Afilipi 1 - UPANGANO UPYA

¹ Paulo na Timoteo, aomvi yi Klisto Yesu, uku yaswefiwa yoshi muli Klisto Yesu, yano yali uku Filipi, ponga na Yaskofu (yakangalila yikongani) na Diakoni. (yakazwilizya)

² Inkumbu ziwe kuno muli nu welezyo fino vilufuma kuli Leesa Tata witu, nu ku Mwene Yesu Klisto.

Nsamalisho shi Paulo

³ Ndusamalizya Leesa wane ndi pano namwelengula,

⁴ amanda yoshi pano ndumupepela mwemwe mwensi, pano nalomba insala zyane uku kuchimba.

⁵ Uku nnandu wa wuminkano wino uku kulimvya iswi-zipe, ukufuma uwanda wa ntangulo kufika nilelo.

⁶ Nene chino nzumile ichili chi, ndi fino wiwi, wino watalike imilimo mizipe ummyenzo yino, aluimalila kufika pa wanda wi Klisto Yesu.

⁷ Fiyo kwene ndi fino chindungime nene ukwelengula ala-vi pali mwemwe mwensi, kuno mwemwe muli um-mweso wane; kuno un-kunyepwa kwane ni milimo ya kuliwalila iswi-zipe nu kulikomya, nemwe mwensi muminkana nene un-nkumbu zi.

⁸ Kuno Leesa isyuta wane, fino ndumulûka mwemwe mwensi undukundo lwi Klisto Yesu.

⁹ Na ku alu-kulomba kwane, kuti ulukundo lwino luvulisye nkani um-mano nu kumanya konsi,

¹⁰ kuti musolole fino vyazipa; kuti muwe ni myenzo mizipe, nanti yifyo, kufika pa wanda wi Klisto.

¹¹ Na kuno muzyule ivisêke vya chumi, uku nzila yi Yesu Klisto, uku kulumbanya nu tensyo wi Leesa.

Kwikalila Klisto

¹² Leelo yachane, ndusita mumanye, fino ifintu vyonsi fino vyanzana, vyaombike uku kulimvya iswi-zipe.

¹³ Kuno apa Mboma ponsi nu ku yanji kwene ukunyepwa kwane kumanyike, fino nyefilwe uku nnandu wi Klisto.

¹⁴ Na achane tupu yano yali um-Mwene, pano yasimpa imyenzo yao apa nnandu wa kunyepwa kwane, yalusya nkani kulanda iswi lya Mwene nanti ngofi.

¹⁵ Yamwi yalusunda amaswi yi Klisto uku nnandu wa uzuwa ni vitina; leelo yamwi ukumweeso nzipe.

¹⁶ Alaya yalusunda uku lukundo, angi yamanyile fino nawikwa kuti ndi walile iswi-zipe.

¹⁷ Leelo yamwi yalusunda amaswi yi Klisto uku vitina, asu kumweeso nswepe, yalwelengula ukongezya machulo ya kunyepwa kwane.

¹⁸ Chamuwayila chani? Leelo ukunzila zyonsi, ndi chingawa uku ufi, ndi chingawa uku chumi, Klisto alusundwa, na fiyo nduchimba. Endi, nene nanchimba.

¹⁹ Kuno manyile, fino alavi vilunsenukila viwe nkata yane, uku nnandu wa kupepa kwino, nu kwazwiliziwa nu Mweso wi Yesu Klisto.

²⁰ Ndi fino nalolelanga nkani nu kutaila, fino ntalusekelelwa nanti uche, leelo uku uposye wonsi, ndi fino manda yoshi, na li kwene, fino Klisto kwene wantensiwa ummwili wane, ndi kungawa uku mikalo yane, nanti kungawa ukufwa kwane.

²¹ Kuno kuli nene nemwi ukuwa nupuma i Klisto, nu kufwa unzano.

²² Leelo ndi chingawa ukwikala um-mwili, kuli nene nemwi ivisêke vya nnimo. Nga chino ndusolola ntachimanyile.

²³ Napotwa apa ifintu viyili: ndukumbuka ukupita nkikale na Klisto, kuno chizifile nkani.

²⁴ Leelo ukwikala um-mwili kuzipile nkani uku nnandu wino.

²⁵ Nene ngintaile fiyo, manyile fino namwikala nkani ponga nemwe, kuti mulunduluke nu kuchimba umu-usumilo.

²⁶ Kuti mulusye ukuutensyo muli Klisto Yesu pali nene, kuno ndi penepo ponga nemwe kaili.

²⁷ Leelo miele yino iwe ndi fino chiine ni iswi-zipe lyi Klisto, ukuti nginiza ukwizu mulola mwemwe, nanti ngi nsipo, impulike fino muli ngi mwimisye um-mweso wonga, nu kulwila usumilo wiswi-zipe pali ponga.

²⁸ Leelo mutachopa anisi yino, ukwiswi lyonsi; kuno yali akamanyililo ka kulowa kwao, leelo kuli mwemwe kamanyililo ka ufyusi, uwo uno ulufuma kuli Leesa.

²⁹ Kuno uku nnandu wi Klisto mwapiwa nkumbu, asi ukumzumila sile, leelo nu kuchuziwa kwene.

³⁰ Angi mululwila vivi kwene fino mwawine kunondi, nu kupulika fino na kasalaka kwene finondi.