wonga—na pa umba wi Sala.

²⁰ Leelo ku ulanyo wi Leesa atatentenginye uku usumilo. Leelo wapiwe maka uku usumilo wakwe, angi aluntensya Leesa.

²¹ Kuno angi amanyikisye fino Leesa angachita ndi fino wamulainye.

²² Ichino uku chintu chi kwene kunali walilwe ichumi.

²³ Leelo chitaandikwe sile ku nkola fino walilwe ichumi,

²⁴ leelo nu ku nnandu witu sweswe kwene, yano tulwalilwa fiyo kwene, swe yano tumzumile wiyo, wino wamtutulwile Yesu Mwene witu um-yafwi.

²⁵ Wino wafimilwe uku nnandu wa maifyo itu, nu kututululwa kuti twalilwe ichumi.