Aeblania 9 - UPANGANO UPYA

Paswepe pansi na pa mwiyulu

¹ Ichino nu Upangano wa ntangulo wali na masunde ya kupepa na paswepe pa kuno ukunsi.

² Kuno iHema lyakusilwe lilye ilya ntangulo, muno mwali chimikilo chi koloboi ni mesa ni mikate ya Ulangilisho; pano yitanga yaati aPaswefu.

³ Nu ku chisila chi pasia lya uwili iHema liyo, lino lilwitwa Paswefu pa Paswefu.

⁴ Muno muli altale ya saabu ya ubani ni sandiko lya Upangano, lino lyafupililwa ni saabu konsi konsi, muno mwali ntungo ya saabu muno mwali imana, ni ntuwa yi Aloni ilye, ino yamesilwe amafwa, ni riibao silye isha upangano.

⁵ Na piyulu pali yamalaika yaukulu yakuwilile pantupa nkumbu; leelo tutangi tuvwange li kwene amaswi ya ifintu fi chonga chonga.

⁶ Ichino ifintu fyateyanyiwa fiyo, yakapela ingila maila tupu umwihema liyo ilya ntangulo, angi yaluomba milimo ya kupepa.

⁷ Leelo umwiHema lya uwili Kapela-nkulu wenga kwene, uwino akulwingila lyonga kwene uku mwaka, asi kwaula uwasi, uno alufima apa lwakwe, nu ku maifyo ya kuntamanya aya antu yao.

⁸ Ichino Mweso Nswefu walangisha fini insila ya kwingila apaswefu yalile ichili iyulwe, lino Hema lya ntangulo lichilipo.

⁹ Chintu chi chilangisho ku manda ya kasalaka, pano mawila ni fipelo fyafimwa, fino fitange fimfikilisha wino alupepa.

¹⁰ Kuno intambi sha chiuntu sile, sha fyulya ni fyakunwa nu kufula ifintu finina finina, kuno ali masunde yano yapilwa antu fika na makati ya kuchita ifintu upya.

Ukulusi wi Klisto isila mpya

¹¹ Leelo Klisto pano wisile, ukuwa Kapela-nkulu uwa ifintu fisipe fino filuwapo, wingile mwi Hema likulu nkani ilya kapanga, lino litakusilwe uku makasa, ukulu kuti: lisi lya kuno ukunsi.

¹² Leelo asu ku wasi wa mbusi nu wa ndama, leelo ku wasi waakwe unkola wingile lyonga sile apa paswefu, apano waleta ukulusi wa manda ti.

¹³ Kuno ngu wazi wa mbusi nu wa ntwasi, nitwi lya ndama ya ng'ombe, lino yakontolelwanga aya maifyo, fikuluyaswefya nu kufula umwili,

¹⁴ ali utalusile nkani uwasi wi Klisto, wino kuli Mweso wa manda ti, waufimile upuma waakwe kuli Leesa, awe uwila uno usi nuipe, ulutufula imyeso itu ni milimo ya nfwa, kuti tumpepe Leesa wa upuma?

¹⁵ Ichino fiyo uli Kapulikanya wa Upangano upya, ukuti ku nfwa yaakwe akulule uku maifyo yano yali apisika ya upangano wa ntangulo, yao yano yisilwe, kuti yapokelele ulanyo wa upyani wa manda ti.

¹⁶ Kuno upangano wa upyani pano uli, apano pali ninfwa yi wino wauchisile.

¹⁷ Kuno Upangano wa upyani uli na maka pano kwaloleka ukufwa kwa ntu, kuno usi na maka, ngi wino wauchisila umpuma.

¹⁸ Ichino na u kwene uwatangulo utatangwile nanti wasi.

¹⁹ Kuno Isunde lyonsi, pano lyavwanilswe na Mose uku yantu yoshi, ndi fino intambi ifwansile, watosile uwasi wa ndama nu wa mbusi ponga na mansi na mafumbu makasuke ni isopi, akontolela ichitabu ichikola na antu yoshi kwene.

²⁰ Avwanga, ati: “Alau uli wasi wa Upangano uno mwanenilwe na Leesa.”

²¹ Ni Hema lilye ni fifya fyoshi ifya kupepela wavikontolile uwasi navyo kwene.

²² Nu un-ntambi kwene kwela ifintu fyoshi fikuluswefiwa ku wasi; ngi pasi ukuswisha kwa wasi pasu kwelelwa kwa maifyo.

²³ Ichino chaile ukolanyo wa ifintu fya mwiyulu vifulwe kuli weneo; leelo ifintu fya mwiyulu ifikola fifulwe ni vipelo fino fyasipa ukuluta fiyo.

²⁴ Kuno Klisto atingile apaswepe pano pachisilwe uku makasa, ali ukolenkanyo kwa paswepe pakola, leelo wingile umwiyulu umukola, aloleke li kwene apa maaso yi Leesa uku nnandu witu.

²⁵ Leelo asi kuti aufime amaila tupu, ndi fino Kapela-nkulu akulwingila apaswefu chila mwaka nu wasi uno usi wakwe.

²⁶ Ndi chili fiyo, chali chiyane achule maila tupu fuma ukuwikwa. ifiimbili fya nsi; leelo li kwene waloleka lyonga kwene um-ufikililo wa manda, atisye amaifyo uku chipelo chakwe.

²⁷ Ndi fino chilungime antu yapangilwa ukufwa lyonga, ni chisila cha kufwa uputusi wa milandu,

²⁸ ifino na Klisto kwene; waufima uwila lyonga, kuti asende amaifyo ya antu tupu, aluloleka ilye uwili nanti maifyo, kuli yao yano yalunnolela uku ufyusi wao.