Afilipi 3 - UPANGANO UPYA

¹ Na apa chisila, yachane, chimbai um-Mwene. Ukumwandikila ifintu vivi kwene chitaifile kunondi, leelo chingamusipila.

Chumi cha mpomvu

² Chenjelelini yasimbwa, chenjelelini aomvi aipe, chenjelelini akuiputula.

³ Kuno swe yachibalu yano tulupepa Leesa uku Mweso, nu kulola ukulu muli Klisto Yesu, kuno tutautaile umwili.

⁴ Nanti fino nemwi nali ntaile umwili. Nuntu wensi ndi waulola fino ali na chimwi ichakuutailila mwili, nemwi ndusizye:

⁵ Nachisilwe ichibalu uwanda wa nnane, ne ntu nafuma uku ya aIslaeli, unduko lwi Benyamini, ne mwEblania tome tome, uku kulema Ntambi ne nFaliseo.

⁶ Nali nunte nazunyile ikongani, uku chumi chino chikulwalilwa uku Ntambi nasundike.

⁷ Leelo fintu fino vyali unzano kuli nene, navilola ukuwa ivya chaka, uku nnandu wi Klisto.

⁸ Endita, na nkani, ndusolozya ifintu vyonsi ukuwa ivya chaka, uku nnandu wa uzipe uno wavulisya uwa kummanya Klisto Yesu, Mwene wane. Wino kuli Wenewe nalovya ifintu vyonsi, navilola ukuwa wa mavi, ukuti inzane Klisto.

⁹ Na kaili ndoleke muli Wenewe ntawa ni chumi chane ne nkola, chino chikuzanwa uku Ntambi. Leelo chino chilufuma umu usumilo uno uli muli Klisto, ichumi chino chilufuma kuli Leesa, uku usumilo.

¹⁰ Ukuti immanye unkola na maka ya kututuluka kwakwe, nu uminkano wa machulo yaakwe, nu kufwa kwane nkolenkane nu kufwa kwakwe.

¹¹ Ukuti ndi chingawa nfikilile uku ututuluko wa yafwi.

¹² Asi kuti naya nafika, nanti nati mbwa wa mpomvu; awe, leelo ndulemasya umpito wane, kuti indeme chilye chino kuli chenecho ndemilwe na Klisto Yesu.

¹³ Yachane, ntaluwelengula um-mweso wane fino nati ndema, leelo nduomba iswi lyonga sile, ndulatila ivya kali, ndwitukilila ivya nkolelo.

¹⁴ Ndupitisya, imfikilile chilambu cha lwito lwa mwiyulu ulwi Leesa muli Klisto Yesu.

¹⁵ Ichino swemwi yano swe ya mpomvu, twelengulae fiyo. Nanti pali yamwi mwelengula ivinina, Leesa angamulanga na liyo kwene.

¹⁶ Leelo pao pano twaafika, tupitae fiyo kwene!

Tulondele Paulo

¹⁷ Yachane, muukolanye nene, mulolae yao yano yalupita ukulondela, ndi fino mwalola kuli sweswe.

¹⁸ Kuno ainji yalupita wi yasiluembu ya nsalaba wi Klisto, ndi fino namunenile amaila tupu amaswi yao, na li kwene ndumunena uku monsozi.

¹⁹ Ukusila kwao ukuola, Leesa wao inda, ukulu wao uli un-nsoni shao, yalusita ifintu vya kunzi.

²⁰ Kuno swemwi ukaya witu uli umwiyulu, ukufuma kuwo kwene tululolela Unkulusi, Mwene Yesu Klisto.

²¹ Wino alusenulula imyili yitu iya ulanda, ikolane nu mwili waakwe uwa ukulu, ku maka yalye yano kuli yeneyo angachita ifintu vyonsi viwe apa mulu yaakwe.