Aefeso 2 - UPANGANO UPYA

Ufyushi uku nkumbu shi Leesa

¹ Nemwe kwene mwali yafwi uku nnandu wa ononi na maifyo ino.

² Yano mwachitanga kali uku kulondela imiele ya nsiyi, nu kunndondela umwene wa maka ya piyulu, umweso ulye uno uluomba imilimo umu uunjaana yano yapaluka,

³ yano kali, swensi kwene twapitanga nayo, umumaifyo yitu, pano twaombanga fino umwili na melengushi filusita. Uku ntambi litu twawa yana ya chilakali wi yao anji.

⁴ Leelo Leesa wino ali ni nkumbu tupu, uku lukundo lwakwe ulukulu, luno watukunda,

⁵ lino twali yafwi uku nnandu wa ononi witu, watututulwile ponga na Klisto alikuti: mwafyusiwa uku nkumbu

⁶ Watututulula ponga nawe, watuteka ponga nawe um-mikalo ya mwiyulu muli Klisto Yesu.

⁷ Ukuti um-myaka ino ilwiza, alange uvuzu wa nkumbu zyaakwe zino zitangizilingwe, uku utonsu waakwe kuli sweswe muli Klisto Yesu.

⁸ Kuno mwafyusiwa uku nkumbu, uku nzila ya usumilo, kuno asi ku maka yino, leelo uwila wi Leesa.

⁹ Asi ku milimo, untu wensi atiza anjitensya.

¹⁰ Kuno swe milimo yaakwe, twaumvilwe muli Klisto Yesu, tuombe imilimo mizipe, yino fuma kali Leesa waiteinye, kuti tulondele mwenemo.

uKuwa chili chonga muli Klisto

¹¹ Chaleka ku ifintu fiyo mwelengule fino kali mwemwe, mwali antu yakulukuwa uku mwili, yano mulwitwa Mutachitwa-ichibalu na yalye yano yalwitwa Yachitwa-ichibalu, alikuti, ichibalu cha mwili chino chaomvilwe uku makasa,

¹² fino kali mutali na Klisto, mwatana na aIslaeli, aeni yano musi nupangano wa ulanyo. Mutali ni cha kutaila, mutali na Leesa kuno ukunzi.

¹³ Leelo apa kasalaka muli Klisto Yesu, mwemwe yano mwali ukutali intangulo, mwati mupalamila pipi, uku wazi wi Klisto.

¹⁴ Kuno wene ali Uwelezyo witu, wino watuchisile swensi yano twali yaili, ukuwa untu wenga: apomola ichiumba cha pakasi chino chatutanya.

¹⁵ Nawe pano waatisya uluembu luo uku mwili wakwe, uli ntambi ya masunde matumilizye, ukuti achite yao yaili yawe untu mpya wenga, ayawelezya.

¹⁶ Ayapulikanya yoshi yaili na Leesa um-mwili onga, uku nzila ya nsalaba, pano umola uluembu luo uku nsalaba uo.

¹⁷ Wiza wasunda uwelezyano kuno muli yano mwali ukutali, nuuwelezyano kuli yalye yano yali apipi.

¹⁸ Kuno swensi twawa ni nzila kuli Wenewe iya kupalamila kuli Tata, muli Mweso wenga.

¹⁹ Ichino mwemwi fuma kasalaka mutachili yeni nanti apitilizi, leelo mwemwe yakaya ponga naswefiwa, antu ya ng'anda mwi Leesa.

²⁰ Mwakulwa apa chiimbili cha mitume na malau, na Klisto Yesu unkola ali finga ikulu ilya kumbali.

²¹ Muli wenewe ing'anda yoshi ilemine ningo nu kukula, iwe ing'anda-nkulu-iyi-Leesa, inswepe um-Mwene.

²² Muli Wenewe nemwe kwene mwakulwa ponga, muwe amikalo yi Leesa muli Mweso.